إيه الموقع ده؟

---

مقدمة

في فيلم كارتون أنتجته شركة Netflix اسمه The Mitchells vs. The Machines. في أحد مشاهد الفيلم في ولد صغير (غريب الأطوار 😂 زي مبيترجموها كدة) مهووس بالديناصورات. الولد ده كان نفسه يلاقي حد يتكلم معاه في اهتماماته، ويشاركه الهوس ده، ولكن مكنش في حد من عيلته عنده نفس الاهتمام.

فقرر إنه يمسك دليل التليفون ويكلم واحد واحد في التليفون ويسأله: تحب تتكلم معايا عن الديناصورات؟ 😁 وطبعاً الإجابة كانت معروفة. أسيبكم مع المشهد:

أهو أنا بقا الولد المهووس ده بس نفسي ألاقي حد أتكلم معاه عن الألعاب وتصميمها وإيه إللي ممكن نتعلمه منها (خصوصاً الـ Board Games) وعن كل ما يتعلق بالجانب ده.

فقررت بدل متكلم في التليفون وأزن على الناس (لأني مش لاقي دليل 😂) إني أعمل الموقع ده. وإللي هيدخل ويحب يقرا يبقى مهتم بنفس إللي أنا مهتم بيه. فساعتها ممكن نتكلم أكتر مع بعض من خلال مقالات الموقع أو أي وسيلة تواصل بشكل عام.

إيه الهدف من الموقع؟

أنا مقتنع إن أي لعبة بلعبها، إنها عبارة عن كتاب بس بتتفاعل معاه. حاجة كلها معلومات وتفاصيل بس مكتوبة بطريقة شيقة. وأي لعبة بيطلع منها فوايد كتير جداً زي الكتب بالظبط بس المهم تقدر تغوص في تفاصيلها وتعرف تقرا بين السطور.

وممكن جداً بسبب اللعبة دي تجيب كتاب تاني تقراه عشان تزود معلوماتك في موضوع شدك أو تتفرج على فيلم وثائقي وكمان مش بعيد تقرر تزور مكان متعلق بموضوع اللعبة. وده إللي بيخلي اللعب تجربة ترفيهية وتعليمية متكاملة في نظري الشخصي.

فالموقع ده هدفه الرئيسي هو إني أغوص في أعماق وتفاصيل اللعب إللي بلعبها، وأكتب عنها، وألخصها وأقيمها. وكمان أكتب عن الفوايد إللي استفدتها منها وإللي في أحيان كتير مش ممكن تخطر على بال حد.

إيه معنى الاسم واللوجو؟

في الأول احترت جداً في اسم الموقع ممكن يكون إيه ويعبر عن إيه؟ ولأن الموقع ده هدفه الرئيسي هو إني أغوص في أعماق وتفاصيل اللعب إللي بلعبها فقررت إني أسميه Board Game Deep (أو بورد جيمز بعمق) واخترت إن يكون شعاره عبارة عن نضارة غوص (بديهي 🧐 مش كدة؟)

ولو تلاحظوا في كلمة (بالعربي) ملحقة بالشعار. وده لأكتر من سبب:

1. لو قدرت ألاقي وقت وأكتب المقالات بتاعتي باللغتين عربي وإنجليزي
2. وكمان لأن كل وسائل التواصل الاجتماعي الخاصة بالموقع ممكن حد يدخل عليها مش بيتكلم باللغة العربية فأنا حاطتها للتوضيح مش أكتر
3. كنت عايز أوضح للقاريء العربي إن الموقع باللغة العربية من غير معرب الشعار نفسه لأن تعريبه مش حلو.

إيه هو شعار الموقع؟

شعار الموقع مش كاتبه غير بس جنب اسم الموقع في الـ Browser Title Bar ولكن مش مدمج مع الشعار (اللوجو) وهو Playing Redefined أو إعادة تعريف اللعب.

في الحقيقة أنا من خلال الموقع ده عايز أعيد تعريف وصياغة كلمة (اللعب). زي مبنستمتع باللعب وبنحب نلعب عشان نخرج من ضغوط الحياة في كمان فرصة نستفيد من إللي بنلعبه وننمى مهاراتنا بشكل عام.

فاللعب مش بس تضييع وقت زي مهو في أذهان كثير من الناس خصوصاً الآباء والأمهات. ولكن اللعب ممكن يكون متعة ووسيلة أكثر من رائعة للتعلم في نفس الوقت لو حابين ده.

إيه إللي ممكن تلاقيه على الموقع؟

الموقع هيبقى فيه مقالات مختلفة ولكن متنظمة في تصنيفات معينة. فأنا هشرح منهجيتي في كتابة المقالات هنا عشان لو حابب تتابعني فعلاً تبقى فاهم إيه إللي بيحصل.

الموضوع كله بيبدأ بلعبة، أول لما بلعب لعبة بيبدأ يحصل التسلسل المنطقي التالي بالنسبالي وإللي منه نشأت فكرة الموقع هنا.

طريقة أخرى لتنظيم المقالات

في طريقة تانية أنا بستخدمها في حياتي بشكل عام لما بستخدم برامج أخذ الملاحظات أو برامج الـ To Do Lists وهي استخدام الوسوم (Tags).

تحت كل مقالة بحط كلمات (Tags) متعلقة بالمقالة وبتضيفلها بعد أخر في التنظيم.

مثلاً، في مقالات ممكن تنتمي لأكتر من فئة وصعب جداً أعمل تصنيف لكل فئة. وكمان صعب أحط موضوع في أكتر من فئة لأسباب تقنية في الموقع. فبستخدم الوسوم (Tags) إللي بتبقى تحت كل مقالة عشان أحط أبعاد أخرى لتنظيم المقالات وسهولة البحث عنها.

مثال:

مقالة بتتكلم عن لعبة وعايز أصنف اللعبة دي إن فيها مثلاً آلية لعب معينة (Game Mechanic) زي مثلاً الـ Worker Placement. فبحط تحتها وسم (Tag) باسم الآلية دي.

مع إضافة مقالات تانية واستخدام نفس الوسم دي مرة تانية، ده بيعمل بعد تاني للتنظيم بتاع المقالات. فلو حد مثلاً ضغط على كلمة Worker Placement هيطلعله كل المقالات إللي تحتها الوسم ده علاطول.

كأنك لو عايز تدور على كل اللعب إللي فيها Worker Placement تقدر تستعمل فكرة الوسوم (Tags) للوصول ليها بسهولة.

حالياً دي كل الوسوم المستعملة في الموقع وبتزيد مع الوقت وجنب كل وسم عدد المقالات المرتبطة بيه كمان.

Action Points (1) Architects of the West Kingdom (2) Area Majority / Influence (1) Bias (1) Calico (1) Card Drafting (1) Chronicles of Crime (1) Contracts (1) Cooperative (1) Delayed Purchase (1) Drafting (3) Enclosure (1) End Game Bonuses (4) Everdell (1) Geography (2) Hand Management (4) Hexagon Grid (3) Highest-Lowest Scoring (1) History (1) Icaion (1) Income (3) Languages (2) Movement Points (1) Moving Multiple Units (1) Mysthea (1) On Mars (1) Pattern Building (1) Scenario / Mission / Campaign Game (2) Set Collection (3) Solo / Solitaire Game (6) Storytelling (1) Take That (1) Tech Trees / Tech Tracks (1) Terraforming Mars (1) The Great Wall (1) The Prodigals Club (3) Tile Placement (3) Turn Order: Claim Action (1) Turn Order: Progressive (1) Tzolk'in: The Mayan Calendar (2) Variable Phase Order (1) Variable Player Powers (2) Variable Set-up (1) Worker Placement (5)

طريقة تقسيم قوائم الموقع

طريقة تقسيم القوائم (Menus) في الموقع متوافقة مع نفس فكرة التصنيفات لسهولة الوصول.

هتلاقوا مكان توصلوا من خلاله للمراجعات كلها. وهتلاقوا مكان توصلوا منه لكل المعلومات الجديدة إللي بعرفها وبتعلمها من خلال الـ (بورد جيمز). وكمان هتلاقوا كل السلاسل المتفرقة إللي بكتبها ومتصنفة بتصنيفاتها الفرعية.

كمان هتلاقوا طريقة سريعة للاشتراك في القائمة البريدية لو حابب يوصلك كل حاجة جديدة ببعتها على الإيميل. وهتلاقوا كمان وسيلة توصلكم لكل وسائل التواصل الاجتماعي. ووسيلة للبحث السريع كمان.

هحاول دايماً أخلي القايمة مطابقة للطريقة إللي بحبذها لأي حد بيحاول يتابع كل جديد.

وسائل التواصل الاجتماعي

للموقع عدة وسائل للتواصل الاجتماعي مرتبطة بيه وباسمه موجودين في الـ Header والـ Footer للموقع. وممكن كمان تعرفوهم من هنا.

هيبقى دعم ممتاز لو وسائل التواصل دي بقا فيها متابعين لأن كل ما سيتم إرساله هنا هيتبعت على وسائل التواصل المختلفة دي ولكن بطرق مختلفة لإبراز المحتوى بشكل مختلف على حسب كل وسيلة تواصل.