لعبة Everdell – رحلتك بدأت لبناء وادي السحر

---

مقدمة

في العيد المئوي للحصاد السنوي، وحوالين المعلم (Poe) قعد الصغيرين كلهم في حلقة كبيرة، وكلهم مستنيين الحكاية إللي بيسمعوها كل عيد في نفس الوقت من غير زهق ولا ملل!

بصلهم (Poe) وبدأ يحكي ويقول:

من أكتر من 100 سنة، في بلد بعيدة اسمها (Gilden)، اتحد مجموعة من أبطالنا عشان يدافعوا عن نفسهم في أعظم حرب عرفتها مدينة (Gilden).

وبسبب قوة أعداءهم (الحيَّات المرعبة)، الحرب طولت،
وحل معاها الفقر والجوع. الأكل بقا قليل، والموت بقا أكتر منه مفيش!

وفي وسط كل ده، كان في فار صغير اسمه (Corrin Evertail). مات أبوه في الحرب، وأمه مقدرتش تستحمل الخبر وماتت بعده علاطول!

وفضل (Corrin) يتيم الأب والأم وشاف أهوال ومصاعب من غير عدد. وبسبب الأحوال القاسية دي، (Corrin) إرادته بقت زي الحديد.

اتعلم إزاي يتصرف وازاي يعيش وازاي يهرب من الموت!

وفي وسط كل ده، كان عنده حلم مبيغيبش أبداً عن خياله. أرض جديدة، مفيهاش حرب وقتل وجوع ومرض! أرض مليانة سلام وأحلام.

كان علاطول بيبص بعيد، بعيد أوي، ورا جبال (Spirecrest) العالية. وكان نفسه يعرف إيه ممكن يكون وراها؟!

يا ترى أرض الأحلام ممكن تبقى هناك؟

لغاية لما قرر إنه يتحرك هو وتلاتة من صحابه في رحلة مجهولة، خطيرة، ملهاش نهاية! ميمتلكوش فيها أي حاجة غير الأمل في بكرة!

9 شهور، من أصعب وأقسى الأيام إللي عدت عليه. في طريق مجهول ميعرفوش عنه أي حاجة!

وفي وسط كل المواقف الصعبة إللي قابلتهم، والطريق المجهول، والخطر إللي محدش يعرفه، أعز أصحابه يموت على إيده!

وكان خلاص، الأمل قرب ينتهي ويستسلموا للموت!

لكن من على أعلى قمة في جبال (Spirecrest) وبنظرة بعيدة زي عادته، شافوا أعظم مكان شافوه في حياتهم!

وادي كله سحر، مكان ماختلطش بحرب ولا بدم ولا جوع ولا مرض!

أخيراً، أرض الأحلام إللي كان طول عمره بيدور عليها!

وقف في وسطها، وبص حواليه في كل الوادي، لغاية لما لفت نظره نبتة صغيرة أوي بتحاول تطلع على صخرة جنبها!

بصلها (Corrin) ووشه عليه ابتسامة أمل. 

قعد جنبها، وحفر على الصخرة بحروف من أمل اسم الوادي الجديد. اسم أرض الأحلام Everdell!

ومن ساعتها النبتة الصغيرة فضلت تكبر وتكبر، لحد ما بقت الشجرة العظيمة إللي كلنا دلوقتي قاعدين تحتها وبتضلل علينا … شجرة Evertree!

في عالم Everdell الساحر إللي مر عليه (١٠٠) سنة وأكتر. في الفترة ما بين عام (٧٨) و (٧٩)، عدد الحيوانات إللي كانت عايشة في وادي السحر وصل لأكتر من (٥٠٠٠) لغاية لما اتملى وبقى صعب كل الحيوانات تعيش فيه.

وعشان كدة قررت مجموعة من السلاحف والفئران إنها تخرج برة Everdell وتبني مدن جديدة وتكتشف حاجات مختلفة.

ده تقريباً الوقت إللي بتحصل فيه لعبة Everdell.

هتاخد دور مجموعة من الحيوانات الصغيرة إللي خرجت من Everdell مع نهاية فصل الشتاء عشان تبني مدينة جديدة حوالين Everdell فيا ترى هتلحق تبني مدينتك، ويطلع عليها شمس الصيف قبل ميحل الشتاء من جديد؟!

بطاقة تعريف اللعبة

---

موضوع اللعبة (Theme)

لعبة Everdell هي واحدة من الألعاب إللي مبنية على فكرة الـ anthropomorphic. أو ببساطة فكرة إنه عالم خيالي مفيهوش بشر، وإن الحيوانات ليها إحساس ووعي زي البشر بالظبط.

بيتشغلوا نفس شغل البشر، بيتعلموا، ومتقدمين. ببساطة بشر في شكل حيوانات!

ودي مش أوي لعبة تعمل كدة طبعاً ولا أخر لعبة.  ولو مش متخيلها أوي، لو شفت فيلم كارتون اسمه Zootopia هتفهم قصدي كويس أوي!

وببساطة وقبل مدخل في التفاصيل، دي واحدة من أفضل الـ Themes إللي لعبتها حرفياً الفترة إللي فاتت في تصنيف الـ Fantasy أو الألعاب الخيالية!

ونخش في التفاصيل بقا. التصنيف بتاع الـ Fantasy ده شائك شويتين بالنسبالي وبالنسبة لناس كتير.

إنك تقرأ حاجة خيالية تماماً وتحاول إنه يبقى في بينك وبينها علاقة تواصل كدة وتعيشه بجد مش حاجة سهلة!

لأ وإنك تخلي الموضوع يوصل لمرحلة إنه يبقى Family game كمان دي مش حاجة سهلة إطلاقاً!

على مستوى العالم، مفيش غير لعبتين في نادي المائة (حسب BGG في وقت كتابة المراجعة دي) متصنفة Family and Fantasy:

1. Clank في التصنيف (٧٠)
2. The Isle of Cats في التصنيف (٩٥)

انضمت ليهم Everdell وحالياً هي محتلة المركز (٢٩) على مستوى العالم حسب التصنيف ده ومحتلة المركز الـ (٢) على مستوى الألعاب الموجهة للعائلات!!

إنك تعمل موضوع بيتكلم عن الـ Dragons والـ Aliens والـ Zombies والـ Dungeons وانتهاء العالم … إلخ. فده سهل أوي على فكرة وفي منه كتير والتصنيف ده مستهلك لما تقول يا بس.

لكن إنك تتكلم في الـ Fantasy وتعمل استهداف لشريحة الـ Family وتبقى من أول (٣٠) لعبة على العالم! فلأ ده مش سهل أبداً ويبان إنه عادي بس محدش عرف يعمله كتير (حسب الإحصاءات).

ليه تصنيف الـ Fantasy شائك بالنسبالي؟ لأن أنا بخاف أجيب حاجات من النوع ده معرفش ألعبها مع عيلتي مثلاً: بناتي، أو صحابي. لأنه مش كله أولاً بيعرف يتخيل! مش كله بيقدر يستجيب لفكرة إنه يعيش جوة الـ Theme ويتفاعل مع مفردات الأحداث، ودي حاجة مهمة جداً بالنسبالي.

بحكم لعبي للـ Video Games وكل لعبي تقريباً أو معظمها Fantasy فالبنسبالي ده قرار بديهي إني أجيب لعبة Board Game خيالية مش كدة؟

بس أنا في الـ Video Game ممكن ألعب بيها لوحدي مثلاً، لكن الـ Board games بيبقى صعب في كتير من الأحيان (إلا لو فيها Solo Mode أو Coop Mode فساعتها بجيبها عادي). فبالتالي بتَحَسس جداً لما بجيب لعبة في التصنيف ده.

إللي حصل مع Everdell، هو إن مصمم اللعبة قرر إنه يعمل حاجة Fantasy مناسبة للعائلات = انتشار ببساطة!

اختار أكتر حاجة Cute في الدنيا وكل العائلات والأطفال بتحبها (نوعاً ما) وهي الحيوانات! مين مبيحبش الحيوانات؟! وخصوصاً لو كانت Cute!

وألف قصة بسيطة جداً (على مدار 100 سنة 😄 )، واستعان بالرسومات إللي تخليك يا إما تكره اللعبة وتحسها تافهة! يا إما يدخلك في أجواء اللعبة كأنك عايش مع الحيوانات دي (وده إللي حصل حرفياً).

وبنى عليها بعد كدة كل الـ Expansions إللي نزلت للعبة لغاية دلوقتي (ممكن نعملهم مراجعة لوحدهم قريباً إن شاء الله).

وده تفسيري لحتة ليه عيلتي اتعلقت أكتر بـ Everdell مش Clank، لأنهم حسوا بالموضوع أكتر!

زي مقلتلكم ، حيوانات بتلبس لبسنا، وتشتغل شغلاناتنا، وتبني مبانينا، وتستكشف زينا، وبتلعب رياضة، فطبيعي جداً إنه يبقى في علاقة تواصل بين مخك وبين حاجة أنت فاهمها أو حاسسها!

مثلاً Clank كانت بتتكلم عن Dungeons و Dragons وهما عمرهم لا شافوا ده ولا ده. وبالتالي عايز واحد يتخيل أكتر ويندمج في التخيل ده عشان يستمتع!

في Everdell بناتي حسوا إنها شخصيات كرتونية من إللي بيشوفوها كتير وبالتالي التواصل بقا سهل جداً والتعلق بيها بقا أكتر!

أرجع تاني وأقولكم، إنك تعمل Fantasy game ويكون Family وينط لنادي الـ (٣٠) على مستوى العالم (حسب BGG في التوقيت ده) فدي حاجة صعبة أوي أوي بس حصلت.

وده في رأيي أحد أقوى أعمدة اللعبة الرئيسية، وهي الـ Theme إللي خلاها تبقى مشهورة أوي كدة وطبعاً مع الرسومات والمكونات زي مهنشوف كمان شوية.

---

قواعد اللعبة (Rules)

كتاب القواعد جميل جداً، ومليان صور كتير جداً. ألوانه رائعة جداً ومفرح ومناسب للـ Theme والـ Cuteness بتاعة الحيوانات 😀 وبسيط في نفس الوقت.

مش كبير لو شلنا منه الصور الكتير والـ Index ممكن يصفصف على (١٠) صفحات مثلاً أو أقل.

اللعبة قواعدها سهلة، وشرحها لأي حد ممكن يبقى في (٢٠) دقيقة في الأغلب.

صفحة اللعبة على BGG بتقول إن السن المحبذ (١٣) سنة، والـ Community بتقول (١٠)، وفي الحقيقة أنا بقول (٧) كمان أو (٨) على حسب قدرة الطفل على القراءة أو لو حد هيساعده في قراءة الكروت.

بس سيبك بقا من ده كله. الناس إللي بتحب تقرأ القصص بتاعة الألعاب (Backstory and Lore) إللي بتلعبها سواء بقا Board أو Video يجمعوا عندي هنا.

كتاب القواعد وأنت ماشي فيه، هتلاقي كدة على اليمين والشمال شوية قصاصات ورق مكتوب فيها لمحات عن عالم Everdell.

مثلاً، جواب مبعوت من زوج لزوجته (إللي هما أصلاً فار وفارة) بيتكلموا فيه عن حاجة حصلتلهم وعن سفرهم وبعدهم عن بعض!

هتلاقي وأنت ماشي، دكتور (قنفد) كتب روشتة لمريض وبيقوله ياخد دوا إيه بالظبط!

هتلاقي فاتورة واحد اشتراها من عم (Torrin) الأرنب إللي فاتح محل على ناصية الشارع، وفيها تفاصيل الفاتورة!

العبقرية هنا في رأيي، إنهم مكتبوش قصة Everdell في حتة كدة واحدة في كتاب القواعد. لأ! أنت عشان تعرفها محتاج تجمع كل القصاصات دي، وتبدأ تستنتج بنفسك!

كل كتب القواعد بتاعة كل الـ Expansions للعبة دي، ماشية بنفس الطريقة. في منهم واحد بيحكي أحداث حصلت على مدار 100 سنة جوة Everdell.

ولو لميت كل الكلام ده من كل كتب القواعد، هتعرف حصل إيه وبيحصل إيه في Everdell!

بجد من أكتر الكتب إللي استمتعت وأنا بقراها!

ولو حابب تتصفح كتاب القواعد، فتقدر تنزل كتاب القواعد من هنا

ولو أنت من النوع إللي بيحب يتفرج وميقراش أوي أو بيحب يتفرج ويقرا، اتفضل يا سيدي الفيديو ده أنصح بيه جداً:

---

طريقة وآليات اللعب (Gameplay & Game Mechanics)

في دورك بتعمل Action واحد بس من (٣) اختيارات:

• بتبعت Worker لمكان جوة Everdell وتاخد فوايده
• يا إما بتلعب كارت
• يا إما بتروح فصل جديد في السنة (من الشتاء للربيع مثلاً وهكذا)

اللعبة معتمدة اعتماد شبه كلي على (٤) أنواع من آليات اللعب (Game Mechanics):

1. Worker placement وده مباشر جداً مفيهوش أي فتي. بتروح مكان محدد وتنفذ إللي عليه. باستثناء إن في بعض الأماكن ينفع تروحها حتى لو عليها Worker قبل كدة وبعض الأماكن لأ.
2. Hand management وده إللي تقريباً هتقضي معظم الـ gameplay فيه. وهو بكل بساطة إنك بتحاول تبني أو تجيب حيوانات المدينة بتاعتك عن طريق الكروت إللي في إيدك وهتكلم عن الكروت كمان شوية ودي فيها شوية حاجات كدة هتكلم عليهم.
3. Card drafting ودي بتوفر للاعبين كروت مشتركة يقدروا كلهم يختاروا منها ويلعبوها في المدينة بتاعتهم وبالتالي بتقلل نسبة العشوائية بتاعة سحب الكروت بنسبة كبيرة.

خلونا نتكلم على شوية تفاصيل صغيرة كدة.

الكروت إللي في إيدك

من أمتع الحاجات إللي ممكن تحسها في اللعبة دي هي التفاعل بين الكروت وبعضها. زي معظم الـ Engine builders بس تحس إن في ارتباط أعمق بينك وبين المدينة إللي بتبنيها! والتفاعل بين الكروت مليان Thematic Actions بشكل رهيب.

الكروت بشكل عام عبارة عن نوعين:

1. مباني (هتبني مباني جوة المدينة بتاعتك)
2. حيوانات (هتعيش معاك في المدينة بسبب وجود المباني دي أو بأي سبب تاني)

من ضمن الكروت دي، مباني بتبنيها بيكون عليها مكان جديد. ممكن Worker من الـ Workers بتوع اللاعبين التانيين أو بتوعك يروحوا ويقفوا عليها وياخدوا الفايدة بتاعتها. ودي حاجة من الحاجات الرائعة في اللعبة دي.

الـ Theme هنا بتقول كمثال: إنك فاتح السياحة في المدينة بتاعتك للحيوانات من برة إنهم يشوفوا المدينة. ولما حد بيزورك، بيدفعلك Coins إللي هي الـ Victory points في الأخر! 😄 

الكروت المشتركة

كل لاعب أخره يبقى معاه (٨) كروت في إيده. وفي كمان (٨) كروت مشتركين بين كل اللاعبين بيبقوا على الـ Board أو حسب الـ Theme هما موجودين في المرج أو السهل (Meadow). يعني نقدر نقول إن كل لاعب معاه (١٦) كارت مش (٨).

الكروت المشتركة بتتعامل معامة الكروت إللي في إيدك بالظبط. مش بتشتريها وبعدين تلعبها، لأ ممكن تلعبها علاطول كأنها في إيدك.

ودي بالنسبالي حاجة مهمة جداً لأنها بتقلل فكرة العشوائية إللي بتيجي من سحب الكروت وبتديك فرص تانية وقرارات تانية متاحة للكل عشان العدالة.

المدينة بتاعتك

مدينتك ممكن تبني فيها أو يعيش فيها (١٥) مبنى وحيوان. أو بمعنى أخر أخرك (١٥) كارت. في استثناءات بسيطة جداً وبرضه كلها تحت مظلة الـ Theme.

مثال: في كارت بحبه أوي، اسمه Wanderer أو الرحالة. الكارت ده مبيعتبرش واحد من المدينة بتاعتك ومش بيتحسب من الـ (١٥). يعني كأن بقا عندك (١٦). ولما بيزور مدينة بيتحط برة كدة لأنه Wanderer = متجول ورحالة وملوش أهل يسألوا عليه يعيني 😄، واضح جداً 😄.

الـ Limit ده بتاع الـ (١٥) كارت، هو إللي مخلي للعبة كلها روح، لأنك بتبقى حريص جداً هتبني إيه، وهتعمل إيه حسب الخطة إللي أنت راسمها. أو حسب ال Score إللي قدامك. فبيقلل الاختيارات وبيخلي اختياراتك مهمة جداً جداً.

ومينفعش تحت أي ظرف من الظروف بعد لما تكمل الـ (١٥) كارت تشيل واحد وتحط واحد مكانه إلا لو معاك كارت بيقول كدة!

الشجرة

الشجرة المشهورة في اللعبة، ملهاش علاقة بالـ Gameplay من قريب أو من بعيد. وممكن تلعب من غيرها. هي بس شكلها حلو، وبتدي روح للعبة، وكمان بتنظم أماكن الكروت وحاجات تانية. ومرتبطة ارتباط وثيق بالـ Theme والقصة إللي حكيتها فوق في المقدمة.

الانتقال ما بين الفصول

واحد من القرارات إللي بتاخدها، إنك ممكن تنتقل من فصل الربيع للصيف أو من الصيف للخريف وهكذا. على حسب الفصل بتاخد مجموعة من الـ Actions بتحدد مسار المدينة بتاعتك بشكل كبير وعشان كدة ده قرار مهم جداً ولازم تاخده في وقت مناسب لمدينتك!

وقت اللعب كله ينتهي في حوالي سنة، بتبدأ في نهاية فصل الشتاء، وبتنتهي بانتهاء فصل الخريف مع أخر واحد من اللاعبين ميقدرش يعمل حاجة أو بيقرر إنه خلص كل حاجة.

ولو حابب تتفرج على طريقة اللعب ممكن تتفرج على الفيديو ده:

---

مكونات اللعبة والرسومات (Components & Art)

أنا هنا هتكلم عن نوعية المكونات، والرسومات، وجودتها، وعددها، ومدى ترابط المكونات والرسومات موضوع اللعبة، وما إلى ذلك.

١. المكونات (Components)

أنا لو قعدت أتكلم من هنا لبكرة الصبح على جودة اللعبة ومكوناتها من أول العلبة نفسها لأقل كارت فيها مش هخلص ومش هقدر أوفي حقها خصوصاً لو جبت الـ Collector’s Edition بتاعة اللعبة كمان ودي إللي أنا هتكلم عنها.

• الـ Resources جودتها عالية جداً.
• الـ Meeples في اللعبة دي رهيبة، لو أنت جايب الـ Collector’s edition فهيبقى فيها حوالي (١٥) نوع حيوان أو Meeple ممكن تلعب بيه. كل الـ Meeples معمولة على شكل حيوان مختلف.
• الـ Coins كلها Metal والكروت كجودة فوق الرائعة.
• الشجرة واحدة من أفضل المكونات الجمالية إللي شفتها الفترة إللي فاتت. أينعم هي ملهاش علاقة بالـ Gameplay وناس كتير مش حباها عشان السبب ده وعشان ممكن تكون بتاخد مساحة، بس كجودة رائعة وفي منها كمان إصدار خشبي وتنفع ديكور!

بالبلدي كدة، اللعبة تفتح النفس لما تشوفها وتبقى عايز تلعبها.

٢. الرسومات (Art)

الفنان الرئيسي إللي عمل الـ Art بتاع اللعبة دي هو Andrew Bosley وفي رأيي ٥٠% من نجاح اللعبة بسبب الرسومات إللي رسمها بشكل كبير.

اللعبة لما حد بيشوفها أو بيشوف حد بيلعبها بينبهر بيها ويبقى عايز يلعبها ويشوف إيه ده! مقدرش أقول إلا إني دي واحدة من أفضل (١٠) ألعاب بالنسبالي من ناحية الرسومات بلا منازع.

في ذكاء كمان في الـ Art وأنا ما أخدتش بالي منه، ولكن بنتي نبهتني ليه. في اللعبة بيبقى في مباني بيعيش فيها حيوانات معينة. لو بصيت على كارت المبنى وكارت الحيوان هتلاقيهم نفس الروح والألوان.

والمبنى مرسوم عليه في مكان ما لو دققت في الخلفية الحيوان إللي بيعيش فيه من ضمن الرسم إللي على الكارت.

العلبة بتاعة اللعبة نفسها، الحواف بتاعتها فيها حيوان ومبنى كل حيوان بيعيش في المبنى ده.

بجد الرسومات المستخدمة وطريقة توظيفها رائعة بكل المقاييس!

---

طرق اللعب المختلفة (Play Modes)

اللعب فيها طريقتين رئيسيتين للعب:

1. تلعب مع أكتر من لاعب بشكل تنافسي (Competitive Multiplayer)
2. وممكن لوحدك (Solo)

وزي منتوا عارفين أنا بقدر قوي اللعب إللي بتحط أكتر من طريقة لعب خصوصاً الـ (Solo) ولكن في اللعبة دي الـ (Solo) معجبنيش لأنه معتمد على زهر – وأنا مبلعبش لعب فيها زهر -. فيه عشوائية كبيرة جداً.

---

مصمم اللعبة

مصمم اللعبة James A. Wilson وحسب BGG هو عمل Everdell ولعبة تانية اسمها Flourish. وطبعاً لازم ناخد في الحسبان إن Everdell دي عالم متكامل وفيها ما قد يصل دلوقتي لـ (٥) إضافات (Expansions) وبالتالي الراجل كان منشغل جداً في اللعبة نفسها.

وبصراحة لو معملش غيرها فكدة تمام أوي بالنسبالي تشكر يا عم James! 😂

---

إيه إللي عجبني؟

• الـ Theme بلا منازع مع طريقة اللعب وتداخل الأفعال معاها، منسجم جداً بشكل فوق الرائع.
• وطبعاً الرسومات والمكونات إللي تخليك تبقى عايز تلعب حتى لو ملكش مزاج.

وأنا أكاد أجزم إن الاتنين دول لو مكانوش مظبوطين ومبني عليهم مكونات وأحداث اللعبة، اللعبة نفسها مكنش هيبقى ليها طعم ولا لون وهتبقى عادية جداً زي أي لعبة فيها نفس آليات اللعب (Game Mechanics).

---

إيه إللي معجبنيش؟

الموضوع صعب جداً إني أعرف ألاقي حاجة معجبتنيش في لعبة زي دي خصوصاً إني متحيزلها جداً. لكن أكيد مفيش حاجة كاملة.

في حاجتين معجبونيش ولكن مش أساسيين ومعتمدين أكتر على الزوق الشخصي لللاعب.

• هي المساحة إللي أنا بحتاجها عشان أعرف ألعب اللعبة دي. الـ (بورد) ومساحة لكل لاعب عشان يحط (١٥) كارت وكدة والشجرة – لأني بحب أحطها – فعلاً بتاخد مساحة كبيرة جداً! ده غير بقا لو قررت تلعب بأي إضافة (Expansion) كمان.
• الـ Solo Mode معجبنيش إطلاقاً. معتمد على زهر وفيه عشوائية كبيرة جداً.

---

تشتريها منين

الشركة نفسها إللي ناشرة اللعبة Starlings Games بتبيع اللعبة على أمازون بكل تفاصيلها وممكن تختار إنك تجيب الـ Collector’s Edition أو الـ Retail كمان.

طبعاً الأسعار دي مختلفة عن أسعار اللعبة لما نزلت على Kickstarter بس أنا برضه شايف إن اللعبة تستحق مع إنهم مغلينها شوية بصراحة.

---

رأي إجمالي

بالنسبالي وبعد كل إللي أنا قلته فوق ده، اللعبة دي حرفياً تحفة فنية (Masterpiece) بالتجربة بالموضوع بالرسومات بالمكونات على بعضها كدة شيء فوق الرائع.

أتمنى يكون التقييم يساعد حد فيكم على اتخاذ قرار بخصوص اللعبة دي، وإلى اللقاء في تقييم أخر.