مقدمة
في فترة التسعينات كدة، كان في لعبة بحبها جداً اسمها StarCraft. واللعبة دي تنتمي لفئة الألعاب الاستراتيجية والخططية. ببساطة عشان تقدر تكسب اللاعب إللي قدامك، لازم يبقى عندك جيش قوي وتقدر تتحكم فيه بشكل فعال أكتر من إللي ضدك.
عشان أعرف أعمل خطة وأبني جيش قوي كنت بتعامل مع كمية حاجات مهولة. وبقرأ كمية كلمات بالإنجليزي كتير جداً. وبسبب حبي الشديد للعبة دي وتفاصيلها، ولأني كنت عايز أحترف اللعب فيها – أحلام مراهقين 😂 – ، فكنت لازم أروح أدور على ترجمة كلمة كلمة من القاموس – التخين ده فاكرينه 😁 – عشان أقدر أفهم الكلام إللي مكتوب وأقدر أكون جيش قوي لأني عايز أكسب!
مع الوقت الموضوع ده تطور عندي مش بس للعبة دي، ولكن حاجات تانية كتير. زي مثلاً يفط بقراها في الشارع، أو قصص بقراها، أو حتى كلمة سمعتها في التليفزيون مثلاً.
مع الوقت أدركت لما كبرت، إن حصيلة الكلمات إللي أخدتها من اللعب والحاجات إللي كنت بشوفها وإللي اتخزنت بشكل لا إرادي في ذاكرتي، إنها بتساعدني جداً لما بعمل مشروع في الكلية، أو بكتب بحث، أو بقرا كتاب ولا مرجع، أو حتى لما باجي أتكلم مع أجانب.
هنا عرفت السر! السر الحقيقي كان في طريقة تعلم الكلمات دي مش في كمية الكلمات!
إنك تتعلم الكلمات دي في سياق وأحداث وكمان تكون مرتبطة بمشاعر داخلية جواك بيخلي الكلمة نفسها تطبع جواك ومرتبط معاها كل التفاصيل دي. فلما تحتاجها وتحاول تستدعي الكلمات دي تاني هتنط في ذاكرتك التفاصيل إللي كانت حوالين الكلمة كأنه فيلم قدامك وتقدر تفتكر الكلمات دي بكل سهولة.
عشان كدة أنا بكرر نفس الموضوع ده دلوقتي، بس المرة دي مع الـ (بورد جيمز) لأن الفايدة تكاد تكون مبهرة زي مهتشوفوا معايا خلال ثواني بالظبط.
منهجي في تعلم اللغات
أنا معنديش مشكلة إنك تاخد (كورس)، ومعنديش مشكلة تتعلم قواعد اللغة (Grammer)، لأن كل الكلام ده يعتبر مرحلة من مراحل تعلم أي لغة في الدنيا وأكيد ضرورية في كثير من الأحيان.
بس المشكلة الأساسية إللي عندي بقا إنك تتصور إن إللي كنا بناخده في المدارس والطريقة إللي درسنا بيها اللغات دي إنها هي الطريقة المثلى لتعلم اللغات!
فمن وجهة نظري المتواضعة – بجانب تعلم قواعد اللغة وإنك ممكن تاخد (كورس) – الطريقة المثلى لتعلم أي لغة هو إنك تزود حصيلتك من الكلمات إللي اللغة دي بتعتمد عليها بشكل عام.
اللغة الإنجليزية
لو هناخد مثال باللغة الإنجليزية – وغالباً بقية المقال هيبقى بيتكلم عليها – فدي الخطوات إللي شايف إن الواحد لازم يتبعها عشان يتعلمها بشكل أفضل:
- في كتب وقوائم منتشرة على الإنترنت بأكتر (١٠٠) كلمة بتستعمل في معظم الكتابات باللغة الإنجليزية. وفي برضه قائمة بأعلى (١٠٠٠) كلمة استخداماً. الدراسات بتقول إنك لو قدرت تعرف الـ ١٠٠٠ كلمة دول فأنت هتقدر تفهم ٩٠٪ من الكتابات بشكل عام.
- إزاي تراجع الكلمات دي؟ في طريقة معروفة وأثبتت نجاحها وهي طريقة الـ Flash Cards وهي إنك بتكتب الكلمة على الوجه الأمامي لكارت أو ورقة، والترجمة بالعربي على الوجه الأخر. المفروض تراجع كل فترة الكلمات دي وترجمتها. في برامج ومواقع كتير ممكن كمان تساعدك إنك تعمل الـ Flash Cards دي وتبقى Digital بدل متكتبها بإيديك.
- باستخدام الكلمات دي حاول تتكلم كتير مع أي حد. ممكن مدرسين بيشتغلوا أون لاين عشان يعملوا محادثة مع الناس ويقووا لغتهم. وفي برامج بتعمل نفس الهدف.
فببساطة أنا مهتم جداً بمعرفة أكبر قدر ممكن من الكلمات ومعانيها وإزاي تستخدم وبحاول أربط الكلام ده بحاجات بتحصل فعلاً قدامي أو حصلت ولو كانت من قصة أو من لعبة فبحاول دايماً أركز على الموقف إللي اتقالت فيه والطريقة كمان إللي اتقالت بيها.
تطبيق WordTheme
قعدت فترة كبيرة أفكر في طريقة أحتفظ بيها بالكلمات إللي بطلعها عشان بنساها مع قلة الاستخدام ولكن مكنتش بوصل لحاجة.
لغاية لما لقيت البرنامج العظيم ده WordTheme بس على Android. بصراحة مش عارف إذا كان ليه بديل على Apple ولا لأ.
في الحقيقة لقيت فيه بالظبط إللي متماشي مع منهجي في تعلم اللغات.
- في طريقة للاحتفاظ بالكلمات وترجماتها.
- ممكن تسمع الكلمة ونطقها.
- ممكن تراجع الكلمات بطرق مبتكرة على هيئة ألعاب ومن ضمنهم Flash Cards ويحسبلك كمان النتيجة بتاعتك.
- ممكن تصنف الكلمات بتصنيفات مختلفة ومتداخلة وتبحث عنهم.
- في بعض المزايا إللي بفلوس ولكن مش في جوهر التطبيق الصراحة فمش مهمة أوي.
اللغات والـ (بورد جيمز) والتطبيق
بناءً على كل إللي فات، فأنا بتعامل مع الـ (بورد جيمز) بالظبط زي اللعبة إللي كنت بلعبها في التسعينات. كل كلمة جديدة بتقابلني ببقى عايز أعرف معناها وإزاي ممكن تستخدم وإمتى.
بستخدم التطبيق وأنا بلعب عشان أجمع كل الكلمات الجديدة عليا.
وبعد فترة، بذاكر الكلمات دي عن طريق اللعب الموجودة في التطبيق زي مذكرت فوق.
تلاقي الكلمات فين؟
هديك بس شوية أماكن في الـ (بورد جيم) كدة تدور فيهم على الكلمات الجديدة دايماً.
- على صندوق اللعبة من الأمام أو الخلف. وممكن كمان اسم اللعبة نفسها.
- كتاب القواعد بتاع اللعبة ولا شك.
- الكروت وأسماءها والكلام المكتوب عليها.
- الـ Board نفسها والأماكن إللي عليها لو فيها.
- لو اللعبة فيها Story فحدث ولا حرج. هتلاقي كمية كلمات ممتازة جداً.
- بعض اللعب بيجي معاها كتب زيادة فيها تفاصيل أكتر عن اللعبة وكيفية تصميمها وما وراء قصة اللعبة. الكتب دي مصدر رائع للكلمات الجديدة.
- وعلى حسب اللعبة ممكن تلاقي مصادر تانية فيها كلمات جديدة برضه.
حجم الاستفادة الفعلي
ممكن حد يسأل إيه يعني كمية الكلمات إللي ممكن أطلعها في اللعبة الواحدة؟
والله أنا لو طلعت كلمة واحدة فده في حد ذاته استفادة. ولكن لو عايزين نحسبها بالكم مش بالكيف، ففي المتوسط للعبة متوسطة الحجم ممكن تطلع من (١٥) – (٣٠) كلمة.
في اللعب الكبيرة وخصوصاً إللي مبنية على قصة ممكن الكلمات تعدي الـ (٢٠٠) – (٥٠٠) كلمة وده كمان على حسب حجم اللعبة وممكن الرقم ده يزيد.
فتخيل معايا لو عندك (١٠) لعب وطلعت من كل لعبة بـ (٢٠) كلمة بس فأنت أضفت لمحصلتك اللغوية (٢٠٠) كلمة وده شيء فوق الممتاز.
رأي إجمالي
أخيراً اللعب بشكل عام والـ (بورد جيمز) بشكل خاص، تعتبر أرض خصبة جداً لتعلم اللغات بشكل عام. فإياك تفوت الفرصة دي على نفسك.
بجانب المتعة إللي ممكن نحس بيها وإحنا بنلعب، ممكن كمان نستفيد ونطور من نفسنا وإحنا بنستمتع.
لو حد جرب واتعلم حاجة جديدة ياريت يشاركها معانا هنا في التعليقات أو ممكن على وسائل التواصل الاجتماعي بتاعتنا
