أنا مين؟

أهلاً أهلاً بحضرتك!

بما إنك فتحت الصفحة دي وحابب تعرف أنا مين؟ (وبصراحة مش عارف ليه بس كلك زوق والله 😁) فقبل مقولك أنا مين، فلازم الأول أقولك ليه المفروض تعرف أنا مين؟

بص يا سيدي، لما تعرف أنا مين ده هيفيدك في تلت حاجات رئيسية:

– هتقدر تحكم على كتاباتي بمنظور مختلف. هل أنا بكتب أي كلام؟ قاري؟ فاهم؟ ولا إيه حكايتي بالظبط؟!

– هيبقى في تواصل منطقي بيني وبينك وأنا بكتب. لأن المفروض هتبقى عارفني أكتر ولو نظرياً.

– هتقرر إذا كنت هتكمل قراية بعد الرغي إللي أنا عمال أرغيه فوق ده كله ولا لأ.

فقبل متقفل الموقع، وتقفل جهازك شخصياً، وترميه من سابع دور، هلحقك وأقولك أنا مين (أنا لما صدقت حد جه هنا 😁)

أنا اسمي أحمد عبد المنعم، مهندس مصري عربي مسلم ومتخصص في مجال الحاسبات والبرمجيات (يعني اختصاراً مبرمج). وبقالي حالياً في المجال ده (حسب وقت محادثتنا دي) حوالي ١٦ سنة.

والله سؤال جميل. بص يا سيدي بقا عشان ده عايز قعدة.

الموضوع بدأ معايا بالأتاري. عارفه؟ إللي هو أبو زرار أحمر وعصاية في النص ده.

وأنا عندي (٣) أو (٤) سنين كدة والدي جبهولي. وكنت علاطول بلعب بيه لدرجة إني كنت بغلب كل قرايبنا فيه كبير وصغير. وتطور الموضوع شوية شوية ودخلنا في الـ (فاميلي جيم) وواحدة واحدة بقا عندي كمبيوتر.

الكمبيوتر ده بقا أنا كنت ببوظه كل أسبوع حرفياً، لأني كنت بفضل ألعب في ملفات الـ (ويندوز) لغاية لما أبوظه. لكن للأسف مكنتش بعرف أصلحه بقا، فكان والدي يروح يصلحه ويجيبه أبوظه تاني 😁.

فببساطة أنا كنت بعشق كل ما يتعلق بالأجهزة الإلكترونية وتطور بعد كدة بقا إني كنت عايز أعرف بيشتغلوا إزاي من جوة. وده إللي خلاني أبقى مهتم جداً إني أبقى مبرمج.

بعد ١٦ سنة في المجال ده، أقدر أقول إن أكتر حاجة استفدتها هي إني بحب أدور في التفاصيل وما وراء التفاصيل في المواضيع إللي بتهمني. بحب أفهم ليه اتعملت وعشان إيه ولو اتشالت كان ممكن يحصل إيه مثلاً.

لو بقرأ كتاب مثلاً، وذكر مكان معين، أو ذكر اسم أكلة معينة، مبعديهاش وبعد لما بخلص برجع أدور على المكان ده وأشوف حاجات أكتر عنه زي صور أو أفلام وثائقية مثلاً. وممكن لو أكلة أدور عليها وأكلها. وفي ساعات كتب ممكن تخليني أقرأ كتب تانية.

الخلاصة أنا بحب أعيش التجربة كاملة لما بعمل حاجة بحبها أحب أشوف التفاصيل وأتعلم منها حاجة جديدة.

أنت جيت هنا لمربط الفرس. أنا أهم هواياتي إني بحب ألعب يا إما (فيديو جيمز – Video Games) أو (بورد جيمز – Board Games).

وبنفس منطق التفاصيل، أنا بعتبر كل لعبة بلعبها كتاب. وكل كتاب ليه تفاصيل بين السطور. وكذلك اللعب.

فالموقع ده، أنا بنيته بالأساس عشان أتكلم فيه عن تفاصيل التفاصيل إللي تخص اللعب، أساسيات تصميم الألعاب، أراجع لعب معينة، وأسجل ملاحظاتي والحاجات إللي اتعلمتها من اللعب إللي بلعبها. من الأخر بغوص في أعماق اللعبة وبحاول أطلع منها كل الفوايد الممكنة على حسب قدرتي.

تفاصيل الموقع وإزاي متقسم وإزاي ممكن تستفيد منه بشكل أكبر هتلاقيها في الصفحة دي (إيه الموقع ده؟)