لعبة Chronicles of Crime – حضرة المحقق، أنت مطلوب على وجه السرعة!

مقدمة

الساعة 3 صباحاً في أحد أحياء لندن …

بعد نص ساعة، من داخل الـ (هايد بارك) …

وبعد مرور ساعة، تم فحص مكان الجريمة…

في لعبة Chronicles of Crime، هتاخد دور المحقق كونان. آآآ … قصدي أحد المحققين في بعض الجرائم إللي بتحصل في لندن.

جرايم قتل، واختفاء، وسرقة، وانتحار، وغيره كتير.

مطلوب منك تستجوب الشهود والمشكوك في أمرهم، تفحص الأدلة وترفع البصمات، تفحص مسرح الجريمة والأماكن إللي بتشتبه إن فيها أدلة ممكن تساعدك في حل لغز القضية، تعرف المجرم، والدافع وفين سلاح الجريمة.

وعشان تعرف تحل لغز القضية، أحب أقدملك فريق البحث الجنائي إللي هيساعدك:

1. (إيريك) مسئول التكنولوجيا وخبير الاختراق يقدر يساعدك في فك شفرات أي جهاز، وتحليل بيانات الكاميرات أو أي جهاز إلكتروني معقد زي أجهزة الإنذار مثلاً.
2. (د. جيريمي) دكتور متخصص في علم التشريح الجنائي. يقدر يديك معلومات كافية عن الضحية أو أي جسم عايز تشرحه.
3. (هارفي) متخصص في علم النفس وعلم الجريمة، يقدر يحللك الشهود والناس إللي ممكن تشك فيهم حسب أفعالهم، ورغباتهم، والمعلومات إللي جمعتها عنهم.
4. (لو شين) واحدة من أفضل العلماء المتخصصين في تحليل الأدلة الجنائية ورفع البصمات. هتساعدك في التعرف على تصنيف الأدلة المختلفة إللي بتلاقيها في رحلتك لحل لغز القضية.

يا ترى هتعرف تحل لغز البنت المقتولة في الوقت المحدد بمساعدة الفريق بتاعك، ولا هتضيع وقتك في التحليل والفحص لغاية ما القاتل يعمل جرايم تانية في مدينة الضباب!

بطاقة تعريف اللعبة

موضوع اللعبة (Theme)

عادة الحاجة إللي فيها غموض بتشدني.

يعني تعالى نتكلم عن حاجة زي الكواكب وإيه إللي ممكن يكون عليها تلاقيني اتشديت ليها.

تعالى كلمني عن الحضارات القديمة زي الفراعنة مثلاً ونحاول نفكر في لغز الهرم تلاقيني اتشديت ليها.

تعالى قولي على قصة حصلت في وقت ما، وشوية معطيات ولغز كبير القصة بتدور حواليه وعايزني أحله، تلاقيني اتشديت ليها. وده إللي اللعبة دي عملته حرفياً.

بتعيشك تماماً في جو الجريمة إللي بتحاول تحلها. الأحداث وكلام الشخصيات معاك والأدلة إللي بتلاقيها. فتحس إنك في فيلم وإنك البطل إللي بيحاول يحل القضية حرفياً.

أقرب لفكرة الـ Video Game ولأني Video Gamer فالموضوع ده خلاني كمان أتشد أكتر وأكتر للعبة.

من أمتع اللعب إللي لعبتها من ناحية الـ Theme وكيفية توظيفها في اللعب. وعشان كدة دي واحدة من اللعب إللي مش ناوي أفوت ليها أي أجزاء جديدة أو Expansions ما دامت معتمدة على نفس عنصر التشويق ونفس آليات اللعب (Mechanics) إللي هتكلم عنها كمان شوية.

قواعد اللعبة (Rules)

لو قلتلك إن اللعبة دي مفيهاش قواعد فأكيد مش هتصدقني. بس خليني أوضحلك.

اللعبة المحرك الرئيسي بتاعها برنامج على الموبايل الشركة (Lucky Duck Games) إللي أنتجت اللعبة هي إللي بتديره.

والقواعد ببساطة هي إنك بتستعمل البرنامج ده طول فترة اللعب مع المكونات إللي جوة صندوق اللعبة (الكروت).

هو Action واحد بس إللي مطلوب منك تعمله من خلال البرنامج هو إنك تعمل Scan للكارت أو الحاجة إللي عايز تتفاعل معاها، وبقية التفاصيل البرنامج هو إللي بيعملها.

هشرح طريقة اللعب بشيء من التفصيل في الجزء إللي جي، بس أنا حبيت أوضح إن القواعد بسيطة لدرجة إنعدامها بالنسبالي.

وده بيخليها في رأيي من أفضل اللعب إللي ممكن نعتبرها مدخل كويس (Gateway) لحد مبيلعبش (Board Games) أصلاً أو لسة جديد على الهواية أو حتى ممكن تتلعب مع الكبار والصغيرين بدون ميبقى في قعدات تعليم مسبقة زي معظم اللعب.

كتاب القواعد يكاد يكون منعدم الصفحات .. حوالي (٦) أو (٧) صفحات ممكن يتلخصوا في صفحتين بالكتير. معظمه صور كبيرة.

ولو حابب تتصفح كتاب القواعد، فتقدر تنزل كتاب القواعد من هنا

ولو أنت من النوع إللي بيحب يتفرج وميقراش أوي أو بيحب يتفرج ويقرا، اتفضل يا سيدي الفيديو ده أنصح بيه جداً:

طريقة وآليات اللعب (Gameplay & Game Mechanics)

زي مقلت إن اللعبة المحرك الرئيسي بتاعها برنامج على الموبايل الشركة إللي أنتجت اللعبة هي إللي بتديره ولكن بيستخدم إزاي؟

كل كروت اللعبة عليها QR Code وباستخدام البرنامج تقدر تعمل Scan لأي كارت من دول، والبرنامج هيتفاعل معاك على حسب أنت عملت Scan لإيه. وفي أنه مرحلة تحديداً وساعات كمان التوقيت بيفرق في الـ Score النهائي.

طريقة اللعب ببساطة كالآتي:

1. هي إنك بتفتح البرنامج وتختار الجريمة إللي هتحاول تحلها (اللعبة بيجي معاها أكتر من جريمة)
2. حابب تروح مكان معين، بتعمل Scan للـ QR Code بتاع المكان إللي عايز تروحه
3. عايز تكلم شخصية معينة، بتعمل Scan للـ QR Code بتاع الشخصية دي
4. قررت تسأل شخصية مثلاً عن دليل أو عن مكان أو عن شخصية تانية في اللعبة، بعد لما تعمل Scan للشخصية عشان تبدأ معاه كلام، تروح تعمل Scan لأي كارت تاني والشخصية هتتفاعل معاك على حسب أنت بتسأله على إيه

اللعبة دي تعتبر من الـ Deduction Games، وده نوع من اللعب بيطلب من اللاعبين إنهم يكونوا استنتاجات من معطيات اللعبة بتديهالهم، وبناءً على الاستنتاجات دي بيبدأ اللاعبين يشيلوا الاحتمالات إللي متنفعش ويسيبوا الاحتمالات إللي تنفع لغاية ميتم الوصول لإلي مطلوب منك كلاعب.

الواقع الافتراضي (Virtual Reality)

كمان في جزء مهم جداً في اللعبة وهو الـ Virtual Reality. في أثناء اللعب، احتمال تروح مكان (إللي هو حصل فيه الجريمة مثلاً) ومحتاج تدور فيه على أدلة تساعدك.

البرنامج بيظهرلك مسرح الجريمة (مثلاً أوضة) على الشاشة. وبيديك إمكانية إنك تقدر تلف فيها 3D إما باستخدام إيدك عادي، أو إنك تتحرك بالموبايل نفسه، أو كمان باستعمال نضارة ممكن تطلبها لوحدها مع اللعبة بتكلفة إضافية.

الحتة دي هي أفضل جزئية بناتي بيحبوا يلعبوها في اللعبة كلها، لأنها بتحسسهم حرفياً إنهم جوة اللعبة.

ولو حابب تتفرج على طريقة اللعب ممكن تتفرج على الفيديو ده:

مكونات اللعبة والرسومات (Components & Art)

أنا هنا هتكلم عن نوعية المكونات، والرسومات، وجودتها، وعددها، ومدى ترابط المكونات والرسومات موضوع اللعبة، وما إلى ذلك.

١. المكونات (Components)

مكونات اللعبة بسيطة جداً، كلها كروت عليها QR Code. ولو هتجيب النضارة فده كمان يعتبر واحد من مكونات اللعبة إللي ممكن تستعملها بس أنا مجبتهاش ومقدرش أقيمها ولا أقيم جودتها.

ومن ضمن مكونات اللعبة طبعاً البرنامج نفسه لأنه من غيره متقدرش تلعب اللعبة.البرنامج سهل الاستخدام لكن ساعات كدة بيهنج معايا وبضطر أقفله وأفتحه من الأول. ولو عايز تبطل لعب وتكمل في وقت تاني فالبرنامج بيحتفظ بالمكان إللي وقفت فيه في الجريمة وتقدر تكمل من مكان مبدأت.

بس خلي بالك لازم تصور ساعتها الكروت إللي طلعتها والأماكن إللي زرتها عشان لو حبيت تكمل ال Scenario من مكان موقفت.

٢. الرسومات (Art)

في مجموعة من الرسامين تعاونوا في اللعبة دي، ومعظمهم يبدو إنه شغال في Lucky Duck Games، لأن معظم أعمالهم في ألعاب متعلقة بالشركة.

الـ Art بتاع الكروت حلو جداً، والشخصيات وطريقة رسمها ممكن يخدعك في إن الشخص ده شكله مجرم، أو إن الشخص ده شكل (كيوت) ويطلع هو القاتل أصلاً.

طرق اللعب المختلفة (Play Modes)

اللعبة ممكن تتلعب بطريقتين:

1. لوحدك (Solo)
2. مع ناس تانية (Co-op)

ولكن سواء اخترت تلعب كدة أو كدة، فطريقة اللعب واحدة ومفيش اختلاف في أي قاعدة من قواعد اللعبة وده شيء عادة بيبقى ممتاز لو المصممين عرفوا يعملوه.

في لعب كتير قواعدها بتتغير مع اختلاف عدد اللاعبين، إما لظروف إعادة توازن اللعبة (Balancing)، أو لظروف تبسيط القواعد مثلاً أو تقليل وقت اللعب على حسب اللاعبين. لكن اللعبة دي مش منهم.

مصمم اللعبة

المصمم David Cicurel تقريباً متخصص في اللعبة دي فقط هي وأجزاءها الجديدة إللي نزلت بالفعل. وأظنه كمان ساهم في عمل لعبة تانية صغيرة كدة. وفوق ده كمان ساهم في رسومات (Art) بتاعة اللعبة.

لكن في الحقيقة أنا حابب أتكلم أكتر عن الشركة نفسها Lucky Duck Games. في رأيي واحدة من أفضل الشركات إللي بتعرف تعمل ألعاب تخليك تلعب بيها وقت طويل. ومن أكتر الشركات إللي لما بينزلوا لعبة جديدة بكون مهتم جداً إني أعرفها وأجيبها لو عجبتني.

إيه إللي عجبني؟

أكتر حاجة عجبتني هي طريقة اللعبة إللي أنا شرحتها دي، أو نقدر نقول الـ (System) ده إللي بتتفاعل فيه ما بين البرنامج وما بين المكونات الملموسة (Physical) بتاعة اللعبة.

معدل إعادة اللعب (Replayability)

النظام ده فتح الباب لإن اللعبة دي يفضل ينزلها جرائم تانية (Scenarios) من الشركة من غير متحتاج تشتري مكونات جديدة وده شيء عظيم من ناحية التكلفة ومن ناحية إعادة اللعب (Replayability).

باستعمال نفس الكروت والشخصيات والأماكن أقدر أألف قصة جديدة وجريمة جديدة وأخلي البرنامج يتفاعل معاهم بشكل مختلف. شيء رائع!

وبالفعل بعد إصدار اللعبة بفترة، الشركة نزلت أكتر من جريمة تانية في البرنامج يقدر اللاعب إنه يشتري الجريمة الواحدة مثلاً بحوال 5 دولار ويعملها Download ويلعبها.

النظام قابل للزيادة (Extensible)

بس بسبب قوة النظام ده، الشركة نفسها أصدرت برنامج سمته (Community Editor) من خلاله أي حد مهتم يقدر يألف قصص وجرايم تانية وينزلها لأي حد مجاناً، ويقدر يفتحها عن طريق البرنامج ويلعب كأنه لسة جايب لعبة جديدة!

ودي أكتر حاجة عجباني جداً في نظام اللعبة إنه Extensible أو قابل للزيادة، وإنك ممكن تفضل تلعب باللعبة دي علاطول طول ما في سيناريوهات جديدة الشركة بتعملها أو حد من المهتمين باللعبة بيعملوها وأنت نفسك ممكن تعمل عليها كمان سيناريو خصوصاً لو كنت مبرمج زيي هيستهويك الموضوع جداً.

أنا لعبت بالفعل أكتر من جريمة معمولين من محبي اللعبة، وكانوا في منتهى الروعة والحبكة.

إيه إللي معجبنيش؟

أكتر حاجة معجبتنيش إني لو خلصت سيناريو معين وعرفت لغز الجريمة دي، خلاص مبقدرش ألعبه تاني لأني عرفت حله (اتحرق بالنسبالي).

مع إنك لو لعبته تاني، ممكن تلاقي طريق مختلف تعرف بيها القاتل ويبانلك أحداث تانية أو شخصيات تانية خالص مكنتش تعرف عنها حاجة!

بس برضه – يمكن دي حاجة خاصة بيا أنا – لما القصة بتتحرق خلاص مبكونش شايف أي هدف إني أقرا القصة تاني مثلاً. إلا في حاجات نادرة جداً زي لما واحد بيبقى عايز يشوف فيلم تاني بس هو حافظه، ولا عايز يلعب لعبة تاني مع إنه لعبها قبل كدة على الكمبيوتر، أو يقرأ كتاب تاني مثلاً من شدة حلاوته.

بس بالنسبالي مقدرتش مثلاً ألعب سيناريو تاني وأنا عارف المجرم مين لأن أصلاً هدف اللعبة إنك تعرف القاتل أو المجرم وأنا عرفته! إلا لو حابب تعلي النقط بتاعتك إللي بتاخدها بعد كل جريمة لو قدرت تحلها في وقت أقل مثلاً.

تشتريها منين

اللعبة موجودة على أمازون حالياً ومواقع تانية كتير، وساعات بينزل عليها عروض وممكن تنزل ل 20 دولار.
لو مش مستعجل على إنك تجيبها، استنى لما ينزل عليها عرض وجيبها.

رأي إجمالي

في رأيي دي واحدة من أفضل الألعاب إللي قدرت تعمل الخليط الرائع ده بين الـ Physical world و الـ Digital ودي أكتر حاجة عجباني في اللعبة بشدة.

لو هتكلم عن على نظام اللعبة، وطريقة المصمم في الربط بين العناصر المختلفة بين العالمين الـ Physical و الـ Digital، وفكرة إنك ممكن تعمل سيناريوهات تانية أو تنزل سيناريوهات تانية وتلعب علاطول بنفس مكونات اللعبة، فأنا لازم أقول إنه في رأيي النظام ده يعتبر Masterpiece وممكن يفتح مجالات تانية للعب تانية كتير إنها تستغل نفس الـ Mechanic وتطور عليه.

أنا برشح اللعبة دي جداً لمحبي القصص، والغموض، والإثارة، وحل الألغاز، والـ Deduction games بشكل عام.

أتمنى يكون التقييم يساعد حد فيكم على اتخاذ قرار بخصوص اللعبة دي، وإلى اللقاء في تقييم أخر.