لعبة Architects of the West Kingdom – أبهر الملك وعيد بناء المملكة

مقدمة

في الفترة من ٨٠٠م ل ٨٨٠م وفي بداية العصور الوسطى، حكمت الإمبراطورية الكارولنجية وسط وغرب أوروبا.
وسيطر على الحكم عائلة من النبلاء أسسها واحد اسمه تشارلز مارتل.

وتعتبر الإمبراطورية الكارولنجية هي أول خطوة في تأسيس إمبراطورية روما المقدسة. ولكن دائماً تأتي الرياح بما لا تشتهي السفن، ففي الفترة من ٨٤٠م إلى ٨٤٣م – يعني تلت سنين بس – حصلت حرب أهلية طاحنة بعد موت الإمبراطور، وللأسف الإمبراطورية اتقسمت إلى ممالك صغيرة مستقلة بذاتها بعد انتهاء الحرب وعمل معاهدة بين كل الأطراف.

وظهر ساعتها ما يسمى بـ West Francia أو The West Kingdom. وإللي كانت بعد كدة هي النواة الأولى لوجود فرنسا!

وكان لازم يبدأ عهد مملكة جديدة. عهد كله تطوير وبناء وتقدم!

عشان كدة قرر المهندسيين المعمارين الملكيين إنهم يبهروا ملكهم الجديد ويحافظوا على درجة قربهم من الملك عن طريق بناء مباني ومعالم مؤثرة في المملكة الجديدة لتغيير شكلها تماماً، وعشان تبقى أفضل مملكة ما بين كل الممالك المنفصلة.

في لعبة The Architects of the West Kingdom، هتبقى واحد من المهندسيين المعماريين دول. هدفك هو تطوير وبناء أفضل، وأحسن المباني، والمعالم. وتبقى أفضل مهندس معماري في المملكة الغربية قاطبةً.

• هتجمع مواد البناء المختلفة زي الخشب، والحجارة، والطوب، والذهب، والرخام، وتتعامل بالفضة إللي هي عملة المملكة الجديدة.
• هتشغل معاك ناس يساعدوك بمهارات مختلفة شريفة وساعات غير شريفة!
• وعينك هتبقى في وسط راسك على العمال بتوعك لأنه سهل جداً يضيعوا منك ويدخلوا السجن.
• بس متنساش أنت مش لوحدك، في مهندسيين بينافسوك ومش هيسيبوك تحقق أهدافك بالسهولة دي.
• هيتأمروا ضدك، وهيخطفوا عمالك، ويوهموا حراس الملك إنهم مجرمين عشان يحبسوهم في سجون الملك فيوقفوك ويعطلوك!
• يا ترى هتفضل محافظ على صفات النبلاء وتبني المملكة بشرف. ولا هتضطر تبقى زيهم وتتعامل معاهم زي ما بيتعاملوا معاك ومش بعيد تسرق أو تكدب أو تتاجر في السوق السودة عشان تحقق هدفك بأي شكل وبأي وسيلة!

بطاقة تعريف اللعبة

موضوع اللعبة (Theme)

الموضوع العام بتاع اللعبة لطيف، بس منقدرش نقول إنه عميق. فكرة الـ West Kingdom وإللي حصل تاريخياً لا يمت للعبة بصلة (الكلام إللي فوق ده أنا إللي بحثت عنه وقرأت فيه لمعرفة أبعاد القصة) وكل إللي مذكور عن الموضوع ده في اللعبة، هو فقط اسم الإمبراطورية ووقت حدوث اللعبة تقريباً.

لكن داخل اللعبة لا يوجد ذكر للكلام ده. محدش بيقول مثلاً إن المباني كانت بالشكل ده لأن ده كان الشكل على أيام الإمبراطورية، أو أي نوع أخر من الأمور متعلق بأحداث القصة الحقيقية.

لكن مش معنى كدة إن الأفعال (Actions) إللي بتعملها في اللعبة متقدرش تربطها بحاجة بتحصل في الحقيقة، إطلاقاً! على العكس تماماً، كل الأفعال في اللعبة مرتبطة بموضوع اللعبة بشكل مذهل.

هدي هنا مثالين:

• في اللعبة في أفعال ممكن تعملها تقلل من الوضع الأخلاقي بتاعك داخل اللعبة، ولو بقت سمعتك مطينة بطين، فالملك مش هيسمحلك إنك تحط طوبة في أعظم بناء المملكة دي بتحاول تخلصه عشان يبقى من أهم معالمها بعد كدة. في حين إن لو أنت عملت أفعال بتزود من الوضع الأخلاقي بتاعك وبقت سمعتك زي البرلنت في السوق، فده معناه إنك مينفعش بأخلاقياتك العالية ومبادئك دي تروح وتتاجر في السوق السودة مثلاً (عيب يا حمادة 😄).
• في مكان اسمه السوق السودة وتقدر ببساطة تروح تاخد حاجة من هناك أو تشتري حاجة بشكل مش قانوني. في وقت من الأوقات الملك بيعمل تفتيش مفاجيء، و(بتوع البلدية واخدلي بالك 👀) بيعملوا كبسة على السوق السودة وأي حد كان موجود هناك ساعتها بيشرف في السجن وبيلبس الأزرق يا معلم!

وفي أمثلة كتير جوة اللعبة نفسها تقدر تحكي عليها قصص بالنوعية دي. لكن ملهاش دعوة بالقصة التاريخية نفسها.

قواعد اللعبة (Rules)

قواعد اللعبة سلسة، وغير معقدة، ومباشرة جداً. مفيهاش لف ودوران.

كتاب القواعد حوالي 20 صفحة، وده لأنه تقريباً حجم الصفحة نص الـ A4 لأن صندوق اللعبة صغير. لكن لو فردناه على A4 الكتاب ممكن يعمل 10 صفحات وكمان مليان أمثلة للتوضيح. يعني تقدر تقول إن القواعد نفسها بسيطة.

مع أول مرة لعب أو تاني مرة تقريباً القواعد هتكون اتحفظت.

كتاب القواعد بشكل عام جودته وطباعته وطريقة كتابته وتسلسله حلو جداً. من أفضل الكتب إللي تتمنى تقراها لو بتتعلم لعبة جديدة.

ولو حابب تتصفح كتاب القواعد، فتقدر تنزل كتاب القواعد من هنا

ولو أنت من النوع إللي بيحب يتفرج وميقراش أوي أو بيحب يتفرج ويقرا، اتفضل يا سيدي الفيديو ده أنصح بيه جداً:

طريقة وآليات اللعب (Gameplay & Game Mechanics)

اللعبة فيها مجموعة من آليات اللعب (Mechanics) المحببة إلى قلبي شخصياً، وكمان فيها تعديلات (Twists) على الـ Mechanics دي، والتعديلات دي مخلية اللعبة دي مميزة ومختلفة عن لعب تانية من نفس الفئة (Genre)

1. أساس اللعبة Worker Placement لكن فيه Twist رائع، في الكتاب مسميه (Worker Investment) أو نقدر نقول الاستثمار في العمال بتوعك. كل أما تبعت Worker زيادة لمكان معين عشان تاخد Action ده بيزود القيمة المستفادة إللي بتاخدها من ال Action ده.
   
   مثال: يعني لو بعت واحد بس على الغابة هتاخد (١) خشب، ولو بعت بعد كدة واحد كمان مع الواحد الأولاني كدة هتاخد (٢) خشب. وفي أماكن تانية كل لما بتبعت أكتر ممكن تاخد أكتر من Action على حسب عدد ال Workers بتوعك هناك. بيبقى معاك حوالي 20 Worker وده إللي بيخلي ال Actions إللي هتاخدها مهم جداً تكون مخططلها.
2. فيها كمان Variable Player Power أو إللي ناس كتير بتسميها Asymmetric game. بمعنى، إن كل لاعب بيبقى معاه Player Board مرسوم عليها بعض القدرات الخاصة بيك أنت بس ومختلفة عن كل لاعب تاني. وبتستفيد بيها طول اللعبة، وده إللي بيخلي اللعبة مش متماثلة أو مش Symmetric.
   
   فمثلاً أنا ممكن يكون عندي قدرة إن لما أروح الغابة بدل ماخد (١) خشب أخد (٢) لكن باقي اللاعبين تاخد (١) بس. في المقابل في لاعب تاني في بداية اللعب بياخد (١٠) عملات فضة زيادة أكتر مننا كلنا. وهكذا.

بجانب ال Mechanics في اللعبة، في برضه حاجة عجبتني جداً وذكرتها فوق وهي فكرة الحفاظ على أخلاقك أو إنك تقلب مجرم عتيد الإجرام 😄. الفكرة إن مفيش واحدة فيها ميزة عن التانية، ده بقا إللي مخلي الموضوع جميل جداً.

مثلاً لو بقيت مجرم وأخلاقك هباب هتخسر حاجات أينعم ولكن في الحقيقة عشان أنت مجرم فأنت مش هتدفع ضرايب للمملكة (ابسط يا عم 😂 ) وبالتالي هتدفع عملات فضة أقل من بعض اللاعبين لما تيجي تاخد Action محتاج منك إنك تدفع ضرايب.

أما لو بقت أخلاقك فوق مستوى الشبهات وزي الجنيه الدهب في السوق، فساعتها هتاخد Victory Points في أخر اللعب تساعدك إنك تكسب أسرع!

فأنت إللي بتقرر. وأنا عارف إن في ناس كتير بتحب تاخد دور الشرير في الألعاب فالناس دي هتتبسط أوي.

لو حابب تتفرج على طريقة اللعب ممكن تتفرج على الفيديو ده:

مكونات اللعبة والرسومات (Components & Art)

أنا هنا هتكلم عن نوعية المكونات، والرسومات، وجودتها، وعددها، ومدى ترابط المكونات والرسومات موضوع اللعبة، وما إلى ذلك.

١. المكونات (Components)

المكونات بشكل عام عالية الجودة، شكل الموارد (Resources) زي الذهب، والخشب، والحجارة، والطوب زي الشكل الحقيقي وده بيديك شعور إنك بتلعب بحاجة حقيقية. الـ(بورد) شكلها ممتاز وألوانها رائعة وكذلك الكروت. معظم المكونات خشب باستثناء عملات الفضة إللي ممكن تشتريها منفصلة وتبقى معدنية لو تحب.

٢. الرسومات (Art)

اختيارات الرسومات والألوان في اللعبة خرافي ورائع وبيدي إحساس فريد من نوعه لما بتلعبها فتحية كبيرة للفنان Mihajlo Dimitrievski.

طرق اللعب المختلفة (Play Modes)

اللعبة ممكن تتلعب بطريقتين:

1. أكتر من لاعب بشكل تنافسي (Competitive Multiplayer)
2. ولوحدك (Solo)

وكمان ممكن تستعمل التعديل (Variant) إللي بيخلي اللعبة مش متماثلة (Asymmetric) وبيضيف بعد خططي جديد للعبة بشكل كبير.

مصمم اللعبة

في الحقيقة هما اتنين، Shem Phillips وS J Macdonald وتعاونوا مع بعض في كذا لعبة واخدة نفس الخط كمان. ونفس الموضوع زي Paladins of the West Kingdom و Viscounts of the West Kingdom وتقدر تقول الأجزاء بتكمل بعض من ناحية الموضوع وتسلسل الأحداث التاريخية بس من بعيد.

مقدرش أقول غير إني معجب بالمصمم بشكل عام، وأي لعبة بتنزل ليه ببص عليها وببقى عارف مسبقاً إنها هتبيع كتير لمجرد وجود اسمه عليها حتى لو الناس متعرفش اللعبة فيها إيه.

إيه إللي عجبني؟

• فكرة إنك ممكن تاخد فايدة أكبر لما تبعت Workers أكتر حلوة جداً.
• ترابط الواقع بفكرة اللعبة. يعني أخلاقك هتبقى كويسة هتتحط في حتة معينة، أخلاقك هتبقى مش كويسة هتعمل حاجات مش أخلاقية.
• الرسومات والمكونات رائعة وتفتح النفس على اللعب.

إيه إللي معجبنيش؟

والله أنا محتار أكتب إيه إللي معجبنيش بالظبط في اللعبة. أنا فعلاً مش قادر أحط إيدي على حاجة مضايقاني أوي أو حاجة مخلياني أقول إنها فيها عيب.

أكيد مفيش حاجة مفيهاش عيب، بس بالنسبة لزوقي الشخصي أنا شايفها حلوة جداً ومفيش فيها عيب واضح صريح مضايقني من اللعبة.

تشتريها منين

 موجودة على أمازون وبينزل عليها عروض كل فترة. أقل سعر وصلتله كان ٣٤ دولار تقريباً.

بس خلي بالك في بعض الصور موجود فيها بعض الحاجات إللي مش بتيجي مع اللعبة زي مثلاً الـ metal coins دي بتبقى Addons بفلوس منفصلة. فقبل متشتري اتأكد من كل المكونات بتاعة اللعبة وشكلها قبل متجيبها ولكن في حد علمي الاختلاف الوحيد هو ال metal coins ومش هيفرق في ال game play بأي شكل من الأشكال.

رأي إجمالي

اللعبة جميلة جداً، تشتريها وأنت متطمن إن أكيد حاجة هتعجبك لو كنت من محبي ال Euro games وخصوصاً ال Worker placement.

اللعبة فيها كذا فكرة وكذا Twist هما إللي بيميزوها عن أي واحد تانية وده إللي مديلها صدى وشهرة بشكل عام. وهي دي إللي بنت شهرة وسمعة كبيرة ل The West Kingdom Series بعد كدة.

في رأيي تستحق الشراء خصوصاً لو عليها عروض حلوة.

أتمنى يكون التقييم يساعد حد فيكم على اتخاذ قرار بخصوص اللعبة دي، وإلى اللقاء في تقييم أخر.