لعبة Calico – قطتك مستنياك تعملها اللحاف بتاعها

مقدمة

كتير من الناس إللي عندهم قطط من نوع Calico وتقريباً كل الأنواع، كانوا متحيرين جداً وعلاطول بيسألوا، هو ليه القطط بتحب أوي تنام على اللحاف أو البطانية بتاعتي؟!

أياً كان نوع اللحاف أو البطانية، أياً كان لونه أو شكله. بما إن في لحاف أو بطانية ومش لاقي قطتك، روح دور عليها هناك من غير متفكر.

العلماء بدأوا يدوروا ورا الموضوع عشان يفهموا هو في إيه؟

وطلعوا بسببين محتملين:

1. إن اللحاف أو البطانية بيشعروا القطة بالأمان والراحة والدفء إللي كانت بتشعر بيهم مع أمها وهي صغيرة لما كانت بتلمس جسمها وهي بترضع منها، فدايماً القطط بتروح تقعد عليهم.
2. القطة بتدور على ريحة صاحبها، وأكتر مكان ريحته بتبقى فيه هي البطانية أو اللحاف بتاعه.

طيب ممتاز، الحمد لله أصحاب القطط عرفوا الإجابة والعلماء قدروا يوصولوا لنتيجة والحمد لله كلنا مبسوطين.

بس إحنا كبشر بقا نسكت؟! لأ طبعاً!

يقوم يجي واحد اسمه Kevin Russ يقولك لأ بقا، ده الموضوع ده مهم جداً ولازم نعمله لعبة. طيب يا عم استنى بس نتفاهم! لكن لا حياة لمن تنادي!

صحينا الصبح لقينا لعبة Calico!

في Calico هتبقى واحد من أصحاب القطط دي، ولكن في الحقيقة أنت معندكش لحاف لسة أو بطانية عشان القطط بتاعتك تيجي ترتاح عليهم.

فدورك في اللعبة هو إنك تعمل اللحاف الخاص بيك إللي عن طريقه تجذب القطط بتاعتك يقعدوا عليه ويحسوا بالأمان والدفء والراحة.

بطاقة تعريف اللعبة

موضوع اللعبة (Theme)

في فئة من الألعاب اسمها فئة الـ Abstract Games أو ألعاب مجردة ملهاش موضوع أو Theme ولكن في الحقيقة أنا ضد الموضوع ده لأني مبحبوش 😁

أنا مبحبش اللعب الـ Abstract إللي ملهاش موضوع وبالتالي حتى لو اللعبة ملهاش موضوع من وجهة نظر البعض فأنا بعملها موضوع عشان أقدر أتعايش مع اللعبة.

لعبة Calico متصنفة على إنها واحد من الألعاب دي وأنا ضد ده تماماً. أنا شايف اللعبة ليها موضوع وكمان Thematic وممكن ناس ترفض ده لكن أنا شايف ده وهقولكم ليه.

عشان تفهموا قصدي، تعالوا نشوف إيه موضوع إن حد يعمل لحاف ده. وأنا بدور وبعمل بحث عن كيفية عمل اللحاف عشان أكتب المراجعة دي لقيت حاجة غريبة جداً.

لقيت واحدة مهتمة بالهواية دي، وبتعمل اللحاف بالشكل بتاع لعبة Calico بالظبط وهي إللي عملت اللحاف أو جزء من اللحاف إللي في الصورة دي:

دورت شوية ورا الموضوع، لقيت فكرة عمايل وتطريز اللحاف ده هواية كبيرة عند ناس كتير. وإن طريقة التطريز والألوان والنمط المستعمل يشبه كتير فكرة لعبة Calico.

صدقتوني بقا لما بقولكم إن أنا مش مقتنع إن في حاجة اسمها لعبة مجردة. لازم اللعبة تبقى مبنية على أمر ما في خيال المصمم. حتى لو كان حاجة أتفه من إنك ممكن تستوعبها ولكن لازم هيبقى في موضوع ما.

نيجي كمان لنقطة تانية، هو يعني إيه Calico؟

دورت ورا الموضوع شوية لقيت: “قط كاليكو هو قط ذو فراء متعدد الألون وغالباً ما يكون أبيض مع خليط من لونين أخريين (غالباً البرتقالي والأسود).”

يعني زي إللي مرسوم على العلبة كدة:

موضوع اللعبة لطيف وظريف وأنا شخصياً هتعلم منه حاجات كتير وأنا بخرج الفوايد إللي طلعت بيها من اللعبة في تصنيف (اتعلمت إيه جديد؟).

قواعد اللعبة (Rules)

اللعبة قواعدها بسيطة جداً، وكتاب القواعد صغير ومعمول باحترافية تامة. من أول طريقة الكتابة للإنتاج النهائي للكتاب للصور والأمثلة.

فعلاً كتاب ممتاز.

بس الجديد بقا وإللي بدأ يظهر الفترة إللي فاتت في لعب مختلفة وعجبني جداً، هو فكرة الإنجازات Achievements.

في أخر الكتاب، في مجموعة من التحديات إللي اللعبة بتتحداك فيهم، ولو قدرت تعملهم بتعلم عليه وتخش على التحدي إللي بعده. وعلى حسب عدد التحديات إللي بتخلصها بيبقى ليه رتبة (Rank) معين.

وده ممكن تشاركه مع أصحابك أو إللي بيحبوا اللعبة عشان تتنافسوا فيها حتى لو مبتلعبوش مع بعض بشكل مباشر.

ولو حابب تتصفح كتاب القواعد، فتقدر تنزل كتاب القواعد من هنا.

ولو أنت من النوع إللي بيحب يتفرج وميقراش أوي أو بيحب يتفرج ويقرا، اتفضل يا سيدي الفيديو ده أنصح بيه جداً (هو نفس فيديو طريقة اللعب لأن قواعد اللعبة بسيطة وتبان أكتر مع طريقة اللعب من وجهة نظري):

طريقة وآليات اللعب (Gameplay & Game Mechanics)

اللعبة بتتكون من ٧ آليات لعب أو كتر. بسيطة جداً كقواعد، بس هتفكر كتير جداً وأنت بتلعب (Brain Burner).

هتكلم عن أهم آليات اللعب إللي فيها من وجهة نظري:

1. Tile Placement، عشان تعمل اللحاف بتاعك هتاخد Tile على شكل Hex من التلاتة المعروضين في كل Round وهتحطها على اللحاف بتاعك بحيث تكون شكل أو لون معين. معظم التفكير في اللعبة دي ومعظم النقط بتيجي بسبب آلية اللعب دي.
2. Pattern Building، لما بتاخد Tile عشان تحطها على اللحاف بتحاول تحطها في شكل محدد حسب الهدف بتاعك إللي أنت حددته في بداية اللعب. لو قدرت تحط معظم الـ Tiles في النمط إللي أنت اخترته هتقدر تجمع جزء كبير جداً من النقط.

اللعبة من بعيد تبان بسيطة، بس صدقني من كتر التفكير والتركيز ومحاولة إنك تجمع نقط من أكتر من اتجاه في نفس الوقت هتحس إنك بتنهار 😁

مصادر النقط في اللعبة كتير جداً، وده إللي مخليني بحبها جداً:

1. لما تجمع ٣ ألوان أو أكتر من الـ Tiles ممكن تحط عليهم زرار من نفس لونهم (٣ نقط).
2. لو قدرت تجمع ٣ أو أكتر من نفس النمط، ساعتها في قطة بتنجذب للحاف وتقعد على النمط إللي أنت عملته (كل قطة ليها Score مختلف).
3. عندك ٣ أهداف في اللحاف بتاعك بتحاول تحققهم بتختارهم في بداية اللعبة، وكل هدف ممكن تحققه بطريقتين. إما إنك تجمع مجموعة من الألوان أو مجموعة من الأنماط ولو قدرت تحقق الاتنين الـ Score بيبقى أكبر.

اللعبة مع إنها تبان إنها صغيرة، بس رائعة وبتتلعب كمان في حدود من ٣٠ لـ ٤٥ دقيقة. وكمان سهلة في إنك تتنقل بيها.

أنا شخصياً بحب اللعب إللي فيها النوع ده من الألغاز (Puzzle) وفكرة إنك تعمل الحاجة بأكثر من نمط وعلى حسب الأنماط والألوان بتاخد نقط معينة.

ولو حابب تتفرج على طريقة اللعب ممكن تتفرج على الفيديو ده (هو نفس الفيديو إللي حطيته فوق):

مكونات اللعبة والرسومات (Components & Art)

أنا هنا هتكلم عن نوعية المكونات، والرسومات، وجودتها، وعددها، ومدى ترابط المكونات والرسومات موضوع اللعبة، وما إلى ذلك.

١. المكونات (Components)

المكونات فوق الرائعة. الـ Boards إللي هي تعتبر اللحاف بتاع كل لاعب جودة إنتاجها فوق الممتازة ومجوفة عشان تمنع تحرك الـ Tiles.

كل الـ Tiles ليها سُمْك ممتاز يحسسك بجودة اللعبة ومتانتها.

٢. الرسومات (Art)

الألوان فوق الرائعة. مفرحة، ومبهجة، ولو مش عايز تلعب هتبقى عايز تلعب.

اختيار الألوان وشكل الأنماط المختلفة في النهاية بيرسم لوحة فنية بجد لما بتخلص اللحاف بتاعك

والله أنا شخصياً أتمنى يكون عندي لحاف زي ده.

بس لما تعرف إن الفنانة إللي رسمت الكلام ده كله واختارت الألوان وخلافه هي Beth Sobel فساعتها مش هتستغرب.

لأن Beth Sobel هي واحدة من الناس إللي اشتغلوا على الرسومات بتاع اللعب الآتية:

• Wingspan
• Arboretum
• Viticulture
• Cascadia

طرق اللعب المختلفة (Play Modes)

اللعبة ممكن تتلعب بطريقتين:

1. يا إما بطريقة تنافسيه مع أكتر من لاعب (Multiplayer Competitive)
2. أو تتلعب لوحدك (Solo)

والطريقتين أروع من بعض.

ده غير كمان وجود فكرة التحديات والرتب (Ranks) إللي في كتاب القواعد إللي ذكرتها فوق بتخلي اللعب فيه تحدي وتفاعل أكبر.

مصمم اللعبة

مصمم اللعبة هو Kevin Russ وهو نفس مصمم ألعاب:

• Overboss – كانت على Kickstarter ونزلت بالفعل خلاص واللعبة رائعة وإن شاء الله أعملها مراجعة قريباً.
• Verdant – لسة هتنزل السنة الجية وكانت على Kickstarter السنة دي أظن.
• طبعاً بجانب لعبة Calico.

تقييم اللعب دي ممتاز جداً على BoardGameGeek والراجل واضح إنه ماشي بخطى ثابتة بس متهيألي هو مركز أكتر على النوعية دي من اللعب، إللي هي تبان خفيفة في القواعد ولكن تعتبر محتاجة تفكير كتير ومبتاخدش وقت كبير في اللعب.

إيه إللي عجبني؟

• فكرة إنك بتجمع نقط من أكتر من حاجة، من أكتر الحاجات إللي بتشدني في اللعب بشكل كبير.
• إنتاج اللعبة وجودة المكونات وروعة الرسومات والألوان شيء يحفز على اللعب ويفتح النفس بصراحة.
• تعليم القواعد مبياخدش وقت. واللعبة سهلة التعلم. بس مش سهلة الإتقان وبتحتاج تفكير.
• فيها Solo mode وده شيء ممتاز بالنسبالي لأن عادة أنا بلعب Solo لما بكون لوحدي.

إيه إللي معجبنيش؟

في الإطار إللي اللعبة معمولة عشانه، مفيش حاجة معجبتنيش بصراحة.

اللعبة لعبة عائلية بامتياز وكمان للناس إللي بتحب تفكر. وكمان مش صعبة ومش سهلة، ومبتاخدش وقت في اللعب.

فإيه إللي مش هيعجبني فيها؟ رائعة جداً.

تشتريها منين

اللعبة حالياً موجودة على أمازون وممكن أي حد يشتريها وأنصح أي حد يشتريها ١٠٠٪ طبعاً بلا جدال.

رأي إجمالي

لعبة رائعة بكل صراحة، تستحق التجربة. من أمتع اللعب الصغيرة في الحجم الكبيرة في طريقة اللعب إللي لعبتها السنة إللي فاتت.

أتمنى يكون التقييم يساعد حد فيكم على اتخاذ قرار بخصوص اللعبة دي، وإلى اللقاء في تقييم أخر.