صدمتي في علم الجغرافيا

مقدمة

في البداية كدة، أنا مفيش بيني وبين الجغرافيا أي عمار بصراحة من وأنا صغير. والموضوع ده ليه قصة مؤثرة جداً بالنسبالي ولما بفتكرها بزعل جداً. فاسمحولي أزعلكم معايا.

في وسط التسعينات كدة، كنت أنا في تالتة إعدادي وفي الفترة دي أنا ومجموعة من زمايلي – الله أعلم حد منهم ممكن يقرا الكلام ده ويفتكر ولا لأ – في مسابقات المتفوقين في المدرسة.

المسابقة ببساطة هي حاجة شبه كدة المشهد ده 👇

بيتنافس فصلين وكل فصل بيتسأل كذا سؤال في كل المواد إللي بندرسها والفصل إللي بيجاوب أكتر بيكسب وهكذا لغاية ميبقى في مراكز وكدة. والحمد لله بفضل اجتهادنا وشطارتنا وقوة ذاكرتنا – يارب سامحني – قدرنا نوصل للنهائي.

قعدت أنا وزمايلي واتفقوا معايا – أو عليا مش عارف والله – إني أنا إللي هذاكر مادة الدراسات الاجتماعية (وإللي من ضمنها الجغرافيا).

ومحسوبكم، مكدبش خبر. مسكت الكتاب وقعدت أحفظ فيه وأنا مش فاهم أنا بحفظ الكلام ده ليه ولا عشان إيه غير إننا عشان نكسب – وعشان شكلي برضه ميبقاش وحش 😂 -.

وجه يوم النهائي، والمدرس إللي كان بيسألنا في مادة الدراسات سألني سؤال مش قادر أنساه لغاية دلوقتي وملخصه هو: اكتب كل ما تعرفه عن دولة إثيوبيا وكان ناقص يقولي: ربنا معاك يبني!

أما بقا الفصل التاني سألهم شوية أسئلة هبلة كدة لأنه للأسف كان مدرس الفصل بتاعهم 🤨

السؤال مدته خمس دقايق والمفروض أنا بقا أفتكر الكتاب كله وأحطه في الخمس دقايق دول على ورق.

المهم عملنا إللي علينا، وتركنا الأمور كلها لله.

والنتيجة معروفة، الفصل التاني طبعاً هو إللي كسب.

المدرسة كلها فضلت تهتف وتقول (كوسة .. كوسة .. كوسة) وكان يوم ميعلم بيه إلا ربنا الحقيقة في تاريخي المهني التعليمي 😂 ومش قادر أنساه من يومها لأني وقفت المدير في وسط المدرسة وأنا بعيط وقلتله في وشه إنتوا نجحتوهم بالكوسة. وغالباً كنت هترفد بس ربك دايماً بيستر والله.

طيب حضرتك كقاريء ممكن تستفيد إيه من إللي أنا عمال أقوله ده. الحقيقة ولا حاجة وأنا حالياً بضيع وقتك 🤥 فقبل متقفل خليني أدخل في النقطة علاطول وأقولك إن ده كان إحساسي عن الجغرافيا لوقت قريب أوي.

أما دلوقتي الموضوع اختلف جملة وتفصيلاً خصوصاً بعد ما عرفت يعني إيه جغرافيا بجد وإن إللي كنا بندرسه في المدارس ده وإحنا صغيرين لم يدرس بطريقة منهجية صحيحة.

يعني إيه جغرافيا؟

أول مهتسمع سيرة الجغرافيا أكيد هتقول: أه مش ده العلم إللي كله خرايط ورسومات وجبال وهضاب وأسماء العواصم والأعلام!

في الحقيقة في ناس كتير حاصرة الجغرافيا في الحتة الضيقة دي وبس. ولكن في الحقيقة الجغرافيا أعمق من كدة وبكتير أوي.

الجغرافيا ببساطة بتهتم بدراسة واستكشاف (٣) أنظمة مهمين جداً وكمان بتربطهم بالمكان وده إللي بيميز علم الجغرافيا.

1. النظام البيئي الطبيعي (Physical)، وإللي هو ببساطة كمثال: شكل الأرض والتضاريس، وطبيعة الطقس. والأنهار والبحار وهكذا.
2. النظام البشري (Human)، وده إللي من خلاله بندرس حاجات زي: الثقافات المختلفة، والهجرة والتوزيع السكاني، والاقتصاد، والسياسة وكيفية توزيعهم في مكان ما.
3. النظام البيولوجي – الأحيائي (Biological)، وده إللي عن طريقه بنعرف: أنواع الكائنات الحية، وأماكن سكنها، وانتشارها وكيفية تأقلمها على الحياة.

بس في الحقيقة الجغرافيا مش بتدرس الأنظمة دي بشكل مجرد. لأ نهائي. الجغرافيا بتضيف على الأنظمة الثلاثة دي بُعد إضافي وهو:

دراسة الأنظمة دي كلها بالنسبة للمكان المحيط.

يعني مثلاً:

• عالم البيئة (Ecologist) ممكن يدرس إزاي الكائنات الحية المختلفة بتعتمد على بعض.
• لكن عالم الجغرافيا الحيوية (Biogeographer) هيدرس إزاي الاعتماد بين الكائنات الحية دي بيأثر أو بيتأثر بالمكان المحيط حواليهم.

أسهل تعريف قدرت ألاقيه للعلم ده هو التعريف إللي نشرته National Geographic وبتقول فيه ببساطة:

الجغرافيا هي دراسة الأماكن، ودراسة العلاقات بين الناس والبيئة المحيطة بهم.

ناشونال جيوجرافيك

في نظري روعة العلم ده متمثلة في إنه بينظر للـ (٣) أنظمه إللي ذكرتهم فوق وبيدرسهم من وجهة نظر المكان.

وده الشيء إللي أنا عمري مكنت هعرفه وأنا بذاكر مادة الدراسات الاجتماعية في المدرسة!

٣ أمثلة على روعة وأهمية علم الجغرافيا

عشان تفهم أد إيه العلم ده في قمة الروعة لازم تحس أد إيه عمليا العلم ده مهم. والفكرة مش في إنك ترسم خريطة أو تعرف مكان. ولكن إزاي توظف أدوات العلم ده في اكتشاف وفهم حاجات كتير زي الفقر، والحروب، والأمراض، ومشاكل الاقتصاد، والسكان، والسياسة، والكوارث الطبيعية!

1. الدراسات الجغرافية إللي بتقارن الخصائص الفيزيائية للقارات على جانبي المحيط الأطلسي، أدت إلى فكرة أن سطح الأرض يتكون من صفائح كبيرة تتحرك ببطء – الصفائح التكتونية (plate tectonics). وده إللي بدوره فهم الإنسان حاجات كتير عن الزلازل والبراكين مثلاً.
   
2. دراسات التوزيع الجغرافي للمستوطنات البشرية وضحت بشكل كبير إزاي القوى الاقتصادية وطرق النقل ممكن تأثر على مواقع المدن والضواحي الصغيرة.
   
   على سبيل المثال، التحليل الجغرافي وضح دور نظام الطرق السريعة في الولايات المتحدة والنمو السريع لملكية السيارات في خلق طفرة في نمو الضواحي الأمريكية بعد الحرب العالمية الثانية. ساعد المنظور الجغرافي في إظهار المكان الذي يتنقل فيه الأمريكيون، وليه كانوا بيروحوا للضواحي دي أو بيطلعوا منها، وإزاي أثرت أماكن معيشتهم الجديدة على حياتهم، وعلاقاتهم مع الآخرين، وتفاعلهم مع البيئة.
   
3. انتشر مرض الكوليرا في لندن بإنجلترا عام ١٨٥٤، فجه عالم اسمه (جون سنو) وكتب عدد الوفيات لكل أسرة على خريطة الشارع.
   
   باستخدام الخريطة، تمكن (سنو) من تتبع مصدر المرض إلى مضخة مياه على زاوية شارع (برود) وشارع (كامبريدج). ساعد المنظور الجغرافي في تحديد مصدر المشكلة (الماء من مضخة معينة) وسمح للناس بتجنب المرض (تجنب الماء من تلك المضخة).

دراسة علم الجغرافيا

من الكلام عن علم الجغرافيا باين جداً إنه علم ضخم جداً. عشان كدة العلماء قسموه كذا فرع وتخصص عشان يسهلوا على المهتمين دراسته.

الأقسام الرئيسية للجغرافيا:

1. الجغرافيا الطبيعية (Physical Geography)
   
   بيهتم بكل ما يتعلق بالظواهر الطبيعية سواء على سطح الأرض أو بقربه.
   
2. الجغرافيا البشرية (Human Geography)
   
   بيهتم بكل ما له علاقة بالبشر وعلاقته بالبيئة المحيطة بيهم والتفاعل معاها.
   
3. التقنيات الجغرافية (Geographic Techniques)
   
   بيهتم بالتقنيات المختلفة إللي ممكن تساعد في علم الجغرافيا وإزاي التقنيات دي ممكن تستخدم لتحليل البيانات الجغرافية زي مثلاً تقنيات بناء ورسم الخرائط والـ GPS واستخدام الأقمار الصناعية في المسح الجغرافي وغيره.
   
4. الجغرافيا الإقليمية (Regional Geography)
   
   بيهتم بدراسة منطقة محددة على كوكب الأرض من كل النواحي. غالباً متداخل مع الجغرافيا الطبيعية والبشرية بشكل كبير. مثلاً ممكن حد يتخصص في دراسة أفريقيا من كل النواحي سواء التضاريس أو المناخ أو الثقافات المختلفة وتأثر البشر بالبيئة المحيطة والهجرة واللغات وخلافه. وممكن كمان التركيز يبقى على مدينة واحدة مثلاً أو بلد.

تحت كل قسم من دول في فروع كتير جداً لا يمكن تتخيل إنها تبع علم الجغرافيا بس مفيش مجال حالياً لذكرها.

رأي إجمالي

علم ضخم زي ده، ومهتم تقريباً بفروع الحياة كلها، وما زالت طريقة دراسته مملة للغاية في المدارس. أنا نفسي المدارس تتعلم من National Geographic (القناة) وتحول المواد العلمية الصماء إلى مواد زي إللي بنشوفها في القناة دي.

أو على الأقل يشتروا حقوق للمواد العلمية دي بشكل ممتع. هتفرق ١٨٠ درجة مع الطلبة.

ولكن على أد صدمتي بعد معرفت حقيقة علم الجغرافيا، على أد منا مبسوط إني هبدأ من دلوقتي أبصله من وجهة نظر تانية تماماً.