مقدمة
من أعظم المصادر إللي ممكن تتعلم منها أو عن طريقها تاريخ هي الألعاب. وطبعاً ألعاب الـ (بورد جيمز) مش استثناء.
في كذا نوع من الألعاب المعتمدة على التاريخ في موضوعها، زي مثلاً:
- نوع بيعتمد على القصة التاريخية بمضمونها العام زي ما هو بدون تأليف ولا تحريف.
- وفي نوع تاني بياخد الملامح الرئيسية بتاعة اللعبة من القصة التاريخية لكن معندوش مانع يضيف أو يغير فيها بما يناسب القصة.
- ونوع تالت بيعمل خليط، فبياخد قصة أو عصر تاريخي ولكن بيحطه في قالب تاني خالص زي مثلاً قالب خيالي وبشخصيات أو مظاهر تاريخية متعلقة بالعصر ده لكن لا يمت بصلة لما حدث في العصر ده.
وتعتبر الألعاب دي هي أكتر أنواع الألعاب إللي بحبها جداً وببقى متحمس جداً وأنا بلعبها لأنها بتحط التاريخ في قالب مسلي وكمان بيتسفز عقلك وتفكيرك!
وفي الحقيقة، اللعب دي بتستفز عقلي في اتجاهين:
- الاستمتاع باللعب والتفكير في كيفية الفوز خصوصاً لو طريقة اللعب بتجبرك على التفكير ووضع الخطط وطريقة تنفيذها وخلافه.
- إني ببقى عايز أعرف هي إيه القصة التاريخية أو العمق التاريخي إللي مصمم اللعبة اعتمد عليه ومدى نجاحه في ربط الأحداث بطريقة اللعب.
ولكن قبل متكلم عن إيه أحسن الطرق إللي ممكن تتعلم بيها تاريخ من الـ (بورد جيمز) من وجهة نظري، فلازم الأول تعرف حاجات مهمة جداً عن التاريخ عشان تقدر تستفيد أكبر استفادة ممكنة من إللي هتتعلمه من اللعب.
يعني إيه تاريخ؟
أنا مش عايز أتكلم بطريقة أكاديمية تحسسك إني بنقل من كتاب أو كلام مكتوب في مليون مكان تاني ويمكن أحسن مني بكتير. ولكن عايزك تحس بالموضوع وتفهمه عشان تحس فعلاً بروعته.
أنا عايزك تبص كدة على الصورة دي، وأكيد كلنا لعبنا اللعبة دي وإحنا صغيرين. وصل النقط عشان تشوف الصورة النهائية. وكل نقطة عليها رقم، ولو غلطت ووصلت مثلاً ١٠.ب ١٥ الصورة هتطلع مش مظبوطة.
وهو ده التاريخ بالظبط!
النقط هي الأحداث الزمنية إللي بتحصل في التاريخ، وأحداث بتحصل ورا بعضها. مينفعش تنط وتسيب حدث منهم أو تلغيه! لكن لا يمكنك إنك تفهم التاريخ من غير متكون الصورة الكاملة وتوصل كل النقط ببعض.
ممكن أه تعرف حاجة حصلت في سنة أو شهر معين، لكن مش هتقدر تفهم فترة كاملة أو عصر كامل من غير متربط الأحداث دي ببعض وتفهم أسبابها.
الفترات الزمنية الرئيسية على مدار التاريخ البشري
لما هتيجي تلعب لعبة أو تتفرج على حاجة متعلقة بالتاريخ هتحس إنك مش فاهم إيه الترتيب بتاع القصة أو الحدث ده بالنسبة للعصر بتاعك خصوصاً لو مكنتش متخصص في علم التاريخ.
عشان كدة لازم تعرف الصورة العامة للتاريخ البشري عشان تقدر تستوعب الحاجة إللي بتدرسها دلوقتي.
العلماء قسموا التاريخ البشري لعدة فترات زمنية رئيسية هنقولهم هنا باختصار شديد ومخل ولكن عشان الصورة الكبيرة تكمل.
بس قبل مذكر التقسيم لازم أذكر إن ده مش أحسن تقسيم ولا هو التقسيم الأوحد. لأن تقسيم التاريخ لفترات زمنية شيء اختلف عليه العلماء على مدار الأزمنة. وليه وجهات نظر مختلفة. بل قد يختلف من منطقة لمنطقة.
أنا بس قررت أختار واحد من التقسيمات المشهورة عند الغرب – تحديداً أوروبا – عشان أقدر أوفق بين التقسيمات دي وبين الموضوع الرئيسي إللي بكتب عنه وهو الـ (بورد جيمز) وعلاقتها بالتاريخ.
يمكن في المستقبل أقدر أكتب مقال مفصل عن التقسيمات دي وليه أنا اخترت التقسيم ده.
معلومة على الماشي:
التأريخ الميلادي بيعتمد على وقت ولادة سيدنا عيسى عليه السلام حسب مؤسسه. وكل إللي بيكتبوا في التاريخ بيستعملوه بالطريقة دي في كتاباتهم: ٣٠٠ سنة قبل الميلاد واختصاراً ٣٠٠ ق.م.
ولو عايزين يتكلموا على سنة مثلاً بعد ميلاد سيدنا عيسى عليه السلام بيقولوا ٣٠٠ ميلادياً أو اختصاراً ٣٠٠ م.
ولكن تحت دعوات مختلفة زي إن سيدنا عيسى مولده لا يعرف بدقة أو إن التأريخ الميلادي ده معتمد على ديانة معينة مش تأريخ يشمل كل البشر، بدأت بعض الجهات الأكاديمية والمدارس والحكومات من عدة سنوات تغير الاختصارات دي.
فبدأ يستعملوا بدل قبل الميلاد (ق.م.) إلى قبل الحقبة العامة (ق.ح.ع). وغيروا ميلادياً (م.) إلى الحقبة العامة (ح.ع.). وقالوا إن الحقبة العامة دي كلمة أشمل وأعم من فكرة تحديدها بميلاد سيدنا عيسى عليه السلام وتشمل كل البشر.
فأنا هستخدم المصطلحات الحديثة وبين قوسين المصطلحات والاختصارات القديمة فقط لمنع الارتباك. ولو عايز تقرا أكتر عن الموضوع ده من هنا.
وفي كمان اصطلاح اتفقوا عليه، لو الحقبة الزمنية إللي بتحاول تتكلم عنها كانت كلها في التوقيت إللي هو في الحقبة العامة (ميلادياً) فمش لازم تكتب أي اختصارات.
فمثلاً: من الفترة (٢٠٠) إلى (١٢٠٠) ده بيبقى متعارف عليه إنه ٢٠٠ ح.ع (م.) إلى ١٢٠٠ ح.ع. (م.)
الفترة دي هي الفترة إللي لم يتم اختراع أنظمة الكتابة فيها. وبالتالي المؤرخين مقدروش يلاقوا تأريخ للأحداث بشكل دقيق فيها فبدأوا يستعملوا بعض التقنيات في تحليل الأثار والحفريات لتقدير الأزمنة المعروفة.
والتقنيات دي طبعاً تحتمل الصواب والخطأ، عشان كدة بيحصل دايماً تعديلات في الفترات دي لما بيكتشفوا حاجات جديدة.
ولكن إحنا كمسلمين عندنا قصص صحيحة ١٠٠٪ في الفترة دي ذكرها القرآن الكريم ومش محتاجين لا حفريات ولا دلائل عليها غير إنها من القرآن الكريم زي مثلاً إللي حصل مع سيدنا آدم عليه السلام وأولاده قابيل وهابيل. أو خلق الكون مثلاً.
الفترة دي كانت مع بداية اختراع الكتابة وظهرت فيها حضارات كبيرة زي الحضارة السومرية والحضارة المصرية القديمة والحضارة اليونانية والرومانية وغيرهم.
التسمية دي مربكة شوية وده لأن أول مهتسمع كلمة عصور وسطى هيجي في مخك عصور الظلام ومحاكم التفتيش … إلخ وده لأن التسمية دي كانت من وجهة نظر أوروبية نوعاً ما. الفترة دي كانت بعد سقوط الإمبراطورية الرومانية وأوروبا كانت في حالة تخبط تام.
ولكن على النقيض، في المنطقة العربية، ظهر أفضل ما ظهر على وجه الأرض وهي رسالة الإسلام و مولد سيدنا محمد صلى الله عليه وسلم.
فنقدر نقول بالنسبالنا إحنا كمسلمين إن العصور الوسطى دي شملت فترة نهضة الحضارة الإسلامية بكل جوانبها.
بعض الكتابات الأخرى بتعتبر العصر ده هو (بداية العصر الحديث). وتسمية عصر الاستكشاف جه بسبب ظهور كولومبس وانتشار رحلات البحار الاستكشافية وكمان تطور العلوم.
وأيضاً في الفترة دي ظهر ما يسمى بعصر النهضة (Renaissance) في أوروبا إللي شهد تطور كبير في الفنون والرسم والعلوم.
العصر ده شهد تغير العالم بشكل كبير.
العصر ده كان فيه حرب الاستقلال الأمريكية وتغير حكومات كتيرة وكمان شهد عصر الثورة الصناعية واستعمال البخار والقطارات وكمان الكهرباء إللي غيرت معيشة البشر على كوكب الأرض.
دي الفترة ما بين بداية من الحرب العالمية الأولى والثانية وسقوط العالم في براثن الحروب إلى أحلام البشر لاستعمار المريخ والدوران في الفضاء في وقتنا هذا.
أقسام علم التاريخ وطريقة دراسته
حسب التقسيم الزمني للتاريخ البشري، فزي منتوا شايفين تقسيم علم التاريخ مش حاجة سهلة نهائياً وبتختلف كمان من منطقة لمنطقة ومن مؤسسة أكاديمية لأخرى.
ولكن في خطوط عريضة هتلاقيها بنسبة كبيرة مشتركة بين دارسي العلم ده. الطلبة إللي بيدرسوا ويتخصصوا في التاريخ بيختاروا مجال أو أكتر لو كانوا متعلقين ببعض يتخصصوا فيه من عدة مجالات زي مثلاً:
- تاريخ العالم
- التاريخ القديم
- تاريخ آسيا
- تاريخ أمريكا
- تاريخ أوروبا
- تاريخ أفريقيا
- تاريخ أمريكا اللاتينية
- تاريخ روسيا وأوروبا الشرقية
وغيرها كتير.
وزي منتوا شايفين المجالات دي ممكن تبقى متواجدة في أكتر من حقبة زمنية. يعني مثلاً لو درست تاريخ آسيا فهتلاقي نفسك بتتكلم عليه من أول عصور ما قبل التاريخ وأنت طالع (حسب التقسيم الزمني إللي ذكرته فوق) وده بيخلي كمية الحاجات إللي محتاجة تدرس ضخمة جداً.
بعد كدة لما بيختار مجال محدد من المجالات دي بيبدأ يتخصص في موضوع فرعي أو أكتر جوة المجال ده. الموضوعات المختلفة إللي تعتبر أقسام مختلفة من علم التاريخ هي:
- الحدود والمساحات
- تاريخ العمل
- تاريخ العمالة
- تاريخ السياسة العامة
- التاريخ الثقافي
- التاريخ الرقمي
- التاريخ الاقتصادي
- تاريخ العِرق للإمبراطوريات
- تاريخ السكان الأصليين
- التاريخ الفكري
- التاريخ الدولي أو الدبلوماسي
- القومية والهويات السياسية
- التاريخ الشفوي والتاريخ العام
- التاريخ السياسي
- التاريخ الديني
- التاريخ الاجتماعي
فتخيل معايا واحد بيدرس تاريخ آسيا ولكن مركز أكتر على تاريخ العمالة في آسيا على مر العصور.
فالمجالات دي تعتبر بمثابة عينة ضخمة جداً محتاجة فحص، لكن الموضوع الفرعي بمثابة العدسة المكبرة إللي بتوجهها على العينة دي عشان تعرف تفاصيلها أكتر.
أحسن ٣ طرق تتعلم بيهم تاريخ من الـ (بورد الجيمز)
نيجي بقا للموضوع الرئيسي للمقال، وبعتذر عن المقدمة الطويلة، لكن كان لازم قبل متكلم عن إيه هي أحسن ٣ طرق ممكن تتعلم منهم تاريخ من خلال الـ (بورد جيمز)، هو إنك تفهم التاريخ ده متقسم إزاي وإيه علاقته ببعضه وطريقة دراسته عشان تقدر تفهم أنا عايز أقولك إيه في إللي جي.
الطريقة الأولى: دور على السنين
في لعب كتير جداً في الوصف بتاعها سواء في بداية كتاب القواعد، أو على ضهر العلبة، أو حتى بين الكلام وأنت بتلعب أو على الكروت هتلاقي ذكر لسنة أو فترة زمنية.
فمثلاً لو لقيت مكتوب سنة أو فترة زي دي (١٩١٤) أو مثلاً (١٩١٤ – ١٩١٨) فأول لما تلاقي حاجة من دول ممكن تعمل حاجة من الحاجات دي – لو عايز تبص بصة سريعة – :
- تمسك السنة دي تحديداً وتشوف إيه هي أهم الأحداث فيها.
- لو كانت فترة فبص إيه إللي حصل تحديداً في الفترة دي، إيه كانت بدايتها ونهايتها.
- مين أشهر شخصيات مؤثرين – سواء بالسلب أو الإيجاب – اتولدت في الفترة دي أو ماتت أو كانت عايشة وليها تأثير في الفترة دي.
لو اكتفيت بالتلت نقط دول هتعرف معلومات متفرقة كتير وده ممتاز. ولكن لو عايز تربط الأحداث ببعض وتكون الصورة الكاملة فأنصحك إنك تعمل الآتي:
- وسع دائرة البحث، بدل السنة دي أو الفترة الصغيرة حاول تخليها ٥٠ سنة أو ١٠٠ سنة.
- امسك قارة أو منطقة وشوف في الفترة دي حصل إيه بالظبط في المنطقة دي.
- حاول تعمل زي خط زمني (Timeline) لكل الأحداث دي مرتبة بالتواريخ.
- لو عايز توصل بقا لمرحلة التخصص أوي، امسك الأحداث دي وصنفها حسب طبيعتها. يعني مثلاً الأحداث الفنية لوحدها، الأحداث العسكرية، الأحداث الاجتماعية .. إلخ
- ممكن تعمل خط زمني لكل نوع لوحده وبكدة يبقى أنت عندك تصور عام عن طبيعة المرحلة دي في المنطقة إللي بتدرسها تحت كل موضوع.
الطريقة التانية: اقرأ ما بين السطور
أي لعبة هتلاقي فيها كلام ما بين السطور لو أخدت بالك منه هتطلع بجواهر.
هديك مثال:
في لعبة (The Prodigals Club) في حاجة من مكونات اللعبة اسمها Renaissance Man Tile. لو بحثت عن الكلمة دي فهتلاقي اللعبة بتشير لعصر النهضة (Renaissance) وده خلاني أروح أدور عليه أكتر وأفهم إيه طبيعته.
مش لازم الموضوع يبقى صريح عشان تعرف إن ده تاريخ. أنت محتاج تدور وتقرا عشان تقدر تربط المعلومات ببعض.
الطريقة التالتة: غير في أحداث التاريخ
دي بقا من الطرق إللي عايزة مزاج عشان تطبقها. تسمع عن حاجة اسمها التاريخ المغاير (Alternate History). ببساطة هي طريقة لتخيل شيء حدث أنه لم يحدث أو حاجة حصلت مكانه. ببساطة تاريخ بس على مزاجك يعني (Customized)
أمثلة توضح الفكرة دي:
- لو الحرب العالمية التانية لم تحدث، شكل العالم هيكون إيه دلوقتي؟
- لو هتلر قدر يغزو روسيا، كان إيه إللي هيحصل؟
- إيه إللي كان هيحصل لو كينيدي نجى من حادث الاغتيال؟
- إيه إللي كان ممكن يحصل لو مينا لم يستطع توحيد القطرين في مصر القديمة؟
- ماذا لو لم تغرق سفينة تيتانيك؟
وممكن تحط أمثلة هنا بدون نهاية.
الطريقة دي أولاً بتخليك تعرف التاريخ الأصلي إللي حصل، ثم بتبدأ تستفز ذهنك في إنك تفكر في النتائج المترتبة على التغيير إللي حصل في التاريخ ده وتبدأ تكتب تاريخك الذي لم يحدث.
أمثلة على ألعاب معتمدة على التاريخ في تصميمها
عدد الـ (بورد جيمز) المعتمدة على موضوعات تاريخية يكفي إنك تقعد تذاكر تاريخ سنوات وسنوات. وبالتالي أنا مش هقدر أحصر كل الألعاب.
ولكن دي شوية أمثلة بسيطة لأكتر من عصر من العصور إللي أنا ذكرتها فوق:
- لعبة Ankh: Gods of Egypt وده بتدور طبعاً في عصر الحضارات القديمة (Ancient History) حول حضارة مصر القديمة
- لعبة Lisboa بتتكلم عن حدث تاريخي هام حصل في سنة ١٧٥٥ ح.ع. (م.) يعني في بداية تقريباً عصر الثورات (Age of Revolutions) وهو عدة كوارث طبيعية حصلت في خلال أسبوع زلازل وتسونامي وحرائق دمرت مدينة لشبونة البرتغالية تماماً وخلقت خسائر في الأراوح تقريباً ٦٠٠٠٠ ألف إنسان!
- لعبة The Great Wall بتتكلم عن الحضارة الصينية، وغزو المونجول أو إللي بنقول عليهم (المغول) تحت راية جنكيز خان للصين وده حصل في فترة العصور الوسطى (Middle Ages)
- لعبة Architects of the West Kingdom بتحصل في الفترة ما بين ٨٠٠ ح.ع (م.) إلى ٨٥٠ ح.ع. (م.) في بداية العصور الوسطى (Middle Ages)، ودي كانت الفترة إللي حكمت فيها الإمبراطورية الكارولنجية وسط وغرب أوروبا.
- لعبة Tzolk’in: The Mayan Calendar واللعبة دي بتتكلم عن حضارة المايا في قارتي أمريكا وطبعاً إحنا هنا بنتكلم عن حضارات العالم القديم برضه.
رأي إجمالي
في النهاية، في رأيي المتواضع، من أفضل وأمتع العلوم إللي ممكن تتعلمها من الـ (بورد جيمز) هي التاريخ لو بصتله بوجهة نظر صحيحة وقدرت تربطه بالصورة الكبيرة للتاريخ البشري.
لو قدرت توصل كل النقط ببعض، هتقدر تشوف صورة تانية تماماً للعالم إللي إحنا عايشين فيه.
فلو بتحب التاريخ، ونفسك تتعلمه بطريقة جديدة وفيها تفاعل مع مجموعة من أصدقائك أو قرايبك أو حتى لوحدك لازم تجرب تتعلمه عن طريق الـ (بورد جيمز).
