مقدمة
اللعب بشكل عام والـ (بورد جيمز) بشكل خاص، تعتبر أرض خصبة جداً لتعلم اللغات بشكل عام. فإياك تفوت الفرصة دي على نفسك. بجانب المتعة إللي ممكن نحس بيها وإحنا بنلعب، ممكن كمان نستفيد ونطور من نفسنا وإحنا بنستمتع.
وقبل كدة شرحتلكم بالتفصيل الممل إيه هي الطريقة إللي بتعلم بيها لغات من الـ (بورد جيمز) وكملخص سريع:
- أكتر حاجة بحاول أركز عليها هو إني أزود المحصلة الكلامية إللي عندي من خلال اللعبة إللي بلعبها.
- بستعمل برنامج على الموبايل اسمه WordTheme بيساعدني في حفظ الكلمات وتصنيفها وتقييم مستوايا فيها.
النهاردة بقا أنا عايز أوثق معاكم مجموعة كلمات جديدة اتعلمتها من لعبة The Prodigals Club. وكمان عايز أوضح إزاي بقيم نفسي في تعلم الكلمات دي وإيه هي درجة إتقاني حالياً ليهم.
٣٥ كلمة جديدة
قبل مقولكم إزاي بقيم مستوايا في الكلمات إللي اتعلمتها جديد، خليني الأول أقولكم إيه هي الكلمات إللي اتعلمتها من لعبة The Prodigals Club. ولازم كمان نتفق إن الكلمات دي هتختلف من شخص لشخص.
أنا مثلاً في كلمات من إللي بتعلمهم ببقى عارفهم قبل كدة ولكن بالشبه وقررت أخيراً أتعلم معناهم الحرفي عشان زهقت من التشبيه 😂، لكن ممكن واحد تاني يبقى عارفهم أصلاً فأكيد عدد الكلمات هيختلف.
إزاي بقيم مستوايا في إتقان الكلمات الجديدة
البرنامج إللي بستعمله (WordTheme) عشان أحتفظ بالكلمات إللي بتعلمها وأصنفها، فيه طرق مختلفة لمراجعة الكلمات وتقييم مستواك في الكلمات إللي دخلتها فيه مسبقاً. الطرق دي البرنامج عاملهم على هيئة لعب مختلفة.
والطرق دي هي:
- Flashcards – كروت عليها الكلمة وترجمتها
- Find the Translation – ابحث عن الترجمة عن طريق الكتابة
- Find the Word – ابحث عن الكلمة
- Mixed Letters – حرق متلخبطة
- Write the Word – اكتب الكلمة
- Spelling Test – امتحان إملاء عن طريق الاستماع
- Find the Translation – ابحث عن الترجمة ولكن عن طريق الاستماع
- Crossword – لو اشتريت النسخة الاحترافية من البرنامج أعتقد
أنا بقا بلعب كل لعبة من دول، وبحدد الكلمات إللي أنا حطتها أو إللي عايز أتدرب عليها. ومع كل امتحان في نتيجة.
البرنامج بيبدأ يجمع الدرجات إللي جبتها في كل كلمة على حدة، ويظهر درجة إتقانك للكلمة دي جنب كل كلمة وده على حسب عدد مرات ظهورها في اللعب إللي لعبتها.
وبكدة بقدر أحسب درجة إتقاني للكلمات دي مع الوقت. ولو شايف إن في كلمات ضعيف فيها ببدأ أمتحن فيها تاني. والبرنامج نفسه لو لقاك غلطت في كلمة معينة بيبدأ يظهرهالك في نفس الامتحان كذا مرة لغاية متعرفها.
درجة إتقاني للـ (٣٥) كلمة
درجة التقييم المبدأي لاتقاني الكلمات دي بعد ملعب كل اللعب على الأقل مرة واحدة كانت بمتوسط ٥٠٪. طبعاً نسب الكلمات نفسها متفاوتة.
النسب دي بتزيد مع زيادة تكرار الألعاب وتكرار تقييم مستوايا في الكلمات عن طريق اللعب المختلفة إللي في البرنامج.
رأي إجمالي
أنا قلتلكم قبل كدة في مقال قديم إن لو اتعلمت كلمة واحدة من لعبة فده بالنسبالي شيء ممتاز. فما بالكم بقا بـ (٣٥) كلمة من لعبة واحدة ده شيء فوق الممتاز الصراحة.
شاركوني بالكلمات إللي اتعملتوها جديد من اللعبة في التعليقات سواء هنا أو على مواقع التواصل الاجتماعي للموقع.
وإلى اللقاء مع لعبة جديدة وكلمات جديدة 😉
