أحسن ٣ طرق لتعلم الجغرافيا من الـ (بورد جيمز)

مقدمة

اتكلمت قبل كدة عن علم الجغرافيا بشكل مفصل شوية وأد إيه هو مهم. ووضحت أنا اتصدمت أد إيه لما عرفت حقيقة العلم ده على عكس ما كنا بندرسه في المدارس نهائياً.

لكن لازم نبقى متفقين الأول إن مفيش لعبة هتيجي تقولك تعالى لما أعلمك جغرافيا إلا لو لعبة معمولة عشان كدة مخصوص وغالباً مش هتبقى معمولة للناس محبي هواية لعب الـ (بورد جيمز) أمثالنا 😁

لكن عادة اللعبة نفسها هيبقى فيها حاجات أنت محتاج تدور وراها لو حابب تتعلم جغرافيا بجد. والحاجات دي هي المفاتيح الرئيسية إللي منها ممكن تزود معلوماتك في الجغرافيا وفي نفس الوقت تربط نفسك أكتر باللعبة وموضوعها وده ليه متعة مختلفة تماماً.

فأنا هكتب هنا عن أحسن ٣ طرق من خلالهم تقدر تزود حصيلتك الجغرافية وأنت بتلعب وبتستمتع من وجهة نظري المتواضعة وعن تجربة.

الطريقة الأولى: دور على الخرايط

مش بيقولك دايماً في علم الجريمة، لو عايز تعرف المجرم دور على المستفيد؟

أهو هنا بقا في الـ (بورد جيمز) لو عايز تتعلم جغرافيا دور على الخرايط!

بس إحنا قلنا قبل كدة الجغرافيا مش خرايط وبس. أيوة ده حقيقي. الخريطة إيه أحد الأدوات الخاصة بالجغرافيا.

وبالتالي مش عشان تتعلم جغرافيا، المطلوب إنك تمسك الخريطة وتحفظها مثلاً! ولكن المطلوب هو إنك تطلع الأسرار من الخريطة دي.

البحث عن معلومة دايماً بيبدأ بسؤال، ودي أكتر طريقة ممكن تخلي مخك يبحث ويدور. عشان كدة أول متشوف خريطة في لعبة ابدأ اسأل نفسك الأسئلة إللي جاية دي.

عشان تتعلم من أي خريطة جغرافيا صح، فأنا عايزك تمشي في المراحل التلاتة إللي جيين دول.

المرحلة الأولى: بداية تعارف

الأسئلة دي والإجابات إللي هتوصلها بالبحث أو القراءة تعتبر بداية تعارف بينك وبين الخريطة وإللي عليها.

1. هي دي خريطة إيه؟
2. إيه هي البلاد أو المدن أو الأحياء إللي على الخريطة دي وفي أنه قارة؟
3. إيه المعالم المرسومة على الخريطة دي؟ زي الجبال، والبحار، والأنهار، وياترى اسمها إيه؟
4. إيه أطول جبل؟ أطول نهر؟ أكبر بحر؟ لو في محيط؟ على الخريطة دي وإيه مكان المعالم دي من البلاد إللي على الخريطة؟
5. هل الخريطة دي طول عمرها كدة ولا اتغيرت مع تغير الزمن؟ يعني كانت البلد دي حدودها مختلفة زمان ولا هي هي؟ والمعالم إللي عليها كانت حاجة تانية واتغيرت ولا هي هي؟

لغاية دلوقتي لو جاوبت على الأسئلة دي هتكون عرفت معلومات كتير جداً وبتربطها باللعبة كمان إللي بتلعبها. وده مكسب عظيم. وممكن تقف لحد هنا.

ولكن لو عايز بقا تكمل فابدأ المرحلة التانية.

المرحلة الثانية: توطيد علاقات

لو حابب تزود المعلومات أكتر، فابدأ جاوب على الأسئلة دي كمان:

1. امسك كل بلد أو مدينة أو حي على الخريطة دي واسأل نفسك، إيه أكتر حاجة بتشتهر بيها؟ (حاجة واحدة بس). ممكن يبقى معلم سياحي. ممكن يبقى أكلة. ممكن يبقى لغة أو طريقة تعامل البشر فيها أو حتى لبسهم! أي حاجة.
2. إيه شكل أعلام الدول أو المدن دي إن وجدت؟
3. مين فيهم أكبر دولة أو مدينة من حيث المساحة ومن حيث السكان؟ ومين أصغر واحدة؟
4. أكتر أماكن السكان بيعيشوا ومتركزين فيها؟ وليه؟
5. وهل في هجرة للسكان من أو إلى البلاد دي؟ وليه؟

لو الموضوع عجبك. كمل معايا المرحلة التالتة.

المرحلة الثالثة: الموضوع عجبني

لو وصلت للمرحلة دي، فأنت كدة الموضوع عجبك أوي. جاوب على الأسئلة دي كمان:

1. يا ترى الجو في الدول أو المدن دي بيبقى عامل إزاي على مدار العام؟
2. إيه شكل الحيوانات إللي بتعيش في الأماكن دي؟ هل في هجرة حيوانات بتحصل من أو إلى الأماكن دي؟ وليه؟
3. إيه هي اللغات إللي بيتكلم بيها أهالي البلاد أو المدن دي؟
4. إيه هي طرق التنقل المختلفة الممكنة بين الدول أو المدن دي؟
5. إيه هي العملات المستخدمة في البلاد أو المدن دي؟ وتاريخها؟ وقوتها الشرائية؟ يعني ممكن تعيش بكام في اليوم؟ سواء في الأماكن المشهورة أو البعيدة؟
6. إيه أشهر الأكلات والأعياد والمناسبات المنتشرة في المدن دي؟
7. إيه هي أهم الفنون والرياضات المشهورة بيها البلاد دي؟

لو خلصت التلت مراحل دول، فأنا أرفعلك القبعة. لخص بقا المعلومات إللي وصلتلها دي في ورقة أو ورقتين لو تقدر وشاركنا بيهم.

مجموعة الأسئلة إللي فوق دي كلها، هتخليك تدور على معلومات كان صعب جداً توصلها لو مستني اللعبة تقولك على إجاباتها لأنه غالباً مش هيحصل.

الطريف في الموضوع إنك لو أجبت على الأسئلة دي أو معظمها فأنت كدة كأنك بتدرس حاجة اسمها جغرافيا إقليمية (Regional Geography). ودي أحد أقسام الجغرافيا الأربعة إللي بيتم دراستها بشكل عام. واتكلمت عنها في المقال ده.

ببساطة، هو قسم في علم الجغرافيا بيهتم بدراسة منطقة محددة على كوكب الأرض من كل النواحي. مثلاً ممكن حد يتخصص في دراسة أفريقيا من كل النواحي سواء التضاريس أو المناخ أو الثقافات المختلفة وتأثر البشر بالبيئة المحيطة والهجرة واللغات وخلافه. وممكن كمان التركيز يبقى على مدينة واحدة مثلاً أو بلد.

الطريقة التانية: اقرأ بين الكلمات والسطور

بما إن إحنا بنتكلم عن الجغرافيا، فأنت عشان تتعلم جغرافيا لازم تبقى مستكشف (Cartographer). بس مش هنكتشف قارات ومعالم أثرية. لأ، إحنا هنكتشف الكلام إللي بين الكلمات والسطور وفي كل مكان ممكن تتصوره في اللعبة.

بس هتدور على إيه بقا بين السطور؟ في حاجات لو لقيتها، فده يعتبر مفتاح لحاجة ممكن تتعلمها في الجغرافيا.

دي شوية أمثلة:

1. اسم بلد أو مدينة أو حتى بلدية في مدينة
2. صورة من بلد سواء معالمها أو حاجة طبيعية فيها
3. أعلام لدول أو شعارات
4. اسم أو صورة أكلة معينة
5. اسم أو صورة لبس معين مشهور في مكان ما
6. لعبة رياضية مشهورة بين بعض الناس
7. صناعة معينة مشهورة في منطقة ما
8. مهن مشهورة في مكان ما

طيب هندور على الحاجات دي فين بقا بالظبط في اللعبة؟ خصوصاً إن الحاجات دي مبتبقاش واضحة وممكن تعدي على إللي بيلعب من غير مياخد باله.

1. موضوع اللعبة نفسه (Theme). في بعض الألعاب الموضوع بتاعها قائم على بلد أو مدينة معينة. وساعات اسم اللعبة نفسه بيبقى على اسم مدينة أو بلد قديمة أو حديثة.
2. كتاب القواعد مليان بحاجات من دي كتير خصوصاً لو الكاتب بيحاول يدعم اختياراته بحقائق عن المكان إللي بيعمل على أساسه اللعبة.
3. الكروت – لو في كروت – بيبقى عليها غالباً معلومات كتير جداً زي أسماء مهن مشهورة في بلاد معينة. أسماء دول أو مدن. مرسوم عليها ساعات حاجات من إللي ذكرناها فوق كمان.
4. طبعاً الـ (Board) لو اللعبة فيها
5. الصور المرسومة في أي مكان سواء على العلبة، أو كتاب القواعد، الكروت، أو حتى المكونات إللي بتيجي مع اللعبة

لو لقيت حاجة من الحاجات دي، فاستخدم نفس الأسئلة إللي في الطريقة الأولى عشان تدور على معلومات خاصة بكل بلد أو مدينة أو حاجة متعلقة بيهم.

ممكن تزود أسئلة كمان من عندك حسب اهتماماتك العامة.

وخليك مستوعب دايماً إن أي شيء متعلق بالأرض والبشر فغالباً هيبقى متعلق بالجغرافيا حسب النظرة إللي بتنظر بيها للموضوعين دول.

الطريقة التالتة: سافر في عقلك

في بقا طريقة حلوة أوي وبتطلق العنان كدة لخيالك. وهي إنك تسافر مكان ما بس في عقلك.

ليه في عقلك؟ لأنه أرخص 😂 لكن والله لو حابب تسافر بجد، توكل على الله.

يعني ببساطة لو قدرت توصل لمفتاح من المفاتيح إللي ذكرتها فوق دي في الطريقة الأولى أو التانية سواء كانت على خريطة أو حاجة بين السطور فابدأ حضر شنطتك عشان أنت مسافر خلاص.

اعمل خطة متكاملة لمدة أسبوع، واوصف فيها برنامجك اليومي في البلد أو المكان إللي أنت قررت تدور وراه. خلي البرنامج يومي وبالشروط الآتية:

1. حدد المكان إللي هتنزل فيه. دور على أفضل الأماكن إللي بيسافروا ليها السياح وشوف أفضل مكان ممكن تنزل فيه فين بحيث يبقى وسط بين كل الأماكن إللي حابب تزورها محيطة.
   
   ⬅️ (دراسة جغرافيا طبيعية وبشرية).
   
2. شوف الجو بيبقى عامل إزاي وهتحتاج لبس شكله إيه.
   
   ⬅️ (دراسة مناخ).
   
3. إزاي هتنتقل بين المدن وبعضها في المكان إللي هتروحه.
   
   ⬅️ (دراسة جغرافيا النقل وده فرع من الجغرافيا البشرية).
   
4. شوف عملة المكان ده إيه عشان تقدر تحول فلوس وابحث عن المستوى الاقتصادي بتاع البلد وتقدر تعيش بكام في اليوم وإيه أفضل أماكن تشتري منها لأن ده هيحدد قوتك الشرائية.
   
   ⬅️ (دراسة الجغرافيا الاقتصادية).
   
5. يا ترى المكان ده بيتكلموا فيه لغة إيه؟ وهل بيقبلوا لغات تانية؟ عايز تتعلم لغات تانية؟
   
   ⬅️ (دراسة ثقافات بشرية مختلفة).
   
6. يومياً لازم تروح مكان جديد مروحتوش قبل كدة ولما تزوره لازم تجمع كل المعلومات عنه.
   
   ⬅️ (دراسة معالم بشرية وطبيعية).
   
7. لازم تاكل في اليوم تلت مرات. حدد أشهر الأكلات إللي عايز تجربها بشكل يومي، وممكن يسمح بالتكرار.
   
   ⬅️ (دراسة ثقافات بشرية مختلفة).
   
8. روح مكان ترفيهي جديد كل يوم أو يومين أو روح اتفرج على رياضة جديدة أو حاجة بتحبها.
   
   ⬅️ (دراسة الترفيه والسياحة والجغرافيا الرياضية وده فرع من الجغرافيا البشرية).
   
9. إيه هي أفضل تذكارات ممكن تشتريها لحبايبك من هناك.
   
   ⬅️ (دراسة ثقافات بشرية مختلفة).
   
10. من تعاملك مع البشر هناك، إيه الحاجات المسموح بيها وإيه الممنوع؟ في حاجات بتبقى محرمة لا يمكنك الاقتراب منها وفي حاجات مختلفة عن ثقافاتك ممكن تستعجب وجودها.
    
    ⬅️ (دراسة ثقافات بشرية مختلفة).

في نقط تانية ممكن تزودها حسب اهتماماتك، زي مثلاً حاجات متعلقة بالتوزيع الجغرافي للحيوانات. أو مثلاً بالوضع السياسي والديني والاقتصادي في الأماكن دي. وحاجات تانية كتير.

كل نقطة من دول وأنت مش واخد بالك بتلمس جزء من أقسام علم الجغرافيا ولكن بطريقة ممتعة. تخيل نفسك يا عم في ناشنوال جيوجرافيك وبتعمل برنامج من المدبلجين دول 😁

أمثلة على بعض الألعاب

دي أمثلة بسيطة على بعض الألعاب إللي بتحتوي يا إما على:

1. خريطة لبلد سواء كان في العصر بتاعنا أو عصر قديم شوية (وده ممتاز لو حابب تتعلم الجغرافيا التاريخية).
2. اسم بلد أو مدينة أو ما يدل عليهم
3. وفي منهم كمان إللي بيعملك إزاي تعمل خريطة وإن كانت بدائية ولكن ده بيندرج تحت قسم (عمل الخرائط) في الجغرافيا.

أشكر الأخ Awab في التعليقات على لفت نظري لوضع القسم ده في المقالة

الخلاصة

دول أكتر ٣ طرق أنا شايف إنهم فعالين جداً في إنهم يستفزوا تفكيرك وإنك تتعلم جغرافيا منهم بشكل أكثر متعة من إنك تفضل تقرأ معلومات جامدة جداً زي إللي كنا بناخدها في المدرسة كدة بدون روح.

ممكن تستعمل طريقة واحدة أو كلهم إللي أريحلك. بس المهم إنك متفوتش الفرصة العظيمة دي، لأننا وإحنا بنلعب ممكن نتعلم حاجات مذهلة!