لعبة Terraforming Mars – استعد لإنقاذ البشرية من الفناء

مقدمة

في خطوة هتغير تاريخ البشرية، خرج (يوكين) المتحدث الرسمي للحكومة العالمية سنة 2315م على التليفزيون بخطاب هام جداً لكل العالم:

بطاقة تعريف اللعبة

موضوع اللعبة (Theme)

موضوع إعمار المريخ، أو السفر في الفضاء للبحث عن مكان تاني، أو إن البشرية مشرفة على نهاية العالم وحافة الهاوية ولازم البشر يسيبوا الكوكب، كلها موضوعات اتعملت قبل كدة في حاجات كتير جداً من كتب لأفلام لكارتون لألعاب فيديو أو (بورد جيمز).

لكن دايماً إللي بيشدني لنفس الموضوع – مع إنه مش جديد نسبياً – هو طريقة معالجة الموضوع نفسه. وده إللي بيفرق من كتاب لكتاب أو من لعبة لعبة أو من فيلم لفيلم حتى لو بيتكلموا عن نفس الموضوع.

لعبة Terraforming Mars واحدة من اللعب دي، إللي تجبرك إنك تبقى عايز تجربها وتلعبها.

ارتباط الموضوع ببعض الحقائق العلمية

من ضمن اللمحات الرائعة إللي عجبتني في اللعبة، هي بعض النقط العلمية الدقيقة إللي مصمم اللعبة حاول يخليها واقعية بشكل كبير في اللعبة وإزاي قدر يربطها بالموضوع وبحبكة اللعبة (لما تعرف مين مصمم اللعبة هتفهم ليه ده موجود في اللعبة).

تعالوا نشوف أمثلة:

• في اللعبة هدفك إنك تعلي مستوى الأكسجين و نسبة المياه و درجات الحرارة على سطح الكوكب الأحمر، ولكن علمياً التلاتة مرتبطين ببعض. يعني ليه إحنا بنعرف نعيش على كوكب الأرض. لأن الغلاف الجوي بيحمي الأرض من أشعة الشمس الضارة وإللي بدوره بيعرف يعمل تنظيم لدرجات الحرارة، وكمان من خلاله بتتكون السحب إللي بعد كدة بتبقى عامل رئيسي للحفاظ على مستوى المياه على الكوكب إللي إحنا عايشين فيه.
• وأنت بتلعب Terraforming Mars هتحاول تعلي مستويات الأكسجين في الغلاف الجوي، لما هتوصل لنقطة معينة وهي 8% تقريباً، الغلاف الجوي هيبدأ يتغير بشكل يقدر يخليه يرفع درجات الحرارة ويخليها أكثر استقراراً. وده إللي بيحصل في اللعبة بالظبط، لما بتوصل ل 8% أكسجين بيبقى ليك زي Bonus Action إنك تقدر ترفع مستوى الحرارة.

ارتباط الكروت بموضوع اللعبة

بما إن اللعبة معتمدة بشكل رئيسي على الكروت. وده بيخلي معظم وقت يا إما بتبص في الكروت يا إما بتلعب كروت، فمعظم اللعب المعتمدة على الكروت إللي مرتبطة بموضوع معين، دايماً بيحطوا كتابات صغيرة على الكروت عشان تعيشك في جو اللعبة مبتأثرش على طريقة أو قواعد اللعب، والكتابات دي بنسميها Flavor text.

ودي من أفضل الحاجات إللي بحبها في اللعب إللي من النوعية دي. أنا بحب أقرا الحاجات دي جداً وبستمتع بإللي مكتوب لأنها بتدخلني في موضوع اللعبة وصلبها.

قواعد اللعبة (Rules)

اللعبة قواعدها العامة بسيطة وسهلة الاستيعاب. مع أول قعدة شرح هتلاقي الدنيا تمام بعد لما تخلص أول مرة لعب.

والقواعد كمان متلخصة في أربع كروت صغيرين (Player Aid / References) جوة اللعبة كمان وإللي في رأيي الأربع كروت دول أحسن من كتاب القواعد نفسه!!

أنا هتكلم هنا عن كتاب القواعد باستفاضة وحسرة نوعاً ما! 

كتاب القواعد بتاع اللعبة مستفز جداً، ويمكن كمان يصل لدرجة السيء بالنسبالي. في الحقيقة، أنا بقرأ كتب قواعد كتير جداً، حتى لو اللعبة نفسها مش عندي لأني بحب الموضوع ده، وأقدر أقولكم من كل إللي قرأته، ده واحد من أكتر الكتب المستفزة جداً إللي شفتها.

وده لأسباب رئيسية:

• الكتاب دايماً هتلاقيه وهو بيشرحلك حتة معينة، يذكر مصطلح عمرك مسمعت عنه ويقولك إنه لسة هيتكلم عنه في صفحة كذا وكذا. فتلاقيه دايماً يقولك (هتفهم الحتة دي في صفحة كذا) وعايز تشوف كذا في صفحة كذا. وده حرفياً متكرر في كل حتة في الكتاب بدرجة قمة في الاستفزاز. ولو أنت قررت تنط مع الكتاب في كل صفحة يقولك عليها، فأحب أقولك إنك هترمي اللعبة في الزبالة بسبب الكتاب ده من غير متاخد بالك إنك بترمي لعبة رائعة.
• الكتاب مليان كتابة، وصور توضيحية قليلة جداً. وده بيخلي الكتاب كل شوية يقولك روح بص على الصورة رقم كذا في صفحة كذا، وأنت أصلاً في صفحة تانية خالص! مع إنه كان ممكن يعمل كدة في نفس الصفحة. غالباً هو حاول يوفر في صفحات كتاب القواعد بس أدى لمشاكل عكسية.
• في حاجات في الكتاب من غير صور توضيحية أو من غير فيديو هتلاقي صعوبة رهيبة في أنك تفهمها من أول مرة. كمثال، الـ Solo mode وطريقة شرحه كانوا بالنسبالي سيئين جداً.

ببساطة الكتاب في رأيي سيء، ويحتاج لمراجعة تامة من ناحية التسلسل المنطقي للشرح. الكتاب ممكن يتشرح بطريقة أبسط وأسهل بكتير بالتدريج. ويخليك تفهم كل حاجة من غير متتنطط بين الصفحات نهائي.

• ولكن الحق يقال، أخر صفحتين في الكتاب فيهم دليل سريع للرموز الكتير جداً إللي اللعبة بتعتمد عليهم. وده دايماً حاجة كويسة.

ولو حابب تتصفح كتاب القواعد، فتقدر تنزل كتاب القواعد من هنا

ولو أنت من النوع إللي بيحب يتفرج وميقراش أوي أو بيحب يتفرج ويقرا، اتفضل يا سيدي الفيديو ده أنصح بيه جداً:

طريقة وآليات اللعب (Gameplay & Game Mechanics)

اللعبة ببساطة بتتقسم على rounds (في اللعبة اسمها Generations على أساس يعني إن إعمار المريخ هياخد أجيال وأجيال = واخد بالك من ارتباط اللعبة بالموضوع هنا، حتى في التفاصيل الصغيرة إللي زي دي رائعة).

كل round متقسمة أربع مراحل، أهمهم في رأيي مرحلة بتاخد فيها كروت عشان تلعبها بعد كدة
أنا ليه مهتم بالمرحلة دي بالذات، لأن أنا بعتبر إن دي أساس اللعبة.

الخطة وتنفيذها

أحب أتطرق في البداية – قبل مكمل كلام عن طريقة اللعب – للفرق بين وضع الخطة (Strategy) وتنفيذ الخطة (Tactics).

• الـ Strategy هو إنك تبقى حاطط خطة لنفسك بشكل عام هتكسب إزاي
• أما الـ Tactics هي إيه هي الخطوات بقا الصغيرة الكتير أوي إللي بيها هتحقق الـ Strategy بتاعتك

اللعبة دي كانت هتبقى Masterpiece حرفياً من ناحية طريقة اللعب لو كان فيها الجزئين دول، بس للأسف هي بتعتمد اعتماد كلي على الـ Tactics فخلوني أوضح أكتر.

المرحلة إللي بتاخد فيها الكروت، بتاخدها بشكل عشوائي تماماً، وبتقرر هتاخد مين من الكروت دي، وتسيب مين.

في النقطة دي بالتحديد أنت بتتفاعل مع الكروت إللي ظهرت ليك من غير ميكون عندك خطة مسبقة لأنه فعلاً مفيش لأنك متعرفش هيطلعلك إيه المرة الجية. أنت بيبقى نفسك تعمل خطة معينة لكن في الغالب مبيحصلش إلا لو الكروت إللي أنت عايزها معظمها طلعلك وده صعب شويتين لأن الكروت كتير جداً.

فأنت بتبدأ تاخد أحسن كروت ممكن تفيدك أو يمكن تفيدك قدام وبرضه مش أكيد. مجرد Tactic بحت. الكروت هي إللي بتقولك تقدر تعمل إيه مش أنت إللي بتحدد هتمشي إزاي لأ الكروت إللي بتمشيك.

في المرحلة دي بقا أنت بتبدأ تكون خطة على حسب المتاح فقط مش خطة مستقبلية، وعشان كدة اللعبة دي في رأيي Tactical game بنسبة 90%.

محدش يفهم كلامي إن ده وحش، خالص بالعكس أنا بستمتع وأنا بلعبها. بس دي نقطة فنية شوية لو حد حابب إنه يحط خطة ثم ينجح في تنفيذها. وفي لعب كتير عظيمة قائمة على نفس المبدأ.

آليات اللعب (mechanics) الرئيسية في اللعبة

1. Hand Management، زي مقلت فوق معتمدة بشكل كبير على الكروت وإنك إزاي تاخد كروت وإمتى تلعبها.
2. Tile Placement، المفروض إن في Board على شكل الكوكب هتلاقوها في الصور، وعليها أشكال سداسية (Hex) هي دي إللي بتحط عليها المحيطات والمدن والحقول وخلافه. على حسب إللي بتحطه أو بتبنيه على الكوكب ده بيأثر على المناخ بشكل عام.
3. Variable Player Power، اللذيذ في اللعبة دي إنها ممكن تبقى مفيهاش تماثل بين اللاعبين (Asymmetric) ولكن بشكل بسيط. كل لاعب بياخد في بداية اللعبة كارتين، كل كارت بيمثل شركة أو مؤسسة من إللي بيعمروا المريخ، وأنت بتختار واحد منهم. كل كارت عليه قدرات خاصة أو حاجات بتاخدها وباقي اللاعبين لأ. ده لو بتلعب بالطريقة المتقدمة. لكن لو لسة هتلعب اللعبة في البداية كل اللاعبين بيبقوا زي بعض أفضل لغاية ما اللاعبين يتعودوا على اللعبة.

العملة الرئيسية

ومقدرش أتكلم عن اللعبة دي وأنسى العملة الرئيسية في اللعبة. من أكتر الحاجات إللي عجبتني في اللعبة هي طريقة حساب الموارد (Resources) المختلفة إللي في اللعبة. وده بيحصل عن طريق المكعبات (الذهبية والفضية والبرونزية) إللي بتساوي (10 أو 5 أو 1) نقطة.

الطريقة في إبداع وبتساعد على القضاء على فكرة إن الموارد (Resources) تخلص من اللعبة ونضطر ندور على بديل من برة.

لو حابب تتفرج على طريقة اللعب ممكن تتفرج على الفيديو ده:

مكونات اللعبة والرسومات (Components & Art)

أنا هنا هتكلم عن نوعية المكونات، والرسومات، وجودتها، وعددها، ومدى ترابط المكونات والرسومات موضوع اللعبة، وما إلى ذلك.

١. المكونات (Components)

قولاً واحداً، مكوناتها سيئة جداً. تقدر تقول إنك جايب لعبة تم إنتاجها في ٢٠١٦ (وكانت نازلة بحوالي ٧٠ دولار كمان) ولكن بمكونات سنة ١٩٩٠ مثلاً! يعني مثلاً المكعبات المعدنية بتتقشر. الـ Player Boards مفيهاش تجويفات عشان تحتفظ بالقطع في مكانها وعلاطول القطع بتتلبخط. وفي ناس كانت شايفة إن الـ Tiles كمان مش حلوة ومحتاجة تتعمل 3D.

وده لا يمنع من لعبها إطلاقاً أو إنك تبقى مبسوط ومستمتع بيها وأنت بتلعبها، لأن معظم المكونات إللي أنت هتستخدمها ملهاش تأثير رهيب أوي في طريقة اللعب باستثناء الـ Player Boards.

ولأن اللعبة اتشهرت جداً، وناس كتير بتحبها لدرجة العشق في حتت كتيرة ومهووسيين بيها، ففي شركات كتير أنتجت مكونات تشتريها وتعمل Upgrade لمكونات اللعبة ومن ضمنهم ال Player Boards وفي ناس من محبي اللعبة كانوا بيستخدموا طابعات ثلاثية الأبعاد لانتاج Tiles أفضل.

 استمرت مشكلة المكونات السيئة دي على مدار التلت أو أربع سنين إللي فاتوا لغاية ما الشركة إللي أنتجت اللعبة قررت تنزل Upgrade لل Player board مع الـ Expansion الجديد بتاع اللعبة إللي اسمه Turmoil وأنا أعرف ناس كتير اشترته بس عشان ال board مش عشان ال Expansion خالص.

وبعد سنين من إنتاج اللعبة، الشركة قررت تنزل الـ Upgraded Components رسمياً من خلالها وعملت حل أفضل لتخزين اللعبة وكل منتاجتهم في مكان واحد ولكن طبعاً بفلوس تاني يمكن أكتر من اللعبة نفسها وكل الـ Expansions بتاعتها مثلاً.

٢. الرسومات (Art)

الرسام هو نفس مصمم اللعبة. في الحقيقة مش فاهم ليه هو مجابش حد متخصص أفضل. أنا شايف الرسومات متواضعة جداً والكروت والرسومات إللي عليها مش مشجعة لأن بحس إن أغلبها صور عشوائية عن الفضاء يا إما مش مرسومة خصيصاً للعبة بصراحة. باستثناء الـ Board شكلها لطيف.

طرق اللعب المختلفة (Play Modes)

اللعبة ممكن تتلعب يا إما:

• مع ناس عادي جداً بشكل تنافسي ( Multiplayer Competitive)
  • يا إما بتلعبها بالطريقة العادية وهي الكروت إللي بتطلعلك بتبقى هي دي الاختيار النهائي ليك وملكش دعوة بالكروت التانية إللي طلعت لبقية اللاعبين. ودي فيها اختيارك للكروت بيبقى أكثر عشوائية.
  • أو بتلعب بطريقة الـ (Drafting) وهي إن كل واحد بيختار كروت من المجموعة إللي بتطلعله ويدي الكروت المتبقية للاعب إللي جنبه وهكذا لغاية ما كل واحد ياخد عدد الكروت إللي المفروض ياخدها. بتقلل العشوائية ولكن هتطول وقت اللعب أكتر من الأول.
• لوحدك (Solo)

وسواء بتلعب لوحدك أو مع حد، ممكن تختار إنك تلعب بالكروت الإضافية إللي هتضيف حاجات متقدمة أكتر للعب أو تشيلهم من اللعب.

مصمم اللعبة

المصمم Jacob Fryxelius معاه دكتوراه في الكيمياء، ولما اكتشف حبه لشرح وتوضيح المواد العلمية للطلبة، فقرر يشتغل مدرس علوم.

الـ Board games بالنسباله كانت هواية لغاية لما أسس شركته هو وإخواته وعملوا أول لعبة ليهم كان اسمها Space Station – برضه في الفضاء – 😄 

وبعدها بخمس سنين أصدروا Terraforming Mars. وتعتبر دي أشهر لعبة هو عملها بلا منازع، وليها جمهور عريض بيلعبها وبيحبها ويدافع عنها. وليه كمان لعب تانية طبعاً بس أنا عمري ملعبتله حاجة غيرها.

إيه إللي عجبني؟

• إنك ممكن تلعب اللعبة دي كل مرة بشكل مختلف تماماً بسبب كمية الكروت (إللي هي بتمثل المشاريع إللي هتعملها على المريخ أو الأحداث إللي ممكن تحصل عليه).
• الـ Theme والكروت وإللي مكتوب عليها بيحسسك إنك بتعمل حاجة في المريخ فعلاً والـ Facts العلمية إللي بتتذكر في الكتاب بتاع القواعد أو وأنت بتلعب.
• الـ Engine building إللي بتحاول تبنيه ممتع بشكل عام حتى وإن كان عليه ملاحظات سلبية هتكلم عنها كمان شوية لكن هو ممتع بصراحة.
• تنوع الكروت. بصراحة الكروت كتير جداً وفيها تنوع كبير جداً للـ Actions ودي نقطة بتعلي جداً من احتمالية اللعب بشكل جديد كل مرة (Replayability)

إيه إللي معجبنيش؟

• وأنت بتلعب بتحاول تعلي نسبة التلت حاجات (مياه وأكسجين وحرارة) على الكوكب. فعلى حسب الكروت العشوائية إللي بتطلع بتحاول تبني Engine يساعدك إنك تحقق الهدف ده. وفي أحيان كتير بتلاقي نفسك بنيت Engine رائع عشان يزود الحرارة مثلاً (حاجة واحدة من التلاتة). لكن لما الحرارة بتوصل للدرجة القصوى، فساعتها الـ Engine بتاعك حرفياً مبقاش ليه أي لزمة بقية اللعب! وهتضطر تدور على كروت تانية عشان تعمل حاجات تانية ده لو طلعلك لأنها عشوائية. المشكلة إن ده ممكن يحصل في وقت خلاص بقى صعب تبني فيه أي Engine كويس وال Game قرب يخلص.
• جودة المكونات سيئة جداً، ولكن لو حابب تدفع فلوس زيادة وتحسن جودة المكونات بتاعة اللعبة فأنت ممكن تدفع تمن اللعبة مرتين واللعبة هتكلفك ما يزيد عن ٢٠٠ دولار بالمنظر ده. في نظري التمن ده ميناسبش اللعبة بأي حال من الأحوال.
• العشوائية إللي بتخليني في أحيان كتير مبعرفش أعمل إللي أنا عايز أعمله حتى لو بلعب بالـ Drafting variant بيخلي ال Game أبطأ بكتير وده في حد ذاته مشكلة تانية.

تشتريها منين

متوفر في أماكن كتير ومنها أمازون.سعرها بيتراوح من ٣٠ دولار ل ٧٠ مثلاً وعلى حسب العروض. وأنا رأيي الشخصي سعرها لو أكتر من ٣٥ دولار فده كتير عليها بحالة المكونات إللي فيها.

فلو عرفت تجيبها بأقل يبقى ممتاز في أوقات العروض لو كان متاح.

أنا لما بدفع فلوس في لعبة، بشتري فكرة اللعبة وقوة طريقة اللعب فتمام، بس كمان لازم أخد مقابل الفلوس إللي دفعتها حاجة تم إنتاجها بشكل متناسب مع السعر، وبكل شفافية الإنتاج أقل من السعر بمراحل وبزمن كمان!

رأي إجمالي

اللعبة رائعة من ناحية طريقة اللعب وفكرتها مع وجود بعض العيوب في رأيي الشخصي ولكنها عيوب فنية نوعاً ما وممكن متفرقش مع ناس كتير.

تستحق الشراء بلا جدال لو حبيت الـ Theme ولكن بالسعر المعقول المتناسب مع المنتج نفسه وجودته.
اللعبة بالنسبالي تستحق تفضل في المكتبة بتاعتك بشكل عام لأنها ممتعة. ولولا المكونات وإهمال الرسومات وكتاب القواعد كنت ممكن تقييمي يختلف.

أتمنى يكون التقييم يساعد حد فيكم على اتخاذ قرار بخصوص اللعبة دي، وإلى اللقاء في تقييم أخر.