لعبة Tzolk’in: The Mayan Calendar – اكتشف أسرار حضارة المايا

مقدمة

في الفترة ما بين ٢٠٠٠ ق.م. إلى ٢٥٠م تأسست حضارة في منطقة وسط أمريكا، اسمها حضارة المايا. واحدة من الحضارات إللي مليانة ألغاز زي حضارة الفراعنة كدة.

بداية من تقدمهم الرهيب في علم الفلك، والرياضيات، واختراعهم تقويم المايا في وقت يكاد يستحيل على حد يعرف المعلومات إللي عرفوها دي خصوصاً في الفلك.

مروراً باكتشاف مجسمات ذهبية تشبه الطائرات الحديثة إللي بنركبها اليومين دول!

وانتهاءً بلغز انهيار حضارة – فجأة كدة – دامت 3000 سنة.

وإلى الآن محدش يعرف ليه على وجه اليقين. وفوق ده كله تنبؤهم بنهاية العالم ديسمبر 2012 إللي كان مبني على دراسات دقيقة جداً في علم الفلك وافتراضات غريبة في معتقداتهم، وكمان خلى ناس عايشين بعدهم بألاف السنين وعندهم كل وسائل التكنولوجيا والتقدم والعلم يصدقوا الخرافات دي بل ويعتقدوا فيها جداً.

بس في لغز أكبر، وهو طريقة بناءهم للأهرامات! هل يا ترى تشابه المعمار بتاعهم في بناء الأهرامات إللي تشبه أهرامات الفراعنة ليه أي علاقة بتواصل الحضارتين من قريب أو من بعيد؟! خصوصاً بعد اكتشاف صور جدارية فرعونية لطائرات – برضه-!

كل الألغاز دي، والغموض ده، وأحياناً الانبهار ده كله كوم وإللي عمله مصممي لعبة Tzolk’in: The Mayan Calendar كوم تاني خالص زي مهنشوف كمان شوية.

دورك في اللعبة هيكون واحد من القبائل إللي كانت عايشة في حضارة المايا، وكل قبيلة بتتسابق مين هتطور نفسها في أكتر من مجال زي الزراعة والعمارة واستخراج المعادن وغيرها.

يا ترى هتعرف تزور كام مدينة؟ وهتبني كام مبنى؟ وهتعرف تأكل قبيلتك وتأمنلهم مصادر للأكل؟ ولا هتشحت وقبيلتك متبقاش لاقية تاكل؟! (أه والله بجد ممكن تشحت في اللعبة بس متزعلش من إللي هيحصل 😁).

بس محدش هيعرف النتيجة، إلا في أخر يوم على تقويم حضارة المايا Tzolk’in.

بطاقة تعريف اللعبة

موضوع اللعبة (Theme)

أنا بحب التاريخ، والقصص أو الأحداث التاريخية القديمة وخصوصاً لو متضمنة تفاصيل وألغاز محدش يعرفها أساساً. وده في حد ذاته شدني للعبة جداً.

بالنسبالي اللعب سواء الـ Board Games أو الـ Video Games مش لعب للتسلية فقط، ولكن بالنسبالي هي تجربة متكاملة الأركان. بتعلم منها بالظبط زي إللي بيقرأ من كتاب.

وأنا من النوع إللي بيحب يفصص الحاجة إللي قدامه كدة، ويشوف تفاصيلها، ويقرأ عن الملابسات إللي حواليها مثلاً.

بسبب اللعبة دي، ولعب تانية كتير، أنا بروح أقرأ في حضارات وتاريخ لدول كتير مختلفة ولو حتى كلمحات مش لازم أقولك إني بقرأ مراجع يعني.

 بس المبدأ نفسه إني أنا بلعب عشان أتعلم مش بس عشان أتسلى!

لو عايزين نتكلم كفنيين، فاللعب التاريخية أو إللي الموضوع بتاعها بيلمس التاريخ أو معتمد على موضوع تاريخي ولو حتى من بعيد، بالنسبالي نوعين:

1. لعبة بتاخد التاريخ زي ما هو وبتطبقه بحذافيره بقصصه بأحداثه مثلاً. فمينفعش مثلاً في النوع ده ألاقي في دبابات جوة حضارة المايا! أو إن ناس من حضارة المايا عايشين في مصر! (إلا لو التاريخ بيقول كدة).
2. لعبة بتاخد روح التاريخ، وتحطه في أي قالب أخر. زي مثلاً شخصيات بتلبس لبس تاريخي بس في العصر بتاعنا وبتتعامل بمعطيات العصر بتاعنا. أو بتاخد روح التاريخ وبتخترع قصة خيالية بالشخصيات دي مثلاً فتلاقي شخصيات بتتعامل بمنطلق حضارات تانية بس في قالب (Setting) تاني خالص.

والاتنين أنا بحبهم وبحب ألعبهم وكدة كدة بتعلم منهم سواء كانوا Video أو Board. ولكن النوع التاني تحديداً بيدي حرية أكبر للمصمم إنه يسرح بخياله شوية ولا يتقيد بأحداث أو وقائع محددة بعينها.

فأنا هقيم اللعبة دي، طبقاً لنقطة رقم (١). لأن اللعبة حسب ما يزعم المصممين وعنوان اللعبة هي حاجة متعلقة بحضارة المايا حرفياً بدون قولبة أو تغيير في الأحداث أو وضع أحداث خيالية مثلاً. هو أخد معطيات وأسماء وتقويم حضارة المايا، وأخدت معيشتهم وحياتهم وأكلهم، وحب يعمله لعبة بتدور حوالين حياتهم.

يبقى نتكلم كفنيين بقا

اللعبة فيها أخطاء تاريخية وعدم تطابق مع حاجات كتير المايا اخترعتها زي التقويم مثلاً إللي هو أصلاً اسم اللعبة وده بشهادة المؤلف نفسه في أحد التعليقات على بعض ردود الأفعال على اللعبة.

1. التقويم بتاع حضارة المايا إللي هو اسمه Tzolk’in كتبسيط مخل جداً هو عبارة عن ترسين، واحد للأيام والتاني للشهور. مجموعهم يساوي 260 يوم. في اللعبة المصمم قرر يستخدم ترس واحد بس عبارة عن 26 سن. كل سن يعبر عن 10 أيام لغرض تسهيل طريقة اللعب والتصميم طبعاً.
2. الترس إللي اسمه Tzolk’in في اللعبة مرسوم عليه نقوش ورسومات لا تمت لحضارة المايا أصلاً. هي نقوش ورسومات مرسومة على ترس موجود في حضارة الـ(أزتيك) وبرضه بيستخدم في التقويم. وده اعترف بيه المصمم وقال ما معناه إن هو عمل كدة عشان ده الشكل المشهور بين العامة والناس إن ده شكل الترس لحضارة المايا، إنما ده مش الشكل الحقيقي للترس. فهو دمج حضارتين مختلفين على حسب كلامه لأن حضارة الـ(أزتيك) أخدت من حضارة المايا بالتبعية.
3. في اللعبة أنت بتجمع شوية جماجم كريستالية كدة وبتاخد بيها شوية Actions. والجماجم دي ارتبطت على مر السنين بخرافات وأساطير مرتبطة بحضارة المايا والحضارات القديمة. لكن الاكتشافات الحديثة أثبتت إن الكلام ده كله مش صحيح، وإن الجماجم الكريستالية دي كانت بتتصنع في القرن ال (١٩) أصلاً، وفي كتير منها كان بيتصنع بمعدات حديثة مكنتش موجودة في عصر المايا أساساً. وكل إللي موجود في المتاحف بخصوصها لا علاقة له بالأثار وكلها حاجات مزيفة حرفياً. وفي كذا متحف اعترف بالحقائق دي.

أما بقا لو بنتكلم كلاعبين

فأقدر أقول إن في خليط رائع بين الأفعال إللي بتعملها على الـ Board، وبين حركة التروس، وبين فكرة تقويم المايا. أنا منبهر بيها ومعجب جداً بطريقة توظيف التروس إللي هو يعتبر الوقت في اللعبة وإنها إزاي بتأثر حرفياً على اللعبة بشكل ممكن يأثر في خطتك.

وبما إننا هنا بنتكلم كلاعبين، فخلينا نقول إنك مش هيفرق معاك كل الحقائق التاريخية إللي أنا عمال أهري فيها فوق دي. وده لأنك حرفياً هتستمتع باللعبة دي من الألف للياء.

قواعد اللعبة (Rules)

كتاب القواعد مش صغير حوالي 16 صفحة. ولكن مليان بالصور ونسب الكتابة للصور ممتازة. سهل ومرن جداً في القراءة وفي كمان ملخص في أخره وده شيء ممتاز.

اللعبة لأول وهلة هتحس إن في حاجات كتير أوي، وكلها مترابطة ببعض. وده لأن فيها في الحقيقة Actions كتيرة وكل Action معاه Icon وبيعمل حاجة معينة.

بس كل حاجة سلسة جداً، ومنطقية، وسهلة الفهم ويمكن مش هتحتاج الكتاب بعد كدة أبداً إلا لو كنت نسيت شكل Icon معينة أو عايز تعرف Tile معينة بتعمل إيه مثلاً.

غير كدة كتاب القواعد شكله حلو، وفيه أمثلة كتير وده شيء أنا دايماً بحترمه في الكتب إللي بتقدمه، وشرحه ممتاز.

ولو حابب تتصفح كتاب القواعد، فتقدر تنزل كتاب القواعد من هنا

ولو أنت من النوع إللي بيحب يتفرج وميقراش أوي أو بيحب يتفرج ويقرا، اتفضل يا سيدي الفيديو ده أنصح بيه جداً:

طريقة وآليات اللعب (Gameplay & Game Mechanics)

اللعبة معتمدة بشكل أساسي على الـ Worker Placement كآلية لعب (Game Mechanic).

ولكن المميز في اللعبة دي هو طريقة الـ Worker Placement نفسها، والتعديل إللي اتعمل عليه. فاللعبة تقدر تقول اخترعت Mechanic جديد اسمه Dynamic Worker Placement.

اللعبة عبارة عن تروس مترابطة جنب بعض، الترس الرئيسي (الكبير) هو الترس إللي في الوسط، وده إللي اسمه Tzolk’in إللي هو بيمثل التقويم بتاع حضارة المايا.

الترس ده فيه 26 سن، وكل سن في اللعبة بيمثل 10 أيام. يعني مع كل لفة للترس ده كأن في 10 أيام خلصوا من السنة.

والترس ده مرتبط بخمس تروس، كل ترس بيمثل مدينة أو مكان تقدر تروح ليه في بلاد المايا.

في دور كل لاعب أنت بتعمل Action واحد بس:

• لو معاك Workers فبتقرر عايز توديهم فين في الخمس أماكن دول. 
• أو بتقرر إنك تسحب Worker من على ترس من التروس دي وترجعه تاني عندك. وفي بداية اللعب طبيعي إن كلنا مش هنقدر نسحب أي Worker لأن مفيش أصلاً كلهم في إيدينا.

الـ Workers بتتحط على أماكن مجوفة موجودة ومخصصة على التروس دي عشان يفضلوا ثابتين وميقعوش مع حركة التروس.

المميز هنا في اللعبة، إنك لما بتحط الـ Worker مش بتاخد الفايدة بتاعة المكان إللي رحتله في وقتها، لأ أنت بتدفع فلوس (بالذرة – العملة الرسمية في اللعبة) عشان توقف الـ Worker في المكان إللي اخترته حسب تسعيرة معينة موجودة في اللعبة.

ولما كل اللاعبين يحطوا الـ Workers كدة يعتبر إن في فترة خلصت في اللعبة، فالوقت بيمر، ولازم التقويم يتحرك، فبنحرك الترس الرئيسي للعبة لفة واحدة (كدة في 10 أيام خلصوا بتقويم المايا الحقيقي – أو يوم واحد بتقويم اللعبة).

تحريك الترس إللي في الوسط ده، بيخلي كل التروس التانية تتحرك بالتبعية. وكل الـ Workers بتغير مكانها تماماً، فبقا مكان تاني غير إللي أنت حطيت عليه الـ Worker في الأول.

فدلوقتي أنت لو حبيت تسحب Worker من بتوعك هتاخد دلوقتي الفايدة بتاعة المكان الجديد إللي بقيت عليه بسبب إن الترس لف. وده الشيء الرائع في اللعبة دي.

وضع خطتك أثناء اللعب مهم جداً، لأن الوقت في اللعبة دي يعتبر Resource متمثل في لفة الترس والتروس إللي حواليه إللي بيأثر بالتبعية على إيه هي الفايدة إللي هتاخدها لما تسحب الـ Worker بتاعك.

لو حابب تتفرج على طريقة اللعب ممكن تتفرج على الفيديو ده:

مكونات اللعبة والرسومات (Components & Art)

أنا هنا هتكلم عن نوعية المكونات، والرسومات، وجودتها، وعددها، ومدى ترابط المكونات والرسومات موضوع اللعبة، وما إلى ذلك.

١. المكونات (Components)

للوهلة الأولى، الـ(بورد) شكلها بالتروس رائع ويشد أي حد يتفرج على اللعبة ويبقى عايز يجربها. ووجود رموز وأرقام من حضارة المايا (أو خليط بقا مع الـ(أزتيك)) في كذا مكان ومع الرسومات محسسك إنك بتلعب هناك حرفياً. هياخدك لجو تاني.

بس ملاحظة بسيطة، مع الوقت لأن الـ(بورد) دي بتتلم وتتجمع في الصندوق تاني بعد لما تخلص. فهي بتبقى على شكل puzzle والتروس بتفضل راكبة في الـ(بورد)، فبيبقى في فواصل كدة بين التروس وبين الـ(بورد) بتتقطع، وده مع كتر الاستخدام وفتح وقفل الـ(بورد) فعايزة شوية حرص بس في التعامل.

المكونات إللي بتلعب بيها نفسها زي الـ Workers أو الـ Resources شكلها عادي جداً (اسطوانات ومكعبات)، فكنت أتمنى يبقى شكلها أحسن وأفضل عشان تندمج أكتر في جو اللعبة زي مثلاً شكل الجماجم الكريستالية إللي في اللعبة برضه وشكلها حلو جداً.

وبسبب شكل التروس وحلاوة تصميمها في ناس كتير جداً قرروا يلونوها ويدوها طابع مختلف فاللعبة بتبقى حاجة تانية حرفياً. وكمان في ناس بتعمل Upgrade للمكونات وتجيب أشكال حقيقية للذرة مثلاً أو الـ Workers.

٢. الرسومات (Art)

الرسام Milan Vavroň كان موفق جداً في اختيار الأشكال والرموز. وكمان في شكل الـ(بورد) والتقسيمات بتاعتها لأنه قدر يدينا فكرة كبيرة عن الحضارة نفسها وحسسك إنك فعلاً قبيلة منهم.

وبمساعدة محبي اللعبة، فالناس لما لونت التروس وأبرزت العلامات إللي ظاهرة على التروس، فده كمان أضاف روح جديدة للعبة (ده للناس إللي بتحب التلوين وكدة).

طرق اللعب المختلفة (Play Modes)

اللعبة بتتلعب بطريقة واحدة بس وهو أكتر من لاعب بشكل تنافسي (Multiplayer Competitive) وكنت فعلاً أتمنى ينزلوا ليها طريقة رسمية للناس إللي بتحب تلعب لوحدهم (Solo) بس للأسف محصلش.

ولكن في ناس كتير عملوا تعديلات على اللعبة ونزلوا طرق غير رسمية زي إنك تلعب لوحدك مثلاً.

مصمم اللعبة

مصممي اللعبة Daniele Tascini و Simone Luciani، اشتغلوا مع بعض في لعب كتير. واللافت للنظر إن في منهم حبة حلوين ليهم طابع تاريخي ومع أكتر من ناشر وده يخليك تقدر تشوف دماغهم رايحة لفين.

شخصياً أنا في كذا لعبة من لعبهم عندي في الـ Wishlist بس لسة مجتش الفرصة إني ألعبهم بس أنا متشجع جداً إني ألعب حاجة تانية من تعاونهم مع بعض بعد إللي شفته في Tzolk’in.

خصوصاً لما شفت رد Daniele Tascini على اعتراضات الناس التاريخية على اللعبة وأد إيه هو كان متفهم وفسر الموضوع بالنسبالي على الأقل بشكل منطقي. وأهم من ده كله اهتمامه بالرد والتوضيح في حد ذاته ده شيء ممتاز.

أما ناشر اللعبة شركة أنا بعتز بيها جداً شركة CGE أو Czech Games Edition وعندي ليهم كذا لعبة زي The Prodigals Club و Space Alert و Dungeon Lords و Codenames: Duet وكذا لعبة تانية من الـ Party Games وتقريباً مفيش لعبة جربت ألعبها إلا لما لازم يكون فيها حاجة جديدة.

عملت قبل كدة برضه مراجعة للعبة The Prodigals Club تقدر تشوفها من هنا وكانت برضه من نفس الشركة.

إيه إللي عجبني؟

• بلا جدال وأول حاجة بلا نقاش طريقة اللعب عن طريق التروس رائعة. والـ Worker Placement وإن الـ Worker مكانه بيتغير جديدة وبتضيف عمق في الخطة إللي بتعملها. وكمان ممكن حد يتحكم في تغيرهم فعلاً رائعة.
• شكل الـ(بورد) على الترابيزة أو زي ما بيسموه الـ Table presence تشدك وتفتح نفسك الصراحة إنك تلعب.
• ارتباط ده كله بالموضوع بتاع اللعبة (Theme) مع الاعتراف بوجود بعض الأخطاء التاريخية، ولكن الارتباط العام بالـ Calendar وتغير الوقت وطريقة تأثير ده على اللعبة، اتعملت بشكل ممتاز جداً.
• في أكتر من طريقة أو تقدر تقول عدد كبير جداً متعرفش تحصره تكسب بيهم، وده إللي مخليني بحبها أكتر كمان لأن في خطة أنت ممكن تحطها وتحاول تنفذها ولو حصل مشكلة ممكن تغير الخطة ويبقى عندك خطة بديلة.
• – تقريباً انعدام الحظ فيها. معظم اللعبة محتاجة تخطيط مسبق وتنفيذ للخطة بتاعتك بشكل بحت.

إيه إللي معجبنيش؟

• الأخطاء التاريخية في موضوع اللعبة.
• حتة إن الـ(بورد) ممكن تتقطع لو مش واخد بالك مع فتح وقفل البورد مش لطيفة لأن أنت هتضطر تشيل الـ(بورد) بالتروس.
• شكل المكونات إللي بتلعب بيها هي حاجات كلها عادية (اسطوانات مكعبات) مع إنهم حاطين جماجم مثلاً وشكلها حقيقي. بس مش عارف ليه بقية المكونات متكونش برضه بتعبر عن نفسها زي التانيين خصوصاً إن اللعبة مبنية على موضوع تاريخي (Thematic).

تشتريها منين

حالياً ممكن تلاقيها على أمازون بسهولة. أقل سعر وصلتله كان حوالي ٣١ دولار من فترة وبينزل عليها عروض بشكل مستمر.

رأي إجمالي

متصنفة واحدة من أفضل (٥٠) لعبة على مستوى العالم حسب تقييم BGG وكمان واحدة من أفضل (٥٠) لعبة إستيراتيجية على مستوى العالم. 

طريقة اللعب، وفكرة التروس وإزاي بتشتغل مع بعض، والتعديل بتاع الـ Worker Placement يخليني بكل بساطة أقدر أقول إنها من أفضل الألعاب إللي لعبتها بشكل عام.

وغالباً هتبقى مختلفة عن أي لعبة أنت لعبتها في فئة الـ Worker Placement قبل كدة. وتستحق الشراء بلا جدال.

أتمنى يكون التقييم يساعد حد فيكم على اتخاذ قرار بخصوص اللعبة دي، وإلى اللقاء في تقييم أخر.