لعبة The Prodigals Club – انضم لنادي الرجال السري في العصر الفيكتوري

مقدمة

سمعت عن نادي الرجال السري في بريطانيا قبل كدة؟ لأ؟! طيب تعالى اسمع يا سيدي.

في فترة حكم الملكة (فيكتوريا) لبريطانيا كان الراجل البريطاني ليه هيبة كدة، يعني تلاقيه علاطول لابس برنيطة كبيرة كدة، ولابس شيك، وعلاطول بيشتغل عشان يكبر ثروته، ويساعد إللي حواليه، ودايماً بيحاول يخلي صورته في المجتمع كويسة بزوقه، وأدبه، وأخلاقه. ولو حب يحضر حفلة أو مناسبة ولو حتى بسيطة يلبس رسمي ولازم يتكلم ويتعامل بشكل لائق!

بس لازم في كل عصر يطلع فيه شوية عيال تلفانين يبوظوا أي حاجة والسلام وينغصوا على الناس حياتها. فاتفق مجموعة من الشباب – ساعتها – إنهم زهقوا من الحياة المملة دي وعايزين يجربوا حاجة جديدة، حاجة فيها إثارة وتشويق، لأنهم عايزين يخلوا لحياتهم طعم ولون وريحة!

فقرروا يأسسوا نادي سري للرجال عشان يغيروا فيه تفاصيل حياتهم المملة – حسب كلامهم – إللي زهقوا منها وإللي هي بتبقى كلها شغل، ونجاح، واحترام، وفلوس، ويخلوها حياة عامرة – ما شاء الله – بالفشل، والبهدلة، والفقر!

فالنادي ده اتكتب في وثيقة تأسيسه ما يلي:

في لعبة The Prodigals Club هتبقى واحد من الشباب التلفانين دول – ربنا يحرسهم 😄 – وهتحاول بكل قوتك إنك تفلس، وتخسر الانتخابات، والناس متبقاش طايقاك. وبكدة تقدر تكسب 😄 

أهلاً بيك يا بطل في نادي الرجال السري، نادي الفشلة والمسرفين!

بطاقة تعريف اللعبة

موضوع اللعبة (Theme)

إنك تخرج عن المألوف والطبيعي للنفس البشرية فده في حد ذاته شيء ممكن يثير اهتمامك ويخليك تفكر تلعب اللعبة دي. عارفين زمان لما كنا بنلعب عسكر وحرامية، تلاقي في شوية ولاد كدة يخرجوا عن المألوف ويختاروا يكونوا الحرامية. فالولاد دي بقا لما يكبروا هيحبوا أوي ينضموا للنادي السري ده 😄 

اللعبة مباشرة جداً. بتبعت Worker وتاخد Action. بس المشكلة إن ال Action بيبقى ضد طبيعة الإنسان السوي إللي بتحاول تدور على الخير مش الشر (ده لو كنت من الناس الطيبين مش إللي كانوا بيحبوا يبقوا حرامية 😄).

هل طريقة اللعب مرتبطة بموضوع اللعبة؟

اللعبة وكل الكروت إللي فيها بتلمس أوي موضوع اللعبة وفعلاً هتعيشك جوها العام فأقدر أقول ببساطة إن طريقة اللعب مترابطة جداً مع موضوع اللعبة (Thematic).

موضوع اللعبة ببساطة إنك بتحاول تخسر واجهتك الاجتماعية في تلت مسابقات:

1. تصرف كل فلوسك وتبيع كل أملاكك وتفلس.
2. تخسر الانتخابات أو تاخد أقل أصوات ممكنة.
3. تخلي صورتك في المجتمع المتحضر مش لطيفة أو نقدر نقول زي الزفت!

ممكن تختار مسابقتين بس أو التلاتة كلهم لو تحب (Mix and match). يعني ممكن تختار مسابقتين مختلفتين كل مرة تلعب اللعبة مثلاً وده حلو جداً لسبب هذكره كمان شوية.

تحب تكون الشخصية الشريرة؟

فكرة إنك تبقى الشخص الشرير أو المبذر أو إللي بيعمل مقالب في الناس عشان شكلك يبقى وحش في المجتمع بتخليك تتخلص من القيود بتاعة: لأ ميصحش، أو أنا لازم أنقذ العالم، أو أنا لازم أكون الطيب (الكيوت) إللي بتبقى في معظم الألعاب وبتخليك تفكر بشكل تاني خالص!

وده بيخرج من جواك حاجات بجد غريبة الحقيقة. وهو ده فعلاً الشيء المميز في اللعبة دي وغريب في نفس الوقت.

ولكن على الرغم من إن موضوع اللعبة ممكن يستفز تفكيرك أو يبقى كوميدي، بس أنا مثلاً مقدرش ألعب اللعبة دي مع بناتي بشكل طبيعي لأن للأسف في مسابقة منهم فيها بعض الكروت إللي مرسوم عليها صور خارجة شوية أو بتحض على أفعال مخالفة للقيم والمباديء إللي اتربينا عليها.

وبالتالي ممكن تشيل المسابقة دي من اللعبة لو مش حابب تلعب بيها وتستغل فكرة إن اللعبة بتسمح بده.

قواعد اللعبة (Rules)

اللعبة قواعدها سهلة، وكتاب القواعد حوالي 10 صفحات بس. و كمان القواعد مش دسمة. وبالتالي مع أول Gameplay session تقريباً اللعبة هتتحفظ ومش هترجع للكتاب تاني في أغلب الأحوال.

نسبة الكتابة للصور والرسوم التوضيحية حلوة جداً. ومن أهم النقط إللي بدور عليها دايماً في أي كتاب قواعد أو محتويات اللعبة هو الكارت المساعد للاعب (Player aid) أو الدليل السريع للصور وأيكونات اللعبة (Quick Reference). والحمد لله اللعبة فيها دليل سريع في أخر كتاب القواعد لأن اللعبة معتمدة أوي على الأيكونات والرموز.

ولو حابب تتصفح كتاب القواعد، فتقدر تنزل كتاب القواعد من هنا

ولو أنت من النوع إللي بيحب يتفرج وميقراش أوي أو بيحب يتفرج ويقرا، اتفضل يا سيدي الفيديو ده أنصح بيه جداً:

طريقة وآليات اللعب (Gameplay & Game Mechanics)

اللعبة في الأساس بتعتمد على حاجتين رئيسيتين:

• أول حاجة آلية لعب (Game Mechanic) اسمها Worker placement، ببساطة بتبعت Worker في مكان معين وبتاخد ال Action علاطول ودي مفيهاش أي تغيير أو لعب (Twists). فالموضوع مباشر جداً.
  

• تاني آلية لعب رئيسية هي الـ Hand Management وهي إنك من ضمن ال Actions إللي بتاخدها إنك بتلم كروت. وبعدين بترجع تلعب الكروت دي بطريقة معينة وترتيب أنت إللي بتختاره وعلى أساسه هتاخد مزايا أكبر. بس في هنا Twist بسيط، وهو إن في نوعين من الكروت، كروت بتاخد فايدتها مرة واحدة، وكروت بتفضل تاخد فوايدها طول مدة اللعب ولكن الكروت دي عددها محدود وده إللي ممكن يخلي اختيار الكروت دي مهم جداً وفيه جزء كبير من خطتك (Strategic) لغاية متعرف تبني Engine كويس.

الجديد الحقيقة في اللعبة دي بقا، هو إنك بتحاول تبني Engine يخسرك نقط، مش يكسبك! ودي في رأيي أصعب حاجة وفي نفس الوقت أمتع حاجة في اللعبة دي بجد.

أنا كنت فاكرها سهلة، بس بجد أنا طول الوقت وأنا بلعب تفكيري بياخدني في حتة إني أخد نقط وأكسب ودي أفضل جزئية في اللعبة من وجهة نظري، وهو الصراع ده إللي جواك إللي دايماً بيلخبطك لأنك مش متعود على المبدأ نفسه (خسارة النقط).

معظم اللعب هدفك إنك تاخد نقط، لكن في اللعبة دي بالذات، كل ما تخسر كل متبقى أحسن 😄.

ولو حابب تتفرج على طريقة اللعب ممكن تتفرج على الفيديو ده:

مكونات اللعبة والرسومات (Components & Art)

أنا هنا هتكلم عن نوعية المكونات، والرسومات، وجودتها، وعددها، ومدى ترابط المكونات والرسومات موضوع اللعبة، وما إلى ذلك.

١. المكونات (Components)

اللعبة مكوناتها بشكل عام جيدة، وأكتر حاجة عجباني فيها شكل ال Worker إللي على شكل البرنيطة الإنجليزية الكبيرة دي 😄

تعالوا نبص بصة كدة على طبيعة المكونات إللي في اللعبة بشكل عام:

٢. الرسومات (Art)

الفنان إللي رسم الرسومات بتاعة اللعبة اسمه Tomáš Kučerovský وبشوية بحث صغيرين هو نفس الفنان إللي رسم لعب كتير تانية لنفس الشركة الناشرة. هو اختار رسومات وألوان (Art) من أول غلاف العلبة للـ Boards للكروت لطيف، وواخد الطابع الهزلي ولايق على اللعبة طبعاً بسبب طابعها الكوميدي، عشان كدة أنا شايفه اختيار موفق جداً.

ولكن ليا عليه ملاحظات زي مقلت قبل كدة بخصوص الصور إللي ممكن تكون خارجة شوية أو الأفعال المنافية للياقة العامة – ولكن على كل حال دي طبيعة اللعبة -.

طرق اللعب المختلفة (Play Modes)

اللعبة بتتلعب بطريقة واحدة بس حالياً وهي أكتر من لاعب وبطريقة تنافسية (Multi-player Competitive) مفيش طرق أخرى رسمية للعب حالياً.

مفيش إنك تلعب لوحدك (Solo) ومفيش إنك تتعاون مع حد مثلاً (Co-op). ولكن بيبقى في ساعات طرق لعب مختلفة (Variants) غير رسمية إللي بيحبوا اللعبة وبيلعبوها بيعملوها.

فمثلاً حالياً في طريقة إن تلعب لوحدك (Solo) – غير رسمية – ممكن تبص عليها من هنا بس أنا الحقيقة مجربتهاش قبل كدة.

مصمم اللعبة

مصمم اللعبة هو Vladimír Suchý وهو نفس المصمم للألعاب الآتية: 

• Underwater Cities
• Pulsar 2849
• Last Will

الجدير بالذكر إن لعبة The Prodigals Club تعتبر هي الابن الشرعي للعبة Last Will، لأن لعبة Last Will بتحكي عن واحد لما مات وصيته كانت إن الورثة يعملوا مسابقة مين يقدر يصرف فلوسه الأول، وساعتها ده يبقى هو الوريث الشرعي الوحيد (الفائز يعني في اللعبة).

والجدير بالذكر برضه إن لعبة Last Will يمكن دمجها مع The Prodigals Club بحيث اللعبة تبقى فيها 4 مسابقات مش (٣) بس طبعاً هتبقى أكثر تعقيداً وطريقة الدمج دي مذكورة في كتاب القواعد.

يبدو إن Vladimír Suchý عنده مشكلة مع الفلوس والأملاك وبيحب يخسرهم، وعنده شوية فلوس محيراه معرفش ليه 😄.

إيه إللي عجبني؟

عارف لما بتحاول تعد تصاعدي من (١) لـ (١٠٠٠)، بتبقى سهلة ومنطقية جداً لمخك ومفيش مجهود يذكر في محاولة تذكر الأرقام. تقريباً عقلك مبيبقاش شغال وأنت بتعمل ده.

بس لو قلتلك عد من (١٠٠٠) لـ (١) تنازلياً، فأنت حرفياً هتعاني عشان تعرف تعملها من غير ولا غلطة لأن أنت ماشي عكس تفكيرك وعكس إللي عقلك متوقعه تماماً!

ده بالظبط إللي بيحصل في اللعبة دي، بدل مقعد أجمع نقط إللي هو الشيء الطبيعي لأي واحد بيفكر إنه يكسب في أي لعبة، فأنا حرفياً بحط خطة عشان أخسر نقط 😄

دي أكتر حاجة عجبتني فعلاً!

إيه إللي معجبنيش؟

على الرغم إني قلت إن موضوع اللعبة مميز جداً وجديد، وفكرته كوميدية كمان، لكن في الحقيقة أخلاقياً أنا مش عايز ألعب اللعبة دي مع بناتي مثلاً بشكلها الحالي (لازم يحصل فيها تعديل أو تغيير).

أو مش عايز أفهمهم اللعبة بالشكل بتاع إني عشان أكسب لازم أبقى وحش في كل الحاجات دي، وأوحش واحد هو إللي بيكسب!

قيمة أخلاقية سيئة جداً لطفل مش هيقدر يستوعب الفكرة الهزلية من اللعبة نفسها لأن أكيد مصمم اللعبة نفسه ميقصدش برضه كدة! فممكن لما يكبروا شوية يستوعبوا لكن لو أطفال صغيرين صعب.

اللعبة دي جاتلي هدية وبالتالي أنا مش فارق معايا أوي لأني مخترتش الموضوع بنفسي، لكن دي حاجة من الحاجات إللي مخلياني أتوقف شوية في إني ألعبها مع أطفال لأنهم ممكن ميستوعبوش الجزء الهزلي إللي فيها.

في كمان حاجة متعلقة بالنقطة إللي فوق، زي مقلتلكم اللعبة عبارة عن 3 مسابقات، من ضمنهم إنك تخسر وضعك الاجتماعي عن طريق إنك تعمل أفعال منافية للزوق أو الآداب العامة بشكل عام. فوجئت إن في بعض كروت مرسوم حاجات عليها أخلاقياً مش لطيفة وده جزء سلبي في اللعبة يخليني برضه أقول إنها ممكن متكونش مناسبة للأطفال خصوصاً.

فكرت إني أستغنى برضه عن الكروت دي، أو مركزش فيها عشان أقدر ألعبها وأنا مرتاح نفسياً، في كل الأحوال هم تقريباً كارتين ومكررين كذا مرة تقريباً.

تشتريها منين

لو كلامي عن اللعبة خلاك تحب تشتريها أو تلعبها أو ساهم ولو بجزء بسيط في قرارك عن اللعبة، فاللعبة متاحة ومتوفرة على أمازون، وممكن تشتريها من هنا

أقل سعر وصلتله كان حوالي ٢٧$ دولار أمريكي بس من فترة.

لو اشتريتها أو لعبتها، اكتبلي إيه رأيك عن اللعبة في التعليقات تحت، وقولي هل وجهة نظرك متطابقة أو متشابهة معايا ولا مختلفة؟

رأي إجمالي

ده التقييم النهائي من وجهة نظري المتواضعة للعبة The Prodigals Club. أنا حبيت اللعبة بشكل عام مع تحفظاتي على بعض الأمور الأخلاقية إللي فيها.

ممكن أتغاضى عنها بإني أخترع قصة تانية غير قصة الإسراف والتبذير والأفعال المخالفة للقواعد العامة دي، مثلاً ممكن لما أجي أشرحها لحد أقول إنها مسابقة وهمية عشان تقيس مدى تحكم كل واحد في الموارد بتاعته (Resources) بتاعته أو أي حاجة من هذا القبيل مثلاً.

أتمنى يكون التقييم يساعد حد فيكم على اتخاذ قرار بخصوص اللعبة دي، وإلى اللقاء في تقييم أخر.