لعبة On Mars – الحياة على المريخ بقت أمر حتمي

---

مقدمة

بعد نجاح مهمات مختلفة لإرسال روبوتات استكشافية للمريخ، قررت الأمم المتحدة إنشاء إدارة خاصة بعمليات إعمار واستكشاف المريخ وأطلقت عليها اسم (DOME).

الإدارة دي ليها أهداف مباشرة وعلى رأسها إننا نقدر نسكن على الكوكب الأحمر ونعيش عليه تمهيداً لإخلاء كوكب الأرض المهدد بالفناء!

وبعد محاولات كتير فاشلة، أخيراً أول فوج من البشر قدر يسافر المريخ ويبني أول مستعمرة بدائية مع نهاية 2037. لكن اعتمادهم الأساسي على الموارد إللي بتوصلهم من الأرض سواء مصادر طاقة أو أكل أو شرب أو أكسجين وبتتخزن في محطة الفضاء إللي بتدور في مدار المريخ!

بس الموضوع موقفش على كدة! في السنين إللي بعد كدة، بدأت شركات من القطاع الخاص في وضع خطط حقيقية لعمل أول مستعمرة متقدمة مستقلة بذاتها تماماً عن الأرض على سطح الكوكب الأحمر.

عارفين ده معناه إيه؟معناه إن نجاح إنشاء أول مستعمرة حقيقية مستقلة بذاتها بكل مواردها عن الأرض مرتبط ارتباط رئيسي بحاجة واحدة بس، وهي إننا لازم نحول الكوكب الأحمر لكوكب أزرق وأخضر!

كل شركة من دول بدأت تتسابق عشان تحقق أهداف DOME وتبقى في الواجهة وتبقى هي المسيطرة على مجريات تطوير الكوكب عن طريق تقديم نفسها أمام الأمم المتحدة وقدام البشر كأنها المنقذ أو المخلص للبشرية. بس في الحقيقة كل شركة من دول زي مبتحاول تحقق أهداف الأمم المتحدة، ليها برضه أهداف خاصة وأجندة سريةعلى الكوكب الأحمر بتحاول تحققها عشان تسطير بيها على مجريات عصر جديد للبشر!

في لعبة On Mars، وبصفتك رئيس رواد الفضاء لأحد الشركات الخاصة دي، مطلوب منك تبني أقوى مستعمرة عرفها البشر على سطح الكوكب الأحمر وتحقق أجندة الشركة الخاصة الغير معلنة زي مبتحقق أجندة وأهداف DOME وتسيطر على المشهد بشكل عام!

في البداية، لسة المستعمرة البدائية الموجودة على المريخ بتعتمد بشكل كبير على الموارد إللي بتوصلها من الأرض من خلال محطة المريخ الفضائية إللي بتدور في مداره.

فهتضطر تسافر كتير بين المستعمرة على المريخ وبين محطة الفضاء في البداية، ومع الوقت ومع تحقيقك لأهداف شركتك، المستعمرة هتبدأ تعتمد على الموارد إللي سطح الكوكب الجديد هيطلعها للبشر لو المهمة نجحت.

هتبني مناجم، ومولدات للطاقة، ومحطات للمياه، ومشاتل للنباتات، ومكثفات للأكسجين، وملاجيء ومساكن للناس والعمال.

هدفك تبقى معتمد كلياً على إللي هتقدر تخرجه من سطح المريخ، معتمد تماماً على نفسك بدون طلب أي معونة من أي حد.

هدفك إنك تبني نظام معيشي كامل مكون من أربع أضلاع رئيسية (هواء – أكل – مياه – طاقة) يضمن حياة ثابتة ومستقرة على الكوكب الأحمر.

وعشان تقدر تعمل ده، لازم تعرف توازن بحذر بين أهمية المياه والهواء والطاقة والأكل – الحاجات إللي من غيرها مش هنقدر نعيش.

فيا ترى هتعرف تعمل ده، ولا في شركة تانية ممكن تسبقك وتخلد اسمها في سجل أكبر تحدي بيواجه البشرية؟!

بطاقة تعريف اللعبة

---

موضوع اللعبة (Theme)

زي مقلت قبل كدة في مراجعة لعبة Terraforming Mars إن فكرة استعمار المريخ، ومحاولة العيش عليه مش جديدة. وكلنا شفناها في أفلام ويمكن لعب تانية.

لكن في اللعبة دي تحديداً طريقة توظيف الموضوع والقصة والحبكة مع الأفعال (Actions) إللي أنت بتعملها جوة اللعبة مذهلة.

وهقولكم شوية أمثلة: 

• اللعبة فيها 5 موارد رئيسية من غيرها الإنسان ميعرفش يعيش حتى على كوكب الأرض. كل نوع من أنواع الموارد دي بيستخدم لبناء مباني معينة في المستعمرة.
• في دورة حياة للموارد دي، يعني مثلاً مينفعش تبني (محطة مياه) من غير (مصدر للطاقة)، ومينفعش يبقى عندك (مصدر للطاقة) غير لما يكون عندك (منجم) بيطلعلك المعادن اللازمة إللي هتساعدك في تطوير الطاقة ومينفعش تبني (مسكن أو ملجأ) للناس تعيش فيه من غير ميبقى عندك (أكسجين) عشان يقدروا يتنفسوا وإللي بدوره هيحتاج (للنباتات) في دورة الحياة عشان نقدر نطور نظام بيولوجي متكامل على كوكب المريخ.
• من ضمن الأساسيات إللي بتدور حواليها اللعبة هي التكنولوجيا إللي بتحاول تطورها على كوكب المريخ وده شيء عادي. بس إللي أبهرني فعلاً إن التكنولوجيا دي حتى لو أنت طورتها ممكن حد تاني غيرك في اللعبة يستخدمها (Licensing) بمقابل طبعاً. تخيل لو مخترع الكهرباء هو بس إللي بيستخدمها مثلاً أو مخترع الشبكات؟! لكن التكنولوجيا في حالة اكتشافها ممكن أي حد يستخدمها مع حفظ حقوق مكتشفها.
• كلنا بنشارك في إعمار المريخ، وكلنا كلاعبين (أو كبشر) بنساعد إن المريخ يتطور. لكن كلنا برضه عندنا أجندات خاصة سرية عايزين نحققها. الكوكب كله بتاعنا، بس في واحد فينا هيحاول يحقق أكبر مكاسب ليه. وكل متساهم أكتر في تطوير الكوكب كل ما هتستفيد أكتر من باقي اللاعبين مع الوقت.
• تقدر تستعين بـ (٦) علماء في (٦) مجالات عشان يساعدوك في تطوير المريخ. العلماء بيبقى ليهم دور محدد وتخصص محدد في مباني معينة جوة المستعمرة حسب تخصصات العلماء دول. من غير العلم وبالذات في التخصصات إللي موجودة جوة اللعبة لا يمكن نكون وصلنا لأي حاجة دلوقتي.

دي أمثلة للتوضيح لكن مش للحصر، أنا لو حبيت أحط أمثلة ممكن أكتب أكتر من كدة بكتير أوي.

اللعبة بتعيشك جواها كأنك بجد جوة المريخ، وحرفياً أنا بنسى نفسي تماماً وأنا بلعبها وبحس إني فعلاً بحاول أنقذ الكوكب ده من الضياع 😂

---

قواعد اللعبة (Rules)

مش هكدب عليكم وأقولكم اللعبة سهلة وقواعدها بسيطة. لأ، كتاب القواعد مش صغير حوالي (٢٤) صفحة لكن مكتوب باحترافية تامة.

القواعد دسمة وعايزة تركيز. في الأول هتحتاج ترجعلها كذا مرة، بعد أول مرة تلعب (Session) هتلاقي نفسك مش بترجع للكتاب تقريباً.

وعلى الرغم من دسامة قواعد اللعبة، لكنها غير معقدة. وعشان القواعد منطقية ومرتبطة بالخط الرئيسي لموضوع إعمار المريخ كل حاجة انسيابية ومنطقية جداً وده إللي بيخلي قواعد اللعبة في النهاية مع ممارسة اللعبة أكتر من مرة بتبقى سهلة وبسيطة جداً.

ولو حابب تتصفح كتاب القواعد، فتقدر تنزل كتاب القواعد من هنا

ولو أنت من النوع إللي بيحب يتفرج وميقراش أوي أو بيحب يتفرج ويقرا، اتفضل يا سيدي الفيديو ده أنصح بيه جداً:

---

طريقة وآليات اللعب (Gameplay & Game Mechanics)

اللعبة دي فيها حوالي (١١) آلية لعب (Mechanic) شغالين مع بعض زي التروس عشان فعلاً يطلعوا أحسن صورة أنا شفتها في لعبة بتتكلم عن استعمار المريخ قبل كدة.

هتكلم هنا عن أهمهم أو شوية منهم:

1. Worker Placement، وده آلية اللعب (Mechanic) الرئيسية ومعمولة بطريقة مختلفة شوية. فهمك ليه فيه جزء كبير من الخطة (Strategy) إللي هتحطها لو حابب تكسب.
   
   إللي ميعرفش يعني إيه، ببساطة يعني إنك بيبقى معاك Worker وفي اللعبة اسمه Colonist وبتوديه في مكان الـ Action إللي أنت عايز تاخده. باستثناء إن في اللعبة دي مش كل الـ Actions محتاجة توديلها Colonist وده إللي مخلي فيه Twist حلوة جداً في اللعبة (دايماً بحب الـ Twists إللي بتبقى على الـ Worker Placement زي مثلاً لعبة The Architects of the West Kingdom).
   
2. Hand Management، في اللعبة لما بتبني مباني بتقدر مع الوقت تعمل للمباني دي تطوير (Upgrade) وتحولها لـ Advanced Buildings. وجزء كبير من خطتك معتمد. على المباني دي لأنها هتديك أفعال زيادة (Extra Actions) ممكن تعملها في الدور بتاعك.
   
   وعشان تحولها لمباني متقدمة لازم تاخد من محطة الفضاء إللي بتدور حوالين المريخ مجموعة من الرسومات الهندسية أو نقدر نقول المخططات (Blueprints) إللي هتساعدك على تطوير مباني المستعمرة مع الوقت. وإللي بدورها هتديك فوائد أقوى (واخدين بالكم من الـ Theme).
   
   المخططات دي في الحقيقة هي مجموعة كروت كلها مش مكررة (Unique) ومفيش كارت شبه التاني. جزء كبير جداً من خطتك في اللعبة هي المباني إللي هتطورها وإزاي ممكن تبني الـ Engine إللي يساعدك بالكروت دي.
   
3. Point to Point Movement، اللعبة فيها جزء رئيسي ورائع ومرتبط برضه بالـ Theme وهو استكشاف أرض المريخ، والبناء عليه باستخدام إما الـ Rover أو الـ Bots إللي بتحركهم على سطح المريخ.
   
   ممكن تكتشف تكنولوجيا جديدة أو مواد داخل أرض المريخ عن طريق تحركات الـ Rover الخاص بيك.
   
   أو ممكن من خلال تنقلات الـ Bots بتاعتك تحدد أفضل أماكن للبناء أو تطور المباني إللي بنيتها قبل كدة.
   
4. Tile Placement، منظومة بناء المباني في اللعبة بتعتمد اعتماد كلي على Hex Tiles بتتحط بقواعد معينة على سطح الكوكب. المباني دي هي المحرك الرئيسي للعبة كلها لأنه بدونها مفيش استعمار ولا تطوير ولا لعبة أصلاً 😁

لو حابب تتفرج على طريقة اللعب ممكن تتفرج على الفيديو ده:

---

مكونات اللعبة والرسومات (Components & Art)

أنا هنا هتكلم عن نوعية المكونات، والرسومات، وجودتها، وعددها، ومدى ترابط المكونات والرسومات موضوع اللعبة، وما إلى ذلك.

١. المكونات (Components)

اللعبة دي فيها واحدة من أفضل المكونات إللي شفتها في حياتي كلها في أي Board Game لعبتها. وده مش غريب على شركة Eagle-Gryphon Games ولعب Vital Lacerda تحديداً.

وأنت بتلعب هتحس فعلاً إنك ماسك Bots حقيقية أو معاك رائد فضاء أو فعلاً بتبني مباني لها معنى على سطح المريخ.

اللعبة دي في منها نسختين Kickstarter Edition و Retail Edition. أنا هنا بتكلم على الـ Kickstarter Edition ومش عارف الفرق عامل أد إيه بينهم من ناحية المكونات.

ده بالإضافة للـ Player boards الرائعة لأن فيها تجويفات تمنع تحرك القطع بتاعتك أثناء اللعب.

والـ Insert ممتازة إللي بتنظم فيها كل قطع اللعب وده بالإضافة لجودة الصندوق بتاع اللعبة نفسه.

٢. الرسومات (Art)

مش هقدر أتكلم عن الرسومات والفنيات داخل اللعبة من غير متكلم عن Ian O’Toole الفنان المسئول عن كل ما يتعلق بالرسومات في On Mars.

Ian O’Toole واحد من أفضل رسامي ألعاب الـ (بورد جيمز) في الوقت الحالي. أنا شخصياً لما بشوف لعبة نازلة وهو إللي عامل الـ Art بحط كدة ٥٠٪ خلاص إني هجيب اللعبة. وبقية الـ 50% على اللعبة والـ Gameplay.

نرجع تاني لـ On Mars، الـ Art work واللون الأحمر السائد على اللعبة كإشارة للون كوكب المريخ ليه فضل كبير في إنه يعيشك جو اللعبة ويدخل الموضوع بتاعها مباشرة.

كل تفصيل ورسمة في اللعبة بتحطك في المود بكل ما تحمله الكلمة من معنى. شكل الـ (بورد) رائع. ومفيش حد شاف اللعبة على الترابيزة إلا لما علق على جمالها وأد إيه ليها حضور طاغي بسبب الرسومات والمكونات.

---

طرق اللعب المختلفة (Play Modes)

اللعبة ممكن تتلعب بطريقتين:

1. أكتر من لاعب بشكل تنافسي (Competitive Multiplayer)
2. ولوحدك (Solo)

ملاحظة بس على الـ Solo هو إني حاسس إن كتاب القواعد في الجزء ده تحديداً عايز شوية توضيحات أكتر ولكن بعد أول مرة أو مرتين الموضوع بيبقى طبيعي.

---

مصمم اللعبة

المصمم الرائع Vital Lacerda مشهور بتصميمه للألعاب الـ Thematic وإللي مليانة تفاصيل كتير ومبنية بدقة متناهية.

من أشهر ألعابه:

• On Mars
• Lisboa
• The Gallerist
• CO₂
• Escape Plan
• Kanban
• The Weather Machine
• … وغيرها

تعتبر On Mars من أكبر الألعاب إللي عملها وأضخمها الفترة إللي فاتت وحالياً منتظرين لعبة The Weather Machine إللي هتصدر غالباً السنة الجية.

لو عايز تبدأ بلعبة ليه ممكن تبدأ بلعبة أبسط شوية أنا بالنسبالي أول لما بدأت بدأت بـ On Mars.

---

إيه إللي عجبني؟

أنا مش قادر أحصر إيه إللي عجبني لأن فعلاً مفيش حاجة معجبتنيش حرفياً.

• الـ Theme وأد إيه كل الـ Actions مترابطة جداً معاها.
• اللعبة مليانة تفاصيل وده ميزة بالنسبالي.
• على الرغم من إن اللعبة تبان معقدة، ولكن في الحقيقة هي عكس كدة لأن كل الأفعال فيها منطقية ونتايجها منطقية ومتوقعة وبالتالي اللعبة سهلة التعلم جداً بعد أول قعدة مثلاً.
• الـ Art والـ Components من أفضل ما يكون.
• اللعبة تحسها زي التروس إللي راكبة في بعض، كل أما الترس يتحرك الباقيين بيتحركوا. تصميمها رائع ومتقن في نفس الوقت.

---

إيه إللي معجبنيش؟

بصراحة مفيش حاجة مش عجباني في اللعبة دي. واللعبة دي أنا بحطها واحدة من أفضل تلت لعب لعبتهم في حياتي.

لو سألتني تحب تغير إيه فيها، ممكن أقولك القواعد بتاعة الـ Solo mode تبقى أوضح شوية وإن كان ده شيء لا يذكر حرفياً.

---

تشتريها منين

لو حابب تشتري اللعبة من الموقع الرسمي بتاعها فممكن تلاقيها هنا

وممكن كمان تلاقيها على أمازون، فممكن تجيبها هنا مع الـ Upgrade Pack إللي هيبقى فيها شوية حاجات كانت نزلت في نسخة الـ Kickstarter

---

رأي إجمالي

اللعبة عاملة زي مكنة كبيرة، وفيها تروس كتير، وكل التروس واصلة ببعض. لو ترس اتحرك كل التروس بتتحرك بالتبعية.

وده إللي مخلي مصمم اللعبة من أفضل مصممي ألعاب الـ (بورد جيمز) والناس بتشتري لعبه عشان اسمه حتى قبل متشوف اللعبة.

اللعبة بالنسبالي هي واحدة من أفضل الألعاب إللي تناولت Space Theme بشكل عام وأفضل من تناول الـ Mars theme على الإطلاق.

اللعبة تستحق الشراء بلا جدال لو كنت من محب التفاصيل والـ Euro Games خصوصاً لو كنت من عشاق الـ Worker Placement والـ Tile Placement. ده بالإضافة للـ Theme وارتباطها بكل فعل بتعمله جوة اللعبة.

بالنسبالي اللعبة دي تعتبر Masterpiece حرفياً.

أتمنى يكون التقييم يساعد حد فيكم على اتخاذ قرار بخصوص اللعبة دي، وإلى اللقاء في تقييم أخر.